ເມືອງ ຫຼາ ແຂວງ ອຸດົມໄຊ ຝຶກອົບຮົມວຽກງານແກ້ໄຂຂໍ້ຂັດແຍ່ງໃຫ້ແກ່ ຄະນະໜ່ວຍໄກ່ເກ່ຍຂໍ້ຂັດແຍ່ງຂັ້ນບ້ານ ກຸ່ມບ້ານ ພັນໄຊ

Primary tabs

          ໃນລະຫວ່າງວັນທີ 8-9 ກັນຍາ 2021 ຫ້ອງການຍຸຕິທໍາເມືອງ ຫຼາ ໄດ້ເປີດຊຸດຝຶກອົບຮົມວຽກງານແກ້ໄຂຂໍ້ຂັດແຍ່ງໃຫ້ແກ່ຄະນະໜ່ວຍໄກ່ເກ່ຍຂໍ້ຂັດແຍ່ງຂັ້ນບ້ານ ຂອງເມືອງ ຫຼາ ແຂວງ ອຸດົມໄຊ ໂດຍການເປັນປະທານຂອງ ທ່ານ ບຸນຈັນ ສີບຸນຕາ ຮອງຫົວໜ້າພະແນກຍຸຕິທໍາແຂວງ ອຸດົມໄຊ, ມີທ່ານ ສົມໝາຍ ພູມມີສຸກ ຫົວໜ້າຫ້ອງການຍຸຕິທໍາເມືອງ ຫຼາ, ຄະນະໄກ່ເກ່ຍຂໍ້ຂັດແຍ່ງຂັ້ນບ້ານ 9 ບ້ານ ແລະ ພາກສ່ວນກ່ຽວຂ້ອງເຂົ້າຮ່ວມ.
          ຈຸດປະສົງຂອງການຝຶກອົບຮົມ ເພື່ອຍົກສູງພາລະບົດບາດ ໃນການເຄື່ອນໄຫວຈັດຕັ້ງປະຕິບັດສິດ ແລະ ໜ້າທີ່ຂອງຄະນະໜ່ວຍໄກ່ເກ່ຍຂໍ້ຂັດແຍ່ງຂັ້ນບ້ານ ທັງ 9 ບ້ານ ຂອງເມືອງ ຫຼາ ຊຶ່ງມີ: ບ້ານ ປາກກໍ, ບ້ານ ໂພນສະຫວ່າງ, ບ້ານ ຫ້ວຍອໍ, ບ້ານ ມົກຕົ້ນ, ບ້ານ ຫາດແອນ, ບ້ານ ຫາດນິກ, ບ້ານ ຫ້ວຍແພ, ບ້ານ ຫ້ວຍຈາຍ, ແລະ ບ້ານ ຫົວແກ້ງ ໃຫ້ມີຄວາມເປັນເອກະພາບກັນ, ມີຄວາມຮັບຮູ້ ແລະ ເຂົ້າໃຈ ລະຫວ່າງທິດສະດີກັບພຶດຕິກໍາຕົວຈິງ ເພື່ອນໍາໄປໝູນໃຊ້ໃຫ້ຖືກຕ້ອງສອດຄ່ອງກັບກົດໝາຍ ແລະ ລະບຽບການທີ່ກ່ຽວຂ້ອງ, ຊຸດຝຶກອົບຮົມຄັ້ງນີ້ ໄດ້ເນັ້ນໜັກ ແລະ ລົງເລິກ 2 ບັນຫາ ຄື: ສາຍພົວພັນຄອບຄົວ (ການຢ່າຮ້າງ) ແລະ ການກະທໍາຜິດຂອງເດັກ (ການລັກຊັບຂອງພົນລະເມືອງ)
          ຕອນທ້າຍ ທ່ານ ບຸນຈັນ ສີບຸນຕາ ຮອງຫົວໜ້າພະແນກຍຸຕິທໍາແຂວງ ກໍໄດ້ມີຄໍາເຫັນໂອ້ລົມ, ກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຫ້ອງການຍຸຕິທໍາເມືອງ ຫຼາ ແລະ ກຸ່ມບ້ານ ພັນໄຊ ທີ່ໄດ້ເອົາໃຈໃສ່ ເຮັດໃຫ້ຊຸດຝຶກອົບຮົມຄັ້ງນີ້ເກີດຂຶ້ນ ແລະ ສໍາເລັດຕາມລະດັບຄາດໝາຍ ພ້ອມນັ້ນ ທ່ານຍັງໄດ້ຮຽກຮ້ອງໃຫ້ບັນດາທ່ານ ທີ່ໄດ້ເຂົ້າຮ່ວມຝຶກອົບຮົມ ຈົ່ງນໍາເອົາຄວາມຮູ້, ຄວາມສາມາດທີ່ຕົນໄດ້ຝຶກມານັ້ນໄປນຳໃຊ້ເຂົ້າໃນການປະຕິບັດວຽກງານຕົວຈິງໃຫ້ຖືກຕ້ອງ ແລະ ມີປະສິດທິພາບ, ປະສິດທິຜົນ.
ພາບ-ຂ່າວ: ຈາກຫ້ອງຍຸຕິທໍາເມືອງຫຼາ