Submitted by xaiyphimphone on
ເພື່ອເປັນການສະເຫຼີມສະຫອງວັນເດັກນ້ອຍສາກົນ ແລະ ເຕົ້າໂຮມຄວາມສາມັກຄີລະຫວ່າງພໍ່ແມ່, ລູກ, ຫຼານນ້ອຍ ກໍຄືພະນັກງານທັງໝົດຢູ່ກະຊວງຍຸຕິທໍາ ໃຫ້ເປັນຂະບວນການຟົດຟື້ນ ແລະ ຍົກໃຫ້ເຫັນ ເຖິງຄວາມໝາຍຄວາມສໍາຄັນຂອງວັນດັ່ງກ່າວ ໃນຕອນເຊົ້າຂອງວັນທີ 31 ພຶດສະພາ 2017 ຢູ່ທີ່ກະຊວງຍຸຕິທຳ ໄດ້ຈັດພິທີສະເຫຼີມສະຫອງວັນທີ 1 ມີຖຸນາ (ວັນເດັກ ນ້ອຍສາກົນ) ປະຈໍາປີ 2017 ຄົບຮອບ 69 ປີ ຂຶ້ນໂດຍໃຫ້ກຽດເຂົ້າຮ່ວມຂອງ ທ່ານ ປອ ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ, ມີບັນດາຄະນະພັກ, ຄະນະນຳ, ພະນັກງານ-ລັດຖະກອນຂອງກະຊວງຍຸຕິທຳ ຕະຫຼອດຮອດພໍ່ແມ່ຜູ້ປົກຄອງ ພ້ອມດ້ວຍລູກຫຼານ ເຂົ້າຮ່ວມຢ່າງເປັນຂະບວນການຟົດຟື້ນ.
ໃນພິທີ ທ່ານ ນາງ ດວງມະນີ ລາວມາວ ປະທານສະຫະພັນແມ່ຍິງກະຊວງຍຸຕິທໍາ ໄດ້ກ່າວເຖິງປະຫວັດຄວາມເປັນມາຂອງວັນເດັກນ້ອຍສາກົນ ຊຶ່ງທ່ານໄດ້ຍົກໃຫ້ເຫັນສິດ ແລະ ຜົນປະໂຫຍດຂອງເດັກໃນ ດ້ານຕ່າງໆ ແນ່ໃສ່ເຮັດໃຫ້ເດັກ ມີຄວາມສົມບູນທາງດ້ານຮ່າງກາຍ, ຈິດໃຈ ແລະ ມັນສະໝອງ ກາຍເປັນຜູ້ສືບທອດທີ່ດີຂອງຊາດ.
ການຈັດກິດຈະກຳສະເຫຼີມສະຫອງວັນເດັກນ້ອຍສາກົນ ໃນຄັ້ງນີ້ ປະກອບດ້ວຍກິດຈະກໍາຫຼາຍຢ່າງ ເພື່ອສົ່ງເສີມພອນສະຫວັນຂອງເດັກ, ຄວາມສາມາດ ແລະ ຄວາມກ້າຫານຂອງເດັກ ເປັນຕົ້ນ ການຕອບ ຄຳຖາມ, ການຮ້ອງເພັງ ສະແດງສິລະປະ ເພື່ອແລກເອົາຂອງຂັວນ ຫື ລາງວັນ.
ຂຽນຂ່າວ: ໄຊຍະສິດ ຖ່າຍພາບໂດຍ: ສົມຫັວງ
ນັກຂ່າວ ກົມໂຄສະນາເຜີຍແຜ່ກົດໝາຍ