ພະແນກຍຸຕິທໍາແຂວງ ໄຊຍະບູລີ ປາຖະກະຖາ ມູນເຊື້ອວັນສ້າງຕັ້ງ ອົງການກວດກາພັກ-ລັດ ຄົບຮອບ 39 ປີ

Primary tabs

          ໃນຕອນເຊົ້າວັນທີ 29 ມີນາ 2021 ຜ່ານມາ ພະແນກຍຸຕິທໍາແຂວງ ໄຊຍະບູລີ ໄດ້ຈັດຕັ້ງພິທີປາຖະກະຖາ ມູນເຊື້ອວັນສ້າງຕັ້ງ ອົງການກວດກາພັກ-ລັດ ຄົບຮອບ 39 ປີ (16 ກຸມພາ 1982 - 16 ກຸມພາ 2021) ໂດຍການເປັນປະທານ ຂອງ ສະຫາຍ ບຸນລ້ຽງ ດວງສົມພອນ ຮອງເລຂາໜ່ວຍພັກ, ປະທານກວດກາໜ່ວຍພັກພະແນກຍຸຕິທໍາ, ມີຮອງຫົວໜ້າພະແນກຍຸຕິທໍາແຂວງ ໄຊຍະບູລີ ມີຄະນະໜ່ວຍພັກ, ຮອງປະທານກວດກາ, ສະມາຊິກພັກພະນັກງານ-ລັດຖະກອນ ເຂົ້າຮ່ວມທັງໝົດ 28 ສະຫາຍ, ຍິງ11 ສະຫາຍ.
          ໂດຍປະຕິບັດຕາມ ແຈ້ງການແນະນໍາຂອງ ຄະນະກວດກາພັກແຂວງ ໄຊຍະບູລີ ສະບັບເລກທີ 020/ຄກພຂ, ລົງວັນທີ 15 ມີນາ 2021 ກ່ຽວກັບການສະເຫຼີມສະຫຼອງ ແລະ ປາຖະກະຖາ ມູນເຊື້ອວັນສ້າງຕັ້ງ ອົງການກວດກາພັກ-ລັດ ຄົບຮອບ 39 ປີ ແລະ ຕາມການຕົກລົງເຫັນດີຂອງສະຫາຍເລຂາໜ່ວຍພັກ ໃນຄັ້ງວັນທີ 23 ມີນາ 2021 ໃຫ້ຈັດຕັ້ງປາຖະກະຖາ ເຜີຍແຜ່ເຊື່ອມຊືມໃຫ້ສະມາຊິກພັກພາຍໃນໜ່ວຍພັກຂອງຕົນ.
          ໃນພິທີປະທານໄດ້ຍົກໃຫ້ເຫັນ ປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງວຽກງານດັ່ງກ່າວ ຕາມມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 236/ຄພຂ, ລົງວັນທີ 22 ພຶດສະພາ 2017 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກວດກາພັກແຂວງ, ເພື່ອໃຫ້ສະມາຊິກພັກ, ພະນັກງານ-ລັດຖະກອນ ຮັບຮູ້ເຂົ້າໃຈຢ່າງເລີກເຊິ່ງກວ້າງຂວາງ ແລະ ໃນນີ້ກໍເພື່ອເປັນການສຶກສາອົບຮົມໃຫ້ແກ່ສະມາຊິກພັກ, ພະນັກງານ-ລັດຖະກອນ ຮັບຮູ້ເຂົ້າໃຈພາລະບົດບາດ, ຄວາມສໍາຄັນ ຂອງອົງການກວດກາພັກ-ລັດ ທັງເປັນເຈົ້າການໃນການປະກອບສ່ວນເຂົ້າໃນວຽກງານດັ່ງກ່າວ (ມີການຕິດຕາມກວດກາ) ເຮັດໃຫ້ການຊີ້ນໍາ-ນໍາພາໃນການຈັດຕັ້ງປະຕິບັດວຽກງານວິຊາສະເພາະ ສໍາເລັດຕາມຈຸດປະສົງລະດັບຄາດໝາຍ
ຕອນທ້າຍຂອງພິທີ ສະຫາຍ ບຸນລ້ຽງ ດວງສົມພອນ ຮອງເລຂາໜ່ວຍພັກ, ປະທານກວດກາ ຮອງຫົວໜ້າພະແນກຍຸຕິທໍາແຂວງ ໄຊຍະບູລີ ໄດ້ເນັ້ນໜັກ ໃຫ້ສະມາຊິກພັກ, ພະນັກງານ-ລັດຖະກອນ ຈົ່ງເອົາໃຈໃສ່ ໃນການຄົ້ນຄວ້າເຊື້ອມຊືມ ເອກະສານກ່ຽວກັບວຽກງານກວດກາ ເພື່ອຈະໄດ້ສະຫຼຸບຕີລາຄາ ແນວຄິດພະນັກງານ-ລັດຖະກອນ, ການປະຕິບັດໜ້າທີ່ວຽກງານ ໃຫ້ປາກົດຜົນເປັນຈິງ ຕາມຄາດໝາຍທີ່ວາງໄວ້, ໂດຍໃຫ້ປະຕິບັດຖືກຕ້ອງສອດຄ່ອງກັບກົດໝາຍ, ລະບຽບການ ແລະ ຂໍ້ຫ້າມຕ່າງໆທີ່ວາງໄວ້.
ຂ່າວ-ພາບ: ພະແນກຍຸຕິທໍາແຂວງ ໄຊຍະບູລີ