ເມືອງ ແບງ ແຂວງ ອຸດົມໄຊ ເປີດຊຸດຝຶກອົບຮົມກົດໝາຍໄລຍະສັ້ນ 45 ວັນ

Primary tabs

          ພິທີເປີດຊຸດຝຶກອົບຮົມກົດໝາຍ 45 ວັນ ໃຫ້ແກ່ພະນັກງານຫຼັກແຫຼ່ງອ້ອມຂ້າງເມືອງ ແລະ ຮາກຖານບ້ານ ໄດ້ຈັດຂຶ້ນ ໃນວັນທີ 10 ກັນຍາ 2021 ຜ່ານມາ ຢູ່ທີ່ສະໂມສອນເມືອງ ແບງ ແຂວງ ອຸດົົມໄຊ ໂດຍການເປັນປະທານຮ່ວມຂອງ ທ່ານ ຄໍາພອນ ພີມມະລາດ ຮອງເຈົ້າເມືອງ ປະທານກວດກາພັກ-ລັດ ເມືອງ ແບງ ແລະ ທ່ານ ສີຖານ ມະນີໄຊ ຮອງຫົວໜ້າພະແນກຍຸຕິທໍາແຂວງ, ມີກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ນັກຝຶກອົບຮົມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
อาจเป็นรูปภาพของ กำลังยืน และสถานที่ในร่ม
          ໃນພິທີ ທ່ານ ນາງ ອໍາພອນ ບໍລິວັນ ຮັກສາການຫົວໜ້າຫ້ອງການຍຸຕິທຳເມືອງ ແບງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 448/ຈມ.ມບ, ລົງວັນທີ 6 ກັນຍາ 2021 ວ່າດ້ວຍການອະນຸມັດເປີດຊຸດຝຶກອົບຮົມກົດໝາຍລະບົບບຳລຸງໄລຍະສັ້ນ 45 ວັນ ຊຸດທີ II ປະຈຳປີ 2021 ແລະ ຜ່ານບົດລາຍງານແຜນການຮຽນ-ການສອນ ຊຶ່ງຈະເລີ່ມເປີດຮຽນແຕ່ວັນທີ 13 ກັນຍາ 2021 ເປັນຕົ້ນໄປ.
          ຈຸດປະສົງຂອງການຝຶກອົບຮົມ ເພື່ອເຮັດໃຫ້ພະນັກງານອ້ອມຂ້າງເມືອງ, ອົງການຈັດຕັ້ງບ້ານ ແລະ ປະຊາຊົນໄດ້ຍົກລະດັບຄວາມຮູ້ທາງດ້ານກົດໝາຍ ແລະ ເປັນການຜັນຂະຫຍາຍແນວທາງນະໂຍບາຍຂອງພັກ, ລັດຖະທຳມະນູນ ແລະ ກົດໝາຍຂອງລັດ ລົງເຖິງຮາກຖານບ້ານ ໂດຍສະເພາະ ແມ່ນປະຕິບັດຕາມຫຼັກສູດທີ່ກະຊວງຍຸຕິທຳໄດ້ກຳນົດໄວ້.
          ໃນຕອນທ້າຍ ຄະນະປະທານ ກໍໄດ້ມີຄໍາເຫັນໂອ້ລົມ ກ່ອນອື່ນ ທ່ານ ໄດ້ຍ້ອງຍໍຊົມເຊີຍຕໍ່ການຕັດສີນໃຈຂອງຄະນະນໍາ, ຄະນະຮັບຜິດຊອບ, ຄູ-ອາຈານ ທີ່ໄດ້ກະກຽມຄວາມພ້ອມໃນການເປີດຊຸດຝຶກອົບຮົມໃນຄັ້ງນີ້ ພ້ອມທັງເນັ້ນ ໃຫ້ນັກຝຶກອົບຮົມ ຈົ່ງມີຄວາມຮັບຜິດຊອບສູງ, ຕັ້ງໜ້າຝຶກຝົນຫຼໍ່ຫຼອມຕົນເອງ, ຍາດແຍ່ງເອົາຄວາມຮູ້ນຳຄູ-ອາຈານ, ມີສະຕິເຄົາລົບ ແລະ ປະຕິບັດລະບຽບທີ່ວາງອອກຢ່າງເຂັ້ມງວດ.
ຂ່າວ: ບຸນມີອິທະວົງ
ພາບ: ຈາກຫ້ອງການຍຸຕິທໍາເມືອງ ແບງ
ປະເພດຂ່າວ: