ກະຊວງຍຸຕິທຳ ຈັດກອງປະຊຸມເຜີຍແຜ່ເຊື່ອມຊຶມ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ຂອງພັກ ສະໄໝທີ XI 

*****************

       ກະຊວງຍຸຕິທຳ ຈັດກອງປະຊຸມເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານສູນກາງພັກ ຄັ້ງທີ 8 ສະໄໝທີ XI ຂຶ້ນໃນຕອນເຊົ້າວັນທີ 3 ກໍລະກົດ 2024 ພາຍໃຕ້ການເປັນປະທານຂອງ ສະຫາຍ ໄພວີ ສີບົວລິພາ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງຍຸຕິທຳ; ເຂົ້າຮ່ວມມີ ຮອງເລຂາຄະນະບໍລິຫານງານພັກກະຊວງ, ບັນດາສະຫາຍກຳມະການຄະນະບໍລິຫານງານພັກກະຊວງ, ຄະນະພັກຮາກຖານ, ຄະນະໜ່ວຍພັກ, ຄະນະກົມ, ຄະນະພແນກ ເຂົ້າຮ່ວມຢ່າງພ້ອມພຽງ.

       ຈຸດປະສົງ ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ຂອງກະຊວງຍຸຕິທຳ ໄດ້ຮັບຮູ້, ເຂົ້າໃຈ ເປັນເອກະພາບ, ກຳແໜ້ນເລິກເຊິ່ງ ແລະ ມີສະຕິຕື່ນຕົວສູງຂຶ້ນກວ່າເກົ່າ ໃນການຈັດຕັ້ງປະຕິບັດມະຕິດັ່ງກ່າວ, ແນໃສ່ເຮັດໃຫ້ມະຕິກອງປະຊຸມຄົບຄະນະບໍລິຫານສູນກາງພັກ ຄັ້ງທີ 8 ສະໄໝທີ XI ໄດ້ຮັບການຈັດຕັ້ງປະຕິບັດຢ່າງຖືກຕ້ອງ, ຄົບຖ້ວນ, ເຂັ້ມງວດ ແລະ ເປັນເອກະພາບໃນທົ່ວພັກ; ນອກນັ້ນ, ກໍເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ກຳໄດ້ຫຼັກການ, ລະບຽບການ ກ່ຽວກັບການຄຸ້ມຄອງ, ຕິດຕາມກວດກາ ວຽກງານຫັນເປັນໜ່ວຍວິຊາການເປັນເຈົ້າຕົນເອງ ແລະ ວຽກງານພາລະກອນ ເພື່ອເຮັດໃຫ້ວຽກງານດັ່ງກ່າວດຳເນີນໄປຢ່າງຖືກຕ້ອງ, ເປັນລະບົບ, ມີຄວາມເປັນເອກະພາບ, ມີປະສິດທິຜົນ ແນໃສ່ເຮັດໃຫ້ຫົວໜ່ວຍວິຊາການມີຄວາມເປັນເຈົ້າຕົນເອງ, ສົ່ງເສີມ, ຍົກສູງຄວາມຮັບຜິດຊອບ ແລະ ພັດທະນາໃຫ້ມີຄວາມຍືນຍົງ, ສາມາດໃຫ້ການບໍລິການດ້ານວິຊາການ ຢ່າງມີຄຸນນະພາບ ແລະ ແນໃສ່ຮັບປະກັນໃຫ້ພາລະກອນ ໄດ້ຮັບການຄຸ້ມຄອງ ແລະ ພັດທະນາໃຫ້ມີຄຸນນະພາບ ແລະ ມືອາຊີບ ປະກອບສ່ວນເຂົ້າໃນການພັດທະນາເສດຖະກິດ-ສັວຄົມ ຂອງຊາດ. ຊຶ່ງເອກະສານທີ່ນຳມາເຜີຍແຜ່ໃນຄັ້ງນີ້ປະກອບມີ ມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 8 ສະໄໝທີ XI; ດຳລັດ ສະບັບເລກທີ 282/ລບ ວ່າດ້ວຍການຫັນຫົວໜ່ວຍວິຊາການເປັນເຈົ້າຕົນເອງ ແລະ ດຳລັດ ສະບັບເລກທີ 283/ລບ ວ່າດ້ວຍພາລະກອນ.

       ໃນກອງປະຊຸມ ສະຫາຍ ໄພວີ ສີບົວລິພາ ໄດ້ໃຫ້ກຽດເຜີຍແຜ່ມະຕິກອງປະຊຸມຄົບຄະນະບໍລິຫານສູນກາງພັກ ຄັ້ງທີ 8 ສະໄໝທີ XI ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ; ການປະຕິຮູບລັດວິສາຫະກິດ, ການຕີລາຄາກ່ຽວກັບການຍົກສູງຄຸນນະພາບການດຳນີນຄະດີ ຕາມຂະບວນຍຸຕິທຳ ຕາມມະຕິເລກທີ 112/ກມສພ, ລົງວັນທີ 2 ມິຖຸນາ 2020 ຂອງກົມການເມືອງສູນກາງພັກ ແລະ ບັນຫາອື່ນໆທີ່ສຳຄັນ. ຈາກນັ້ນ, ສະຫາຍ ບຸນທາ ຊົງເຢີທ່າວ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງຍຸຕິທຳ ກໍໄດ້ໃຫ້ກຽດເຜີຍແຜ່ ດຳລັດ ສະບັບເລກທີ 282/ລບ ວ່າດ້ວຍການຫັນຫົວໜ່ວຍວິຊາການເປັນເຈົ້າຕົນເອງ ແລະ ດຳລັດ ສະບັບເລກທີ 283/ລບ ວ່າດ້ວຍພາລະກອນ ຕື່ມອີກ.