ເຜີຍແຜ່ເອກະສານກ່ຽວກັບການສ້າງນິຕິກໍາໃຫ້ພະນັກງານຫຼັກແຫຼ່ງເມືອງ ປາກລາຍ

Primary tabs

          ໃນວັນທີ 8 ກໍລະກົດ 2021 ພະແນກຍຸຕິທໍາແຂວງ ໄຊຍະບູລີ ໄດ້ຈັດກອງປະຊຸມເຜີຍແຜ່ເອກະສານກ່ຽວກັບການສ້າງນິຕິກໍາໃຫ້ພະນັກງານຫຼັກແຫຼ່ງຂອງເມືອງ ປາກລາຍ ຢູ່ທີ່ຫ້ອງວ່າການປົກຄອງເມືອງ ປາກລາຍ ໂດຍການເປັນປະທານຮ່ວມ ຂອງ ທ່ານ ກາວີ ເກດດົມລິ ຫົວໜ້າພະແນກຍຸຕິທໍາແຂວງ ໄຊຍະບູລີ ແລະ ທ່ານ ສົມດີ ພົງສະຫວັນ ຫົວໜ້າອົງການກວດກາລັດເມືອງ ປາກລາຍ, ເຂົ້າຮ່ວມມີ ຮອງເຈົ້າເມືອງ, ຫົວໜ້າ, ຮອງຫົວໜ້າຫ້ອງການ, ອົງການ, ກົມກອງອ້ອມຂ້າງເມືອງ, ແລະ ນາຍບ້ານ 24 ບ້ານພາຍໃນເທດສະບານເມືອງ ເຂົ້າຮ່ວມທັງໝົດ 92 ທ່ານ, ຍິງ 23 ທ່ານ.
อาจเป็นรูปภาพของ 1 คน และกำลังยืน
          ຈຸດປະສົງ ເພື່ອຊີ້ແຈງ, ແນະນຳຢ່າງລະອຽດ ກ່ຽວກັບປະເພດນິຕິກໍາທີ່ມີຜົນບັງຄັບທົ່ວໄປ, ຂັ້ນຕອນ ແລະ ວິທີສ້າງນິຕິກຳ ເຮັດໃຫ້ພະນັກງານຫຼັກແຫຼ່ງອ້ອມຂ້າງເມືອງ ຕະຫຼອດຮອດ ພະນັກງານຈາກອົງການປົກຄອງບ້ານ ໄດ້ຮັບຮູ້ເຂົ້າໃຈ ວິທີການ, ຂັ້ນຕອນຂອງການສ້າງກົດລະບຽບບ້ານ. ທັງເປັນການຍົກລະດັບ ຄວາມຮູ້, ຄວາມສາມາດໃຫ້ແກ່ພະນັກງານທີ່ຮັບຜິດຊອບວຽກງານນິຕິກໍາຂັ້ນເມືອງ, ເຊື່ອມຊຶມໃຫ້ກໍາໄດ້ແນວທາງນະໂຍບາຍຂອງພັກ, ໃຫ້ເຂົ້າໃຈຫຼັກການ, ຂະບວນການ, ຂັ້ນຕອນ, ວິທີການ ໂດຍສະເພາະ ພະນັກງານທີ່ຮັບຜິດຊອບໃນການສ້າງນິຕິກຳ ສາມາດເປັນເສນາທິການທີ່ເຂັ້ມແຂງ, ມີຄຸນນະພາບ, ເຮັດໃຫ້ນິຕິກໍາທີ່ຖືກສ້າງຂຶ້ນມີຄຸນນະພາບ ຖືກຕ້ອງຕາມສະພາບຄວາມເປັນຈິງຂອງການຂະຫຍາຍຕົວທາງດ້ານເສດຖະກິດ-ສັງຄົມ ແລະ ວັດທະນະທໍາ ຂອງທ້ອງຖິ່ນ, ເປັນເອກະພາບໃນທົ່ວເມືອງ ແລະ ສາມາດຈັດຕັ້ງປະຕິບັດໄດ້.
ຂຽນຂ່າວ: ນ. ໄມ ໄຊຍະວົງ;
ຖ່າຍພາບ: ທ. ສົມພອນ ລີນທະວົງ
ປະເພດຂ່າວ: