Submitted by wickyboubphalyvanh on
ເພື່ອເປັນການຈັດຕັ້ງຜັນຂະຫຍາຍບົດບາດໃນການຄຸ້ມຄອງລັດ ແລະ ຄຸ້ມຄອງສັງຄົມໃຫ້ໄປຕາມທິດສ້າງໃຫ້ເປັນລັດ ສປປ ລາວ ກາຍເປັນລັດທີ່ປົກຄອງດ້ວຍກົດໝາຍ ແລະ ເພື່ອແນ່ໃສ່ປົກປັກຮັກສາສິດຜົນປະໂຫຍດຂອງປະຊາຊົນລາວບັນດາເຜົາ, ການໂຄສະນາເຜີຍແຜ່ກົດໝາຍຜ່ານສື່ມວນຊົນ ແມ່ນຮູບການໜຶ່ງທີ່ຈະເຮັດໃຫ້ປະຊາຊົນມີຄວາມຮັບຮູ້ ແລະ ເຂົ້າໃຈໄດ້ໄວ ແລະ ລະອຽດກວ່າ ໂດຍສະເພາະແມ່ນການສະແດງລະຄອນສັ້ນທີ່ກ່ຽວພັນກັບກົດໝາຍ ສະນັ້ນ, ກົມໂຄສະນາເຜີຍແຜ່ກົດໝາຍ ກະຊວງຍຸຕິທຳ ຈຶ່ງໄດ້ລົງເຄື່ອນໄຫວ ແລະ ຈັດກິດຈະກຳຄັດເລືອກເອົານັກສະແດງອາສາສະໝັກຂຶ້ນໃນຕອນເຊົ້າຂອງວັນທີ 05 ມັງກອນ 2018 ຢູ່ສະຖາບັນຍຸຕິທຳແຫ່ງຊາດ ໂດຍການເຂົ້າຮ່ວມຂອງ ທ່ານ ບຸນລ້ອມ ດວງມາລາ ຮອງຫົວໜ້າກົມໂຄສະນາເຜີຍແຜ່ກົດໝາຍ, ທ່ານ ສີວິໄຊ ສານພອນ ຮອງຫົວໜ້າສະຖາບັນຍຸຕິທຳແຫ່ງຊາດ ພ້ອມດ້ວຍຄະນະ, ມີບັນດາຫົວໜ້າພະແນກ-ຮອງພະແນກ, ວິຊາການ ແລະ ນັກສຶກສາຂອງສະຖາບັນຍຸຕິທຳເຂົ້າຮ່ວມຢ່າງພ້ອມພຽງ.
ທ່ານ ບຸນລ້ອມ ດວງມາລາ ຮອງຫົວໜ້າກົມໂຄສະນາເຜີຍກົດໝາຍ ໄດ້ຂຶ້ນກ່າວເປີດງານ ພ້ອມທັງກ່າວຈຸດປະສົງຂອງການລົງຄັດເລືອກໃນຄັ້ງນີ້ ກໍແມ່ນເພື່ອຊອກຫານັກສຶກສາກົດໝາຍຂອງສະຖາບັນຍຸຕິທຳແຫ່ງຊາດຜູ້ທີ່ມີໃຈມັກ, ຮັກ ແລະ ມີພອນສະຫວັນໃນການສະແດງ ເປັນຕົ້ນ ດ້ານການເວົ້າ, ການສະແດງລະຄອນ, ການສະແດງທັກສະດ້ານຕ່າງໆ ເພື່ອຈະປະກອບສ່ວນໃນການສະແດງລະຄອນສັ້ນ ແລະ ສະປອດໂຄສະນາກ່ຽວກັບກົດໝາຍ ໃຫ້ແກ່ກະຊວງຍຸຕິທຳ ເພື່ອປະກອບສ່ວນເຂົ້າໃນວຽກງານໂຄສະນາເຜີຍແຜ່ກົດໝາຍ ໂດຍສະເພາະການໂຄສະນາຜ່ານຊື່ມວນຊົນ.
ກິດຈະກຳໃນຄັ້ງນີ້ ມີນັກສຶກສາກົດໝາຍເຂົ້າຮ່ວມຄັດເລືອກທັງໝົດ 92 ຄົນ, ຍິງ 43 ຄົນ, ຜ່ານການສະແດງຂອງນັກສຶກສາ ບໍ່ວ່າຈະເປັນການສະແດງລະຄອນສັ້ນ, ຮ້ອງເພັງ ສາມາດຄັດເລືອກນັກສະແດງອາສາສະໝັກໄດ້ 32 ຄົນ, ຍິງ 19 ຄົນ, ການຄັດເລືອກນັກສະແດງໃນຄັ້ງນີ້ແມ່ນດຳເນີນໄປຢ່າງມີບັນຍາກາດຟົດຟຶ້ນ ແລະ ປະສົບຜົນສຳເລັດຢ່າງຈົບງາມ.
ຂ່າວ: ປາວີຄຳ ເພັດທະລາກຸນ
ພາບ: ສົມຫວັງ ບົວລະພັນ