Submitted by wickyboubphalyvanh on
ໃນຕອນເຊົ້າຂອງວັນທີ 7 ມິຖຸນາ 2018 ພະແນກຍຸຕິທໍາແຂວງ ໄດ້ຈັດພິທີປິດການຮຽນ - ການສອນກົດໝາຍຊັ້ນຕົ້ນ ຊຸດທີ VII ປະຈຳປີ 2018 ຢູ່ທີ່ບ້ານ ປາກອູ, ເມືອງ ປາກອູ, ແຂວງ ຫຼວງພະບາງ ໂດຍການເປັນປະທານຂອງທ່ານ ອຸຕິ່ງ ພັນດາລັກ ຮອງເລຂາພັກເມືອງ ຮອງເຈົ້າເມືອງ ເມືອງ ປາກອູ ເຂົ້າຮ່ວມ ມີທ່ານ ຄອນສີ ຄອນຈະເລີນ ຮອງຫົວໜ້າພະແນກຍຸຕິທໍາແຂວງ ຫຼວງພະບາງ, ມີຫົວໜ້າຫ້ອງການຍຸຕິທຳເມືອງ, ທ່ານຜູ້ຕາງໜ້າຈາກຫ້ອງການອ້ອມຂ້າງເມືອງ ແລະ ນັກສຳມະນາກອນ ເຂົ້າຮ່ວມທັງໝົດ 106 ຄົນ, ຍິງ 26 ຄົນ.
ໃນພິທີທ່ານ ບຸນທ່ຽງ ປະສິດທິ ຫົວໜ້າຫ້ອງການຍຸຕິທຳເມືອງ ປາກອູ ໄດ້ສະຫຼຸບລາຍງານຜົນສຳເລັດການຈັດຕັ້ງປະຕິບັດຫຼັກສູດການຮຽນກົດໝາຍຊັ້ນຕົ້ນ 3 ເດືອນ ຊຸດທີ VII ປະຈຳປີ 2018 ຊຶ່ງການຮຽນ-ການສອນກົດໝາຍຊັ້ນຕົ້ນແມ່ນຈັດໃຫ້ສະເພາະພະນັກງານຫຼັກແຫຼ່ງຂອງຂະແໜງການອ້ອມຂ້າງເມືອງ, ເລຂາພັກບ້ານ, ນາຍບ້ານ ຂອງ ເມືອງປາກອູ, ການຮຽນ-ການສອນດັ່ງກ່າວ ແມ່ນໄດ້ນຳເອົາບາງກົດໝາຍໃນ 4 ຂົງເຂດມາສິດສອນ ຜ່ານການຮຽນກົດໝາຍຊັ້ນຕົ້ນເຮັດໃຫ້ນັກສຳມະນາກອນຮັບຮູ້, ເຂົ້າໃຈ ແລະ ເຄື່ອນໄຫວວຽກງານໃຫ້ຖືກຕ້ອງຕາມພາລະບົດບາດ, ສິດ ແລະ ໜ້າທີ່ຂອງຕົນ, ເປັນຕົ້ນ ການບໍລິຫານບ້ານເຂົ້າສູ່ກົດໝາຍ ແລະ ລະບຽບການເທື່ອລະກ້າວ, ແນ່ໃສ່ເຮັດໃຫ້ກຸ່ມບ້ານ ແລະ ຮາກຖານບ້ານມີການພັດທະນາ, ມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານ ແລະ ສາມາດກາຍເປັນບ້ານແບບຢ່າງໃນການປະຕິບັດກົດໝາຍ.
ພ້ອມດຽວກັນນັ້ນໃນພິທີ ກໍໄດ້ມີການມອບໃບປະກາສະນິຍະບັດໃຫ້ແກ່ຜູ້ສຳເລັດການຮຽນກົດໝາຍຊັ້ນຕົ້ນ ຈຳນວນ 42 ຄົນ, ຍິງ 7 ຄົນ ມອບໂດຍທ່ານ ອຸຕິ່ງ ພັນດາລັກ ຮອງເລຂາພັກເມືອງ ຮອງເຈົ້າເມືອງ ເມືອງ ປາກອູ.
ໃນຕອນທ້າຍຂອງພິທີ ທ່ານ ອຸຕິ່ງ ພັນດາລັກ ຮອງເລຂາພັກເມືອງ ຮອງເຈົ້າເມືອງ ເມືອງ ປາກອູ ກໍໄດ້ໃຫ້ກຽດໂອ້ລົມຕໍ່ພິທີ ຊຶ່ງທ່ານໄດ້ກ່າວຍ້ອງຍໍຊົມເຊີຍ ຄະນະຮັບຜິດຊອບ, ຄູ-ອາຈານ ແລະ ນັກສຳມະນາກອນ ທີ່ໄດ້ເອົາໃຈໃສ່ໃນການສິດສອນ ແລະ ຄົ້ນຄວ້າຮ່ຳຮຽນຈົນສຳເລັດ ແລະ ທ່ານຍັງໄດ້ເນັ້ນໜັກໃຫ້ນັກສຳມະນາກອນ ຈົ່ງນຳເອົາຄວາມຮູ້, ຄວາມສາມາດທີ່ໄດ້ຮຽນມາໄປຜັນຂະຫຍາຍເຂົ້າໃນໜ້າທີ່ວຽກງານໃນຂອບເຂດທີ່ຕົນເອງຮັບຜິດຊອບໃຫ້ເກີດຜົນປະໂຫຍດສູງສຸດ.
ຂຽນຂ່າວ: ວິລະກອນ ສີພົມມະຈັນ ປັບປຸງຂ່າວ: ອ່ອນຄຳ