ໃນວັນທີ 25 ກັນຍາ 2019 ທີ່ຜ່ານມາ ພະແນກຍຸຕິທໍາແຂວງ ວຽງຈັນ ໄດ້ຈັດພິທີປິດຊຸດຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ IX ປະຈໍາປີ 2019 ຂຶ້ນ ຢູ່ຫ້ອງປະຊຸມສະພາປະຊາຊົນແຂວງວຽງຈັນ. ໃຫ້ກຽດເປັນປະທານຂອງ ທ່ານ ຄໍາພັນ ສິດທິດໍາພາ ກຳມະການສູນກາງພັກ ເຈົ້າແຂວງ ວຽງຈັນ, ມີຫົວໜ້າພະແນກຍຸຕິທຳແຂວງ ວຽງຈັນ, ຮອງຫົວໜ້າພະແນກ, ຄະນະຮັບຜິດຊອບຊຸດຝຶກອົບຮົມ, ແຂກຖືກເຊີນ ພ້ອມດ້ວຍ ຄູ - ອາຈານ ແລະ ນັກຝຶກອົບຮົມເຂົ້າຮ່ວມທັງໝົດຈໍານວນ 80 ທ່ານ, ຍິງ 12 ທ່ານ.

ໃນພິທີທ່ານ ກອງສີ ອຸດົມ ກໍາມະການພັກແຂວງ ຫົວໜ້າພະແນກຍຸຕິທໍາແຂວງ ວຽງຈັນ ກໍໄດ້ຂຶ້ນຜ່ານບົດສະຫຼຸບຜົນສຳເລັດຊຸດຝຶກອົບຮົມກົດໝາຍໄລຍະສັ້ນ 45 ວັນ, ຊຸດທີ IX ຊຸດຝຶກອົບຮົມ ແມ່ນເລີ່ມ ຮຽນແຕ່ວັນທີ 23 ກໍລະກົດ 2019 ເປັນຕົ້ນມາຫຼັກສູດການຮຽນ -ການສອນ ຊຸດນີ້ມີທັງໝົດ 32 ວິຊາ, ມີ 22.5 ໜ່ວຍກິດ, ມີ 360 ຊົ່ວໂມງ ກຳນົດເວລາ 45 ວັນ ຊຶ່ງການຮຽນແມ່ນໄດ້ດຳເນີນມາຈົົນເຖິງວັນທີ 24 ກັນຍາ 2019 ສໍາເລັດ, ຜ່ານການເຄື່ອນໄຫວວຽກງານດັ່ງກ່າວເລືອກໄດ້ພະນັກງານໃນຄະນະຮັບຜິດຊອບ, ຄູອາຈານ ແລະ ນັກຝຶກອົບຮົມທີ່ມີຜົນງານເພື່ອສະເໜີຍ້ອງຍໍຂັ້ນແຂວງຈໍານວນ 44 ທ່ານ, ຍິງ 8 ທ່ານ, ຍ້ອງຍໍຂັ້ນຫົວໜ້າພະແນກຈໍານວນ 24 ທ່ານ, ຍິງ 7 ທ່ານ. ໃຫ້ກຽດມອບໂດຍ ທ່ານ ກອງສີ ອຸດົມ ກໍາມະການພັກແຂວງ, ຫົວໜ້າພະແນກຍຸຕິທໍາແຂວງວຽງຈັນ ແລະ ໄດ້ຮັບໃບກຽດຕິຄຸນຂັ້ນພະແນກຈໍານວນ 15 ພາກສ່ວນ ໃຫ້ກຽດມອບໂດຍ ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເຈົ້າແຂວງວຽງຈັນ.
ໃນຕອນທ້າຍຂອງພິທີ ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເຈົ້າແຂວງ ວຽງຈັນ ກໍໄດ້ໃຫ້ກຽດໂອ້ລົມຕໍ່ພິທີ ຊຶ່ງທ່ານໄດ້ກ່າວຍ້ອງຍໍຊົມເຊີຍ ຄະນະຮັບຜິດຊອບ, ຄູ- ອາຈານ ແລະ ນັກຝຶກອົບຮົມ ທີ່ໄດ້ເອົາໃຈໃສ່ໃນການສິດສອນ ແລະ ຄົ້ນຄວ້າຮ່ຳຮຽນຈົນສຳເລັດ ແລະ ທ່ານຍັງໄດ້ເນັ້ນໜັກໃຫ້ນັກຝຶກອົບຮົມ ຈົ່ງນຳເອົາຄວາມຮູ້, ຄວາມສາມາດທີ່ໄດ້ຮຽນມາໄປຜັນຂະຫຍາຍເຂົ້າໃນໜ້າທີ່ວຽກງານໃນຂອບເຂດທີ່ຕົນເອງຮັບຜິດຊອບໃຫ້ເກີດຜົນປະໂຫຍດສູງສຸດ.
ຂຽນຂ່າວ ແລະ ຖ່າຍພາບ: ເຂັມທອງ ບຸບຜາລີວັນ