Submitted by wickyboubphalyvanh on
ໃນວັນທີ 30 ທັນວາ 2019 ທີ່ຜ່ານມານີ້ ທາງພະແນກຍຸຕິທໍາແຂວງ ວຽງຈັນ ໄດ້ຈັດພິທີມອບ-ຮັບໜ້າທີ່ລະຫວ່າງ ສະຫາຍ ກອງສີ ອຸດົມ ກໍາມະການພັກແຂວງ ຫົວໜ້າພະແນກຍຸຕິທໍາແຂວງ ວຽງຈັນ ຜູ້ເກົ່າ ແລະ ສະຫາຍ ສີສະຫວາດ ແສງພະຈັນ ຜູ້ຮັກສາການຫົວໜ້າພະແນກຍຸຕິທໍາແຂວງ ວຽງຈັນ ຜູ້ໃໝ່ ໂດຍການເຂົ້າຮ່ວມຂອງສະຫາຍ ບຸນສອນ ເພັດລາວັນ ຄະນະປະຈໍາພັກແຂວງ, ຮອງເຈົ້າແຂວງ ວຽງຈັນ, ສະຫາຍ ບຸນທາ ຊົງເຢີທ່າວ ຄະນະພັກກະຊວງ ຫົວໜ້າກົມຈັດຕັ້ງພະນັກງານກະຊວງຍຸຕິທໍາ, ໃນນັ້ນໄດ້ເຊີນເອົາບັນດາພະແນກການທີ່ກ່ຽວຂ້ອງກໍຄື: ສານປະຊົນແຂວງວຽງຈັນ, ສະພາປະຊາຊົນແຂວງ ວຽງຈັນ, ຈັດຕັ້ງແຂວງ, ໄອຍະການແຂວງ, ພ້ອມດ້ວຍພະນັກງານພາຍໃນພະແນກຍຸຕິທໍາແຂວງ ເຂົ້າຮ່ວມຈໍານວນ 56 ທ່ານ ຍິງ 16 ທ່ານ.
ໃນພິທີສະຫາຍ ທອງດໍາ ສີວິໄລລັກ ຮອງຫົວໜ້າຄະນະຈັດຕັ້ງແຂວງ ວຽງຈັນ ໄດ້ຂື້ນຜ່ານມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 235/ຄລ ພສ ລົງວັນທີ 3 ກຸມພາ 2019 ວ່າດ້ວຍການອະນຸມັດໃຫ້ພະນັກງານພັກການ-ຮັບອຸດໜູນບໍານານ, ຂໍ້ຕົກລົງສະບັບເລກທີ 013, 296/ຄປພ.ວຈ, ລົງວັນທີ 12 ທັນວາ 2019 ວ່າດ້ວຍ ຍົກຍ້າຍ ແລະ ບົ່ງຕົວແຕ່ງຕັ້ງຮັກສາການເລຂາໜ່ວຍພັກພະແນກຍຸຕິທໍາແຂວງ ວຽງຈັນ ໃນນີ້ແຕ່ງຕັ້ງສະຫາຍ ສີສະຫວາດ ແສງພະຈັນ ຮັກສາການເລຂາໜ່ວຍພັກພະແນກຍຸຕິທໍາແຂວງ ແລະ ຜ່ານຂໍ້ຕົກລົງຂອງທ່ານເຈົ້າແຂວງ ວຽງຈັນ ສະບັບເລກທີ 2404/ຈຂ.ວຈ ລົງວັນທີ 12 ທັນວາ 2019 ວ່າດ້ວຍການແຕ່ງຕັ້ງຜູ້ວ່າການຫົວໜ້າພະແນກຍຸຕິທໍາແຂວງ ວຽງຈັນ ເພື່ອແນໃສ່ເຮັດໃຫ້ການຈັດຕັ້ງມີຄວາມເຂັ້ມແຂງໃນການຊີ້ນຳ-ບັນຊາຢູ່ພະແນກຍຸຕິທໍາ ສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ແລະ ຖືກຕ້ອງຕາມລະບຽບຫຼັກການ ໃນນີ້ໄດ້ຍົກຍ້າຍ ແລະ ແຕ່ງຕັ້ງສະຫາຍ ສີສະຫວາດ ແສງພະຈັນ ຮອງປະທານກວດກາພັກແຂວງ ວຽງຈັນ ມາເປັນຜູ້ຮັກສາການຫົວໜ້າພະແນກຍຸຕິທໍາຜູ້ໃໝ່ ເນື່ອງຈາກສະຫາຍ ກອງສີ ອຸດົມ ກໍາມະການພັກແຂວງ ຫົວໜ້າພະແນກຍຸຕິທໍາຜູ້ເກົ່າ ໄດ້ພັກຜ່ອນຮັບອຸດໜູນບໍານານໃນພິທີດັ່ງກ່າວໄດ້ເຊັນບົດບັນທຶກມອບ-ຮັບໜ້າທີ່ຢ່າງສົມກຽດ.
ຕອນທ້າຍຍັງໄດ້ຮັບຟັງການໂອ້ລົມຈາກສະຫາຍ ບຸນສອນ ເພັດລາວັນ ຄະປະຈໍາພັກແຂວງຮອງເຈົ້າແຂວງ ວຽງຈັນ ເຊີ່ງສະຫາຍໄດ້ຍົກໃຫ້ເຫັນຄວາມສຳຄັນໃນການປັບປຸງການຈັດຕັ້ງຄັ້ງນີ້ ແມ່ນຍ້ອນຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ມັນແມ່ນກົດເກນພາວະວິໄສ ໃນການຊັບຊ້ອນໝູນວຽນຂອງພະນັກງານ ເພື່ອເຮັດໃຫ້ພະແນກຍຸຕິທໍາມີຄວາມເຂັ້ມແຂງ ຈາກນັ້ນກໍ່ໄດ້ຮຽກຮ້ອງໃຫ້ຜູ້ທີ່ໄປຮັບໜ້າທີ່ໃໝ່ ຈົ່ງເອົາໃຈໃສ່ເຕົ້າໂຮມຄວາມສາມັກຄີພາຍໃນໝູ່ຄະນະໃຫ້ເປັນປຶກແຜ່ນ, ສ້າງແບບແຜນວິເຮັດວຽກ, ແບບແຜນວິທີນຳພາ ເພື່ອຊີ້ນຳໆພາພະນັກງານ ເຮັດຽກງານວິຊາສະເພາະຂອງຕົນໃຫ້ໄດ້ຮັບຜົນສຳເລັດຢ່າງຈົບງາມ ແລະ ມີປະສິດທິຜົນດີຂື້ນກວ່າເກົ່າ.
ຂຽນໂດຍ: ທ້າວ ເຂັມທອງ ບຸບຜາລີວັນ