ພິທີປາຖະກະຖາວັນຖະທໍາມະນູນແຫ່ງຊາດຄົບຮອບ 30 ປີ ແລະ ວັນຍຶດອໍານາດຄົບຮອບ 76 ປີ

Primary tabs

          ໃນຕອນເຊົ້າຂອງວັນທີ 19 ສິງຫາ 2021 ຜ່ານມານີ້ ເມືອງ ຮົ່ມ ໄດ້ຈັດພິທີປາຖະກະຖາວັນລັດຖະທໍາມະນູນແຫ່ງຊາດຄົບຮອບ 30 ປີ ( 15 ສິງຫາ 1991-  15 ສິງຫາ 2021 ) ແລະ ວັນຍຶດອໍານາດ ວັນທີ 23 ສິງຫາ ຄົບຮອບ 76 ປີ ຢູ່ທີ່ສະໂມສອນ ເມືອງ ຮົ່ມ ແຂວງ ໄຊສົມບູນ ໂດຍການເປັນປະທານຂອງ ທ່ານ ຄໍາເພັດ ດວງມາລາ ກໍາມະການພັກແຂວງ, ເລຂາພັກເມືອງ, ເຈົ້າເມືອງ ຮົ່ມ ແລະ ໃຫ້ກຽດເຂົ້າຮ່ວມໂດຍ ທ່ານ ອິນຕອງ ໂຄດປັນຍາ ກໍາມະການພັກແຂວງ, ຫົວໜ້າພະແນກຍຸຕິທໍາແຂວງ ໄຊສົມບູນ, ມີບັນດາຫົວໜ້າຄະນະຫ້ອງການ, ກົມກອງ, ໂຮງຮຽນ, ໂຮງໝໍ,ພະນັກງານລັດຖະກອນອ້ອມຂ້າງເມືອງ ແລະ ນາຍບ້ານ 3 ບ້ານ ເທດສະບານເຂົ້າຮ່ວມຮັບຟັງທັງໝົດ 66 ທ່ານ, ຍິງ 4 ທ່ານ.
อาจเป็นรูปภาพของ 1 คน และสถานที่ในร่ม
          ທ່ານ ອິນຕອງ ໂຄດປັນຍາ ກໍາມະການພັກແຂວງ, ຫົວໜ້າພະແນກຍຸຕິທໍາແຂວງໄດ້ໃຫ້ກຽດປາຖະກະຖາເລົ່າມູນເຊື້ອວັນສ້າງຕັ້ງລັດຖະທໍາມະນູນຄົບຮອບ 30 ປີ, ຊື່ງທ່ານໄດ້ຫວນຄືນປະຫວັດການກໍາເນີດ, ຄວາມໝາຍຄວາມສໍາຄັນຂອງວັນລັດຖະທໍາມະນູນແຫ່ງຊາດ ຊື່ງວັນລັດຖະທໍາມະນູນຖືກຮັບຮອງ ແລະ ປະກາດໃຊ້ໃນວັນທີ່ ວັນທີ 15 ສິງຫາ 1991 ທີເປັນກົດໝາຍພື້ນຖານຂອງຊາດ (ກົດໝາຍແມ່) ນໍາໃຊ້ເຂົ້າໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍລະບຽບກົດໝາຍ ແນໃສ່ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ ເຮັດໃຫ້ການພັດທະນາກົດໝາຍຂອງປະເທດໃຫ້ເປັນລະບົບຄົບຊຸດ ແລະ ສ້າງຄວາມເຂັ້ມແຂງເທື່ອລະກ້າວ ເພື່ອຮັບປະກັນການປົກປັກຮັກສາ ແລະ ສ້າງສາພັດທະນາປະເທດຊາດຂື້ນສູ່ສັງຄົມນີຍົມ.
