ຫ້ອງການຍຸຕິທຳເມືອງ ແບງ ລົງໂຄສະນາເຜີຍແຜ່ກົດໝາຍ ໃຫ້ກຸ່ມ ເທດສະບານ ແລະ ກຸ່ມນາປາ

          ໃນວັນທີ 5-6 ມີຖຸນາ 2021 ນີ້ ທ່ານ ນາງ ອໍາພອນ ບໍລິວັນ ຮັກສາການ ຫົວໜ້າຫ້ອງການຍຸຕິທຳເມືອງ ແບງ ແຂວງ ອຸດົມໄຊ ພ້ອມດ້ວຍວິຊາການ ໄດ້ລົງເຄື່ອນໄຫວໂຄສະນາເຜີຍແຜ່ກົດໝາຍ ແລະ ເອກະສານສຳຄັນ ໃຫ້ປະຊາຊົນຢູ່ສອງກຸ່ມບ້ານ ຄື ກຸ່ມເທດສະບານ ແລະ ກຸ່ມນາປາ ກວມເອົາ 03 ບ້ານຄື: ບ້ານປາງທອງ, ບ້ານຊຽງແລ ແລະ ບ້ານ ຫວ້ຍຫົກ, ມີນາຍບ້ານ ແລະ ພໍ່ແມ່ປະຊາຊົນທັງ ສາມ ບ້ານເຂົ້າຮ່ວມທັງໝົດ 200 ຄົນ, ຍິງ 65 ຄົນ.
          ຈຸດປະສົງໃນການລົງໂຄສະນາເຜີຍແຜ່ກົດໝາຍໃນຄັ້ງນີ້ ເພື່ອເຮັດໃຫ້ປະຊາຊົນທັງ ສາມ ບ້ານ ໄດ້ຮັບຮູ້, ເຂົ້າໃຈຕໍ່ແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ ແລະ ລະບຽບການຂອງລັດທີ່ວາງອອກ, ໄດ້ຮັບຮູ້ ແລະ ເຂົ້າໃຈສິດ, ໜ້າທີ່, ຂັ້ນຕອນ, ວິທີການແກ້ໄຂຂໍ້ຂັດແຍ່ງຂັ້ນບ້ານ; ຂັ້ນຕອນ ແລະ ວິທີການປະເມີນຄອບຄົວ ແລະ ບ້ານແບບຢ່າງປະຕິບັດກົດໝາຍ.
          ເອກະສານທີ່ນຳເຜີຍແຜ່ຄັ້ງນີ້ ປະກອບມີ: ດຳລັດຂອງນາຍົກລັດຖະມົນຕີ ສະບັບເລກທີ 77/ລບ, ລົງວັນທີ 28 ກຸມພາ 2018 ວ່າດ້ວຍການຊ່ວຍເຫຼືອທາງດ້ານກົດໝາຍໂດຍບໍ່ເສຍຄ່າ, ຄໍາແນະນຳສະບັບເລກທີ 1077/ກຍ, ລົງວັນທີ 3 ກັນຍາ 2018 ວ່າດ້ວຍການຈັດຕັ້ງປະຕິບັດ ການຊວ່ຍເຫຼືອທາງດ້ານກົດໝາຍ, ໃຫ້ຄຳປຶກສາທາງດ້ານກົດໝາຍເຄື່ອນທີ່, ເຜີຍແຜ່ຂໍ້ຕົກລົງສະບັບເລກທີ 2399/ກຍ, ລົງວັນທີ 7 ທັນວາ 2017 ຂອງກະຊວງຍຸຕິທຳ ວ່າດ້ວຍການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ພ້ອມທັງແນະນໍາການແກ້ໄຂຂໍ້ຂັດແຍ່ງຂັ້ນບ້ານ.
          ຕອນທ້າຍພິທີ ທ່ານ ນາງ ອໍາພອນ ບໍລິວັນ ຮັກສາການ ຫົວໜ້າຫ້ອງການຍຸຕິທຳ ເມືອງ ແບງ ໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍທາງທິມງານ, ອົງການປົກຄອງບ້ານ ແລະ ພໍ່ແມ່ປະຊາຊົນທັງ ສາມ ບ້ານທີ່ເຂົ້າຮ່ວມຮັບຟັງການລົງໂຄສະນາເຜີຍແຜ່ບັນດາກົດໝາຍ, ແລະ ເອກະສຳຄັນໃນຄັ້ງນີ້ ແລະ ທ່ານໄດ້ເນັ້ນໜັກບາງບັນຫາໃຫ້ປະຊາຊົນມີສະຕິຕື່ນຕົວເຄົາລົບປະຕິບັດຕາມລັດຖະທຳມະນູນ ແລະ ກົດໝາຍໃຫ້ເຂັ້ມງວດ, ພ້ອມກັນສ້າງຄອບຄົວ ແລະ ບ້ານຂອງຕົນໃຫ້ເປັນບ້ານແບບຢ່າງປະຕິບັດກົດໝາຍໃນຕໍ່ໜ້າ.
ຂຽນຂ່າວໂດຍ ນາງ ພູຄຳ ຫັດສະດີ
ຖ່າຍພາບ ທອງ ຄຳສີຫງວນ
ຖ່າຍພາບ ກັນຫາ ອີນສົມພອນ