ກະຊວງຍຸຕິທໍາ ຈັດຝຶກອົບຮົມວຽກງານການຂຽນແຜນປະຈໍາປີ ແລະ ແຜນ 5 ປີ ຂອງຂະແໜງຍຸຕິທໍາ ໃຫ້ 2 ແຂວງພາກເໜືອ (ບໍ່ແກ້ວ-ຫຼວງນໍ້າທາ)

**********************

      ໃນຕອນເຊົ້າຂອງວັນທີ 5 ມິຖຸນາ 2024 ຢູ່ທີ່ຫ້ອງປະຊຸມພະແນກຍຸຕິທໍາແຂວງບໍ່ແກ້ວ ໄດ້ຈັດຝຶກອົບຮົມວຽກງານການຂຽນແຜນປະຈໍາປີ ແລະ ແຜນ 5 ປີ ຂອງຂະແໜງຍຸຕິທໍາ ພາຍໃຕ້ການເປັນປະທານຮ່ວມຂອງ ທ່ານ ນະລົງລິດ ນໍລະສິງ ຫົວໜ້າຫ້ອງການ ກະຊວງຍຸຕິທໍາ, ມີ ທ່ານ ຄໍາພອນ ສີປະເສີດ ຫົວໜ້າກົມຮ່ວມມືສາກົນ, ຜູ້ຕາງໜ້າໂຄງ 037 ທີ່ໃຫ້ທຶນ, ບັນດາຫົວໜ້າພະແນກຍຸຕິທໍາແຂວງບໍ່ແກ້ວ, ຫຼວງນໍ້າທາ, ຫົວໜ້າຫ້ອງການຍຸຕິທໍາເມືອງ ຂອງ 2 ແຂວງ, ບັນດາຄູຝຶກ ທີ່ມາຈາກຫ້ອງວ່າການສໍານັກງານນາຍົກລັດຖະມົນຕີ, ກະຊວງພາຍໃນ, ກະຊວງແຜນການ ແລະ ການລົງທຶນ ແລະ ກະຊວງຍຸຕິທໍາ, ຕະຫຼອດຮອດພະນັກງານວິຊາການ ທີ່ຮັບຜິດຊອບວຽກງານດັ່ງກ່າວເຂົ້າຮ່ວມທັງໝົດ 42 ທ່ານ, ຍິງ 19 ທ່ານ.

        ຈຸດປະສົງໃນການຝຶກອົບຮົມໃນຄັ້ງນີ້ ເພື່ອສ້າງຄວາມເຂົ້າໃຈກ່ຽວການຂຽນແຜນປະຈໍາປີ ແລະ ແຜນ 5 ປີ ຂອງ ຂະແໜງຍຸຕິທໍາໃຫ້ໄປລວງດຽວກັນ. ຊຸດຝຶກອົບຮົມໃນຄັ້ງນີ້ ຜູ້ເຂົ້າຮ່ວມຍັງໄດ້ຮັບຟັງການບັນລະຍາຍ ກ່ຽວກັບການສ້າງຮ່າງບົດສະຫຼຸບ ໂດຍສະເພາະກ່ຽວກັບໂຄງຮ່າງຂອງບົດສະຫຼຸບ, ວຽກງານຄຸ້ມຄອງ ແລະ ສໍາເນົາເອກະສານ, ການສ້າງແຜນປະຈໍາປີ, ການສ້າງແຜນພັດທະນາເສດຖະກິດ-ສັງຄົມ ທີ່ຕິດພັນກັບຂະແໜງຍຸຕິທໍາ ແລະ ການຄຸ້ມຄອງໂຄງການລົງທຶນຂອງລັດ. ຈາກນັ້ນ, ຜູ້ເຂົ້າຮ່ວມກໍໄດ້ພ້ອມກັນປະກອບຄຳເຫັນ, ສົນທະນາ-ຖາມຕອບ ແລະ ແລກປ່ຽນບົດຮຽນ ລະຫວ່າງ ຄູຝຶກ ແລະ ນັກສໍາມະນາກອນນໍາກັນດ້ວຍບັນຍາກາດຟົດຟື້ນ.   ຊຸດຝຶກອົບຮົມໃນຄັ້ງນີ້ ດໍາເນີນເປັນເວລາ 2 ວັນຈຶ່ງສໍາເລັດ.

ພາບ-ຂ່າວ: ພະແນກຍຸຕິທໍາແຂວງ