Submitted by webmaster on
ໃນວັນທີ 16 ທັນວາ 2015 ນີ້, ຢູ່ທ່ີຫ້ອງປະຊຸມຊັ້ນ II ຂອງພະແນກຍຸຕິທຳແຂວງ ຫົວພັນ, ໄດ້ຈັດພິທີມອບບັດສະມາຊິກພັກສົມບູນໃຫ້ແກ່ສະຊິກພັກພະແນກຍຸຕິທຳແຂວງ ໂດຍເປັນກຽດເຂົ້າຮ່ວມຂອງ ສະຫາຍ ນາງ ແພງ ກັນຍາພິມ ຮອງເລຂາພັກແຂວງ, ເຈົ້າເມືອງໆຊຳເໜືອ; ສະຫາຍ ສົມພອນ ອິນຄະວິໄລ ເລຂາໜ່ວຍພັກ, ຮອງຫົວໜ້າພະແນກຍຸຕິທຳແຂວງ; ມີຜູ່ຕາງໜ້າມາຈາກຄະນະກວດກາພັກ-ລັດແຂວງ, ຄະນະຈັດຕັ້ງແຂວງ ແລະ ສະມາຊິກພັກທັງໝົດເຂົ້າຮ່ວມ 15 ສະຫາຍ, ຍິງ 4 ສະຫາຍ.
ໃນພິທີດັ່ງກ່າວ ສະຫາຍ ວຽງທອງ ແພງມະນີ ຮອງເລຂາໜ່ວຍພັກ, ຫົວໜ້າຫ້ອງການຄຸ້ມຄອງຍຸຕິທຳຮາກຖານ ໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 165/ຄປຈຂ ແລະ ສະບັບເລກທີ 373/ຄປຈຂ ວ່າດ້ວຍ ການອອກບັດ ແລະ ມອບບັດໃຫ້ສະມາຊິກພັກສົມບູນ, ຊຶ່ງມີສະມາຊິກພັກໄດ້ຮັບບັດທັງໝົດ 4 ສະຫາຍ, ຍິງ 1 ສະຫາຍ, ໃນການມອບບັດສະມາຊິກພັກສົມບູນຄັ້ງນີ້ ເປັນກຽດຂຶ້ນມອບບັດໂດຍ ສະຫາຍ ນາງ ແພງ ກັນຍາພິມ ຮອງເລຂາພັກແຂວງ, ເຈົ້າເມືອງໆຊຳເໜືອ. ການມອບບັດສະມາຊິກພັກສົມບູນ ກໍເພື່ອເປັນການຢັ້ງຢືນເຖິງຖານະຂອງສະມາຊິກພັກສົມບູນທີ່ມີມາດຖານຄົບຖ້ວນ, ເປັນຜູ່ທີ່ເຮັດຫຼ້ອນໜ້າທີ່, ມີຄຸນງາມຄວາມດີ, ມີຄວາມບໍລິສຸດສັດຊື່ຕໍ່ຊາດ ຕໍ່ປະຊາຊົນ ແລະ ຈົງຮັກພັກດີຕໍ່ອຸດົມການຂອງພັກ, ເປັນແບບຢ່າງທີ່ດີ, ເຄົາລົບ ແລະ ປະຕິບັດກົດລະບຽບຂອງພັກ, ກົດໝາຍ ຂອງລັດ.
ໃນຕອນທ້າຍຂອງພິທີ ສະຫາຍ ນາງ ແພງ ກັນຍາພິມ ຮອງເລຂາພັກແຂວງ, ເຈົ້າເມືອງໆຊຳເໜືອ ໄດ້ໃຫ້ກຽດໂອ້ລົມຕໍ່ສະມາຊິກພາຍໃນໜ່ວຍພັກພະແນກຍຸຕິທຳແຂວງ, ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານທີ່ຍາດມາໄດ້ໃນໄລຍະຜ່ານມາ ແລະ ສະມາຊິກພັກທຸກສະຫາຍຕ້ອງມີຄວາມຮັບຜິດຊອບ ບໍ່ໃຫ້ບັດຕົກເຮ່ຍເສັຍຫາຍ, ມີຄວາມຮັບຜິດຊອບຕໍ່ໜ້າທີ່ວຽກງານ ແລະ ສືບຕໍ່ຮັກສາມູນເຊື້ອຄວາມສາມັກຄີ, ຄວາມບຸກໜ້າບືນຕົວໃນວຽກງານວິຊາສະເພາະໃຫ້ສຳເລັດຜົນ. ສະມາຊິກທຸກສະຫາຍຕ້ອງມີຄວາມສາມັກຄີກັນ, ມີຄວາມຈິງໃຈໃຫ້ກັນ ເອົາການຕຳນິສົ່ງຂ່າວກໍ່ສ້າງເຊິ່ງກັນ ແລະ ກັນ ພ້ອມກັນກ້າວໜ້າ. ພ້ອມກັນເປັນເຈົ້າການເປັນເຈົ້າການໃນການປະກອບສ່ວນເຂົ້າວຽກງານວິຊາສະເພາະໃຫ້ເຂັ້ມແຂງ ແລະ ໜັກແໜ້ນເປັນແບບຢ່າງທີ່ດີໃຫ້ແກ່ສະມາພັກ ແລະ ມະຫາຊົນ.