Submitted by atsany on
ພິທີດັ່ງກ່າວໄດ້ຈັດຂຶ້ນໃນຕອນເຊົ້າຂອງວັນທີ 22 ມິຖຸນາ 2018 ທີ່ຜ່ານມາ ຢູ່ໂຮງຮຽນປະຖົມສົມບູນເກົ້າຍອດ ໂດຍພາຍໃຕ້ການເປັນປະທານຂອງ ທ່ານ ບຸນຄຳ ວິຈິດລາສີ ຮອງເລຂາພັກເມືອງ, ຮອງເຈົ້າເມືອງ ສີສັດຕະນາກ, ເປັນກຽດເຂົ້າຮ່ວມຂອງທ່ານ ບຸນເພັງ ສີນະວົງພອນ ຫົວໜ້າພະແນກຍຸຕິທໍານະຄອນຫຼວງວຽງຈັນ, ມີຕາງໜ້າມາຈາກອົງການປົກຄອງບ້ານ, ຄະນະຮັບຜິດຊອບ, ຄູ-ອາຈານ, ແຂກຖືກເຊີນ ຕະຫຼອດຮອດນັກສໍາມະນາກອນເຂົ້າຮ່ວມຢ່າງພ້ອມພຽງ.
ໃນພິທີໄດ້ຮັບຟັງການລາຍງານສະພາບການຮຽນ-ການສອນກົດໝາຍຊັ້ນຕົ້ນໄລຍະ 3 ເດືອນ ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຫຍຸ້ງຍາກໃນການຮຽນ-ການສອນກົດໝາຍຊັ້ນຕົ້ນໃນໄລຍະຜ່ານມາ. ຊຶ່ງມີນັກສໍາມະນາກອນສຳເລັດການຮຽນກົດໝາຍຊັ້ນຕົ້ນທັງໝົດຈຳນວນ 43 ຄົນ, ຍິງ14 ຄົນ, ສາມາດຈັດປະເພດໄດ້ດັ່ງນີ້ ດີເດັ່ນ 20 ທ່ານ, ຍິງ 10 ທ່ານ, ດີ 15 ທ່ານ, ຍິງ 04 ທ່ານ.
ຕອນທ້າຍຂອງພິທີ ທ່ານ ບຸນຄໍາ ວິຈິດລາສີ ຮອງເລຂາພັກເມືອງ, ຮອງເຈົ້າເມືອງ ສີສັດຕະນາກກໍໄດ້ໃຫ້ກຽດມອບໃບຢັ້ງຢືນໃຫ້ນັກສຳມະນາກອນ ແລະ ໃບຍ້ອງຍໍໃຫ້ຄູ-ອາຈານ ພ້ອມນັ້ນ ທ່ານຍັງໄດ້ໂອ້ລົມຕໍ່ຜູ້ສຳເລັດການຮຽນກົດໝາຍຊັ້ນຕົ້ນໃນຄັ້ງນີ້ຈົ່ງພ້ອມກັນນຳເອົາຄວາມຮູ້, ຄວາມສາມາດທີ່ໄດ້ຮຽນມາໄປນຳໃຊ້ເຂົ້າໃນວຽກງານ ເພື່ອໃຫ້ເກີດຜົນປະໂຫຍດສູງສຸດແກ່ສັງຄົມ.
ຂຽນຂ່າວ, ພາບ: ປາວີຄຳ ເພັດທະລາກຸນ