          ຈາກນັ້ນ, ທ່ານ ຄໍາເພັດ ດວງມາລາ ກໍາມະການພັກແຂວງ, ເລຂາພັກເມືອງ, ເຈົ້າເມືອງ ຮົ່ມ ໄດ້ເລົ່າຄືນປະຫວັດວັນຍຶດອໍານາດ 23 ສິງຫາ 1945 ໃນຕົ້ນສະຕະວັດທີ່ 20 ບັນດາປະເທດຈັກກະພັດໄດ້ຮຸກຮານ ແລະ ຍຶດຄອງບັນດາປະເທດທີ່ເປັນຫົວເມືອງຂື້ນ ໜື່ງໃນນັ້ນແມ່ນປະເທດລາວ ກໍ່ຕົກເປັນຫົວເມືອງຂື້ນຂອງຝຣັ່ງ ເຮັດໃຫ້ປະຊາຊົນລາວບັນດາເຜົ່າຖືກກົດຂີ່ຂູດຮິດຢ່າງແສນສາຫັດ ຕໍ່ມາປີ 1930 ພັກຄອມມູນິດອິນດູຈີນໄດ້ກໍາເນິດເກີດຂື້ນ ພາຍໃຕ້ການນໍາພາຂອງພັກ ຕໍ່ການປະຕິວັດດັ່ງກ່າວ ພັກໄດ້ນໍາພາປະຊາຊົນລາວລຸກຮື້ຂື້ນຍຶດອໍານາດການປົກຄອງໃນທົ່ວປະເທດ 23 ສິງຫາ 1945 ແລະ ລຸກຮື້ຂື້ນໂຄ້ນລົ້ມອໍານາດການປົກຄອງແບບເກົ່າ, ສ້າງຕັ້ງອໍານາດການປົກຄອງການປະຕິວັດຂອງຕົນຂື້ນຢູ່ຫຼາຍທ້ອງຖີ່ນ ແລະ ຈັດຕັ້ງບັນດາກໍາລັງປະກອບອາວຸດປ້ອງກັນຕົວ ຢູ່ໃນຕົວເມືອງໃຫ່ຍໆຕ່າງໆເຊັ່ນ: ຢູ່ເມືອງ ວຽງຈັນ, ທ່າແຂກ, ສະຫວັນນະເຂດ, ຊຽງຂວາງ, ຊໍາເໜືອ ແລະ ຫຼວງພະບາງ. ຈາກນັ້ນ ລັດຖະບານລາວອິດສະຫຼະ ກໍ່ໄດ້ຮັບການສ້າງຕັ້ງຂື້ນ ແລະ ປະກາດຄວາມເປັນເອກະລາດຂອງຊາດຂື້ນໃນວັນທີ 12 ຕຸລາ 1945 ນັ້ນຄືໄຊຊະນະຄັ້ງປະຫວັດສາດຂອງຊາດລາວ ຊາວນະຄອນຫລວງວຽງຈັນ ຈໍານວນ 2 ໜື່ນກວ່າຄົນ ໄດ້ໂຮມຊຸມນຸມມິດຕິ່ງ ເພື່ອຕ້ອນຮັບອໍານາດການປົກຄອງປະຕິວັດແຕ່ລະແຂວງ, ນະຄອນຫລວງ ລົງຮອດຂັ້ນຮາກຖານໄດ້ຮັບການສ້າງຕັ້ງຂື້ນ ຈົນໄດ້ຮັບໄຊຊະນະ ວັນທີ 2 ທັນວາ 1975.
          ໂອກາດດັ່ງກ່າວ ພະແນກຍຸຕິທໍາແຂວງ ໄດ້ມອບປື້ມກົດໝາຍ 4 ຂົງເຂດ ຈໍານວນ 1 ຊຸດ ມອບໃຫ້ອົງການປົກຄອງເມືອງ ຮົ່ມ ເພື່ອເປັນບ່ອນສຶກສາ-ຮໍ່າຮຽນ, ຄົ້ນຄວ້າ ແລະ ເປັນບ່ອນອີງໃນການຈັດຕັ້ງປະຕິບັດລະບຽບກົດໝາຍໃຫ້ດີຂື້ນເທື່ອລະກ້າວ.
ພາບ-ຂ່າວ: ພະແນກຍຸຕິທຳແຂວງໄຊສົມບູນ
ປະເພດຂ່າວ: