Submitted by xaiyphimphone on
ເພື່ອປະຕິບບັດຕາມບົດບັນທຶກການຮ່ວມມື ລະຫວ່າງ ກະຊວງຍຸຕິທຳ ແຫ່ງ ສປປ ລາວ ແລະ ກະຊວງຍຸຕິທຳ ແຫ່ງ ສສ ຫວຽດນາມ ໄລຍະ 2015-2020, ລົງວັນທີ 28 ມັງກອນ 2015; ສະນັ້ນ, ໃນລະຫວ່າງວັນທີ 5-9 ກໍລະກົດ 2016 ກົມໂຄສະນາອົບຮົມກົດໝາຍ, ກະຊວງຍຸຕິທຳ ແຫ່ງ ສປປ ລາວ ນຳພາໂດຍ ທ່ານ ບຸນຊ່ວງ ທະວີສັກ ວ່າການຫົວໜ້າກົມໂຄສະນາອົບຮົມກົດໝາຍ ພ້ອມດ້ວຍຄະນະທັງໝົດ 11 ທ່ານ, ຍິງ 5 ທ່ານ ໄດ້ເດີນທາງຢ້ຽມຢາມ ແລະ ເຮັດວຽກຖອດຖອນບົດຮຽນຮ່ວມກັບກົມໂຄສະນາເຜີຍແຜ່ກົດໝາຍ, ກະຊວງຍຸຕິທຳ ແຫ່ງ ສສ ຫວຽດນາມ.
ຈຸດປະສົງໃນການເດີນທາງໄປຢ້ຽມຢາມ ແລະ ແລກປ່ຽນຖອດຖອນບົດຮຽນໃນຄັ້ງນີ້ ແມ່ນເພື່ອແລກປ່ຽນຖອດຖອນບົດຮຽນກ່ຽວກັບວຽກງານໂຄສະນາອົບຮົມກົດໝາຍ ໂດຍສະເພາະແມ່ນການຄຸ້ມຄອງການໂຄສະນາກົດໝາຍ, ການຄຸ້ມຄອງບໍລິຫານວຽກງານວາລະສານ, ການຄຸ້ມຄອງບໍລິຫານວຽກງານໜັງສືພຶມ, ການຄຸ້ມຄອງບໍລິຫານວຽກງານການຈັດພິມ ແລະ ການຄຸ້ມຄອງບໍລິຫານການໂຄສະນາທາງດ້ານເອເລັກໂຕຼນິກ.
ໃນການພົບປະແລກປ່ຽນໃນຄັ້ງນີ້ ໃຫ້ກຽດຕ້ອນຮັບຢ່າງອົບອຸ່ນໂດຍ ທ່ານ ໂດ ຊວັນ ເລີ່ນ ຫົວໜ້າກົມໂຄສະນາເຜີຍແຜ່ກົດໝາຍ ພ້ອມດ້ວຍຄະນະ; ທັງສອງຝ່າຍກໍໄດ້ສະເໜີສະພາບການໂດຍຫຍໍ້ກ່ຽວກັບ ທີ່ຕັ້ງ, ພາລະບົດບາດ, ສິດ ແລະ ໜ້າທີ່ຕົ້ນຕໍຂອງຕົນ ແລະ ການເຄື່ອນໄຫວວຽກງານໃນໄລຍະຜ່ານມາ, ຂໍ້ສະດວກ, ຂໍ້ຫຍຸ້ງຍາກ ແລະ ວິທີການແກ້ໄຂໃນການປະຕິບັດວຽກງານໃນໄລະຍະຜ່ານມາ. ຫຼັງຈາກນັ້ນ, ກົມໂຄສະນາອົມຮົມກົດໝາຍ, ກະຊວງຍຸຕິທຳ ແຫ່ງ ສປປ ລາວ ໄດ້ເຂົ້າຢ້ຽມຂ່ຳນັບ ທ່ານ ເລ ຕຽນ ເຈົ່າ ຮອງລັດຖະມົນຕີກະຊວງຍຸຕິທຳ ແຫ່ງ ສສ ຫວຽດນາມ; ໃນການເຂົ້າຢ້ຽມຂ່ຳນັບໃນຄັ້ງນີ້ ທ່ານ ບຸນຊ່ວງ ທະວີສັກ ວ່າການຫົວໜ້າກົມໂຄສະນາອົບຮົມກົດ ໝາຍ, ກະຊວງຍຸຕິທຳ ແຫ່ງ ສປປ ລາວ ຫົວໜ້າຄະນະ ໄດ້ລາຍງານກ່ຽວກັບຈຸດປະສົງ ແລະ ແຜນວຽກທີ່ຈະແລກປ່ຽນຖອດຖອນບົດຮຽນກັບພາກສ່ວນຕ່າງໆ ຕະຫຼອດໄລຍະເວລາທີ່ເດີນທາງມາເຮັດວຽກໃນຄັ້ງນີ້ ໃຫ້ທ່ານຮອງລັດຖະມົນຕີກະຊວງຍຸຕິທຳຊາບ ຊຶ່ງຈະໄດ້ແລກປຽນຖອດຖອນບົດຮຽນຮ່ວມກັບ ກົມໂຄສະນາເຜີຍແຜ່ກົດໝາຍ, ສຳນັກຈັດພິມ, ວາລະສານ ປະຊທິປະໄຕ ແລະ ກົດໝາຍ, ໜັງສືພິມ ກົດໝາຍ ຫວຽດນາມ ແລະ ພະແນກຍຸຕິ ທຳ ນະຄອນຫຼວງຮ່າໂນ່ຍ. ຫຼັງຈາກນັ້ນ, ທ່ານຮອງລັດຖະມົນຕີກະຊວງຍຸຕິທຳ ແຫ່ງ ສສ ຫວຽດນາມ ກໍໄດ້ໃຫ້ກຽດໂອ້ລົມ ແລະ ໄດ້ເນັ້ນໃຫ້ຄະນະທີ່ມາແລກປ່ຽນບົດຮຽນໃນຄັ້ງນີ້ ຈົ່ງຍາດແຍ່ງເອົາບົດຮຽນ ແລະ ປະສົບການຕົວຈິງທີ່ໄດ້ນຳມາພົວພັນແລກປ່ຽນໃນຄັ້ງນີ້ໃຫ້ໄດ້ຮັບໝາກຜົນຫຼາຍທີ່ສຸດ ເພື່ອນຳໄປປະກອບສ່ວນເຂົ້າໃນວຽກງານຂອງບັນດາທ່ານໃຫ້ໄດ້ຮັບການພັດທະນາໄປໃນທາງທີ່ດີຂຶ້ນ. ນອກນັ້ນ, ທ່ານຮອງລັດຖະມົນຕີກະຊວງຍຸຕິທຳ ແຫ່ງ ສສ ຫວຽດນາມ ກໍໄດ້ໃຫ້ຄຳໝັ້ນສັນຍາວ່າ ຈະສືບຕໍ່ໃຫ້ການຊ່ວຍເຫຼືອ ທາງດ້ານວັດຖຸ, ອຸປະກອນ ໃຫ້ແກ່ວຽກງານໂຄສະນາ ແລະ ຈະສືບຕໍ່ຈັດຈັ້ງປະຕິບັດໃຫ້ໄດ້ຮັບໝາກຜົນຍິ່ງໆຂຶ້ນ. ໃນຕອນທ້າຍຂອງການຕ້ອນຮັບ ທ່ານກໍໄດ້ອວຍພອນໃຫ້ຄະນະທີ່ມາແລກປ່ຽນບົດຮຽນ, ກະຊວງຍຸຕິທຳ ແຫ່ງ ສປປ ລາວ ຈົ່ງມີສຸຂະພາບເຂັ້ມແຂງ ແລະ ໃຫ້ໄດ້ຮັບຜົນສຳເລັດໃນການປະຕິບັດວຽກງານໃນຄັ້ງນີ້ ແລະ ຝາກຢ້ຽມຢາມຖາມຂ່າວເຖິງຄະນະນຳກະຊວງຍຸຕິທຳ ແຫ່ງ ສປປ ລາວ.
ນອກຈາກໄດ້ຮ່ວມເຮັດວຽກນຳຄະນະຕ່າງນັ້ນແລ້ວ ກົມໂຄສະນາອົບຮົມກົດໝາຍ, ກະຊວງຍຸຕິທຳ ແຫ່ງ ສປປ ລາວ ຍັງມີໂອກາດໄດ້ໄປທ່ຽວຊົມສະຖານທີທ່ອງທ່ຽວທີ່ສຳຄັນໃນນະຄອນຫຼວງ ຮ່າໂນ່ຍ ອີກດ້ວຍ ເປັນຕົ້ນແມ່ນ: ໝູ່ບ້ານຫັດຖະກຳ ຫວຽດນາມ, ຕະຫຼາດຜ້າໄໝ, ໜອງວັງເຕົ່າ, ມະຫາວິທະຍາໄລແຫ່ງທຳອິດ ຂອງ ສສ ຫວຽດນາມ ແລະ ໝູ່ບ້ານເຄື່ອງປັ້ນດິນເຜົາ ຫວຽດນາມ.
|
ຄະນະຢ້ຽມຢາມເຮັດວຽກຮ່ວມກັບ ກົມໂຄສະນາເຜີຍແຜ່ກົດໝາຍ |
ຄະນະຢ້ຽມຢາມເຮັດວຽກຮ່ວມກັບ ສຳນັກຈັດພິມ |
|
ຄະນະຢ້ຽມຢາມເຮັດວຽກຮ່ວມກັບ ວາລະສານ ປະຊາທິປະໄຕ ແລະ ກົດໝາຍ |
ຄະນະຢ້ຽມຢາມເຮັດວຽກຮ່ວມກັບ ໜັງສືພິມກົດໝາຍ ຫວຽດນາມ |
|
ຄະນະຢ້ຽມຢາມເຮັດວຽກຮ່ວມກັບ ພະແນກຍຸຕິທຳນະຄອນຫຼວງ ຮ່າໂນ່ຍ |
