ຫ້ອງການຍຸຕິທຳເມືອງ ຊຽງຮ່ອນ ແຂວງ ໄຊຍະບູລີ ເປີດການຝຶກອົບຮົມກົດໝາຍ 45 ວັນ

Primary tabs

          ໃນວັນທີ 1 ກັນຍາ 2021 ຢູ່ທີ່ຫ້ອງການບ້ານ ປົ່ງແປ້ນ(ເຂດທົ່ງກາບ) ເມືອງ ຊຽງຮ່ອນ ແຂວງ ໄຊຍະບູລີ ໄດ້ມີພິທີເປີດຊຸດຝຶກອົບຮົມກົດໝາຍຂັ້ນພຶ້ນຖານລະບົບບຳລຸງ ໄລຍະສັ້ນ 45 ວັນ ຊຸດທີ IV ໃຫ້ແກ່ອຳນາດການປົກຄອງບ້ານເຂດທົ່ງກາບ. ໃຫ້ກຽດເຂົ້າຮ່ວມເປັນປະທານ ໂດຍ ທ່ານ ກົງທອງ ສິດທິໄຊ ວ່າການ ເລຂາພັກເມືອງ ເຈົ້າເມືອງ ຊຽງຮ່ອນ ພ້ອມດ້ວຍຄະນະຮັບຜິດຊອບການຝຶກອົບຮົມ, ພະນັກງານຊີ້ນຳບ້ານ, ພະນັກງານຫ້ອງການຍຸຕິທຳ, ກຳລັງປ້ອງກັນຊາດ, ອຳນາດການປົກຄອງບ້ານເຂົ້າຮ່ວມທັງໝົດຈຳນວນ 60 ທ່ານ, ຍິງ 07 ທ່ານ. ໃນນັ້ນ ມີນັກຝຶກອົບຮົມ ຈຳນວນ 33 ທ່ານ, ຍິງ 02 ທ່ານ.
          ໃນພິທີ ທ່ານ ອ່ອນແກ້ວ ພອນໄຊ ຫົວໜ້າຫ້ອງການຍຸຕິທຳເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງສະບັບເລກທີ 438/ຈມ.ຊຮ, ລົງວັນທີ 09 ສິງຫາ 2021 ວ່າດ້ວຍການອະນຸມັດເປີດການຝຶກອົບຮົມກົດໝາຍລະບົບບຳລຸງ 45 ວັນ ຊຸດທີ IV ປະຈຳປີ 2021 ແລະ ຜ່ານແຜນການຮຽນ-ການສອນໃນຄັ້ງນີ້. ເຊິ່ງຈະເລີ່ມເປີດຮຽນແຕ່ວັນທີ 02 ກັນຍາ 2021 ເປັນຕົ້ນໄປ
ຈຸດປະສົງຂອງການຝຶກອົບຮົມໃນຄັ້ັ້ັ້ງກໍເພື່ອເຮັດໃຫ້ອົງການຈັດຕັ້ງບ້ານ ແລະ ປະຊາຊົນໄດ້ຍົກລະດັບຄວາມຮູ້ທາງດ້ານກົດໝາຍ ແລະ ເປັນການຜັນຂະຫຍາຍແນວທາງນະໂຍບາຍຂອງພັກ, ລັດຖະທຳມະນູນ ແລະ ກົດໝາຍຂອງລັດລົງເຖິງຮາກຖານບ້ານໂດຍສະເພາະແມ່ນປະຕິບັດຕາມຫຼັກສູດທີ່ກະຊວງຍຸຕິທຳໄດ້ກຳນົດໄວ້.
          ໃນຕອນທ້າຍ ພິທີ ທ່ານ ກົງທອງ ສິດທິໄຊ ວ່າການ ເລຂາພັກເມືອງ ເຈົ້າເມືອງ ຊຽງຮ່ອນ ໄດ້ມີຄຳເຫັນຊີ້ນຳ ແລະ ຍ້ອງຍໍຊົມເຊີຍຕໍ່ການຕັດສິນໃຈຂອງຄະນະນຳ, ຄະນະຮັບຜິດຊອບ, ຄູອາຈານ ທີ່ໄດ້ກະກຽມຄວາມພ້ອມໃນການເປີດຊຸດຝຶກອົບຮົມໃນຄັ້ງນີ້ ພ້ອມທັງໄດ້ເນັ້ນໜັກໃຫ້ນັກຝຶກອົບຮົມ ຈົ່ງມີຄວາມຮັບຜິດຊອບສູງ, ຕັ້ງໜ້າຝຶກຝົນຫຼໍ່ຫຼອມຕົນເອງ, ຍາດແຍ່ງເອົາຄວາມຮູ້ນຳຄູອາຈານ, ມີສະຕິເຄົາລົບ ແລະ ປະຕິບັດລະບຽບທີ່ວາງອອກຢ່າງເຂັ້ມງວດ.
ພາບ ແລະ ຂຽນຂ່າວ ໂດຍ: ນ. ບົວຄຳ ໄຊວຸດ + ທ ຄຳແດງ ສັນຕິສຸກ.
ປະເພດຂ່າວ: