ພະແນກຍຸຕິທຳແຂວງ ອັດຕະປື ເຜີຍແຜ່ດຳລັດ ເລກທີ 77 ໃຫ້ປະຊາຊົນ ຢູ່ເມືອງ ສາມັກຄີໄຊ

          ໃນວັນທີ 8 ກໍລະກົດ 2021 ຜ່ານມາ ຢູ່ທີ່ຫ້ອງການ ບ້ານ ໃຫຍ່ໝື່ນຫົວເມືອງ ເມືອງ ສາມັກຄີໄຊ ແຂວງ ອັດຕະປື ໄດ້ຈັດພິທີໂຄສະນາເຜີຍແຜ່ດຳລັດ ສະບັບເລກທີ 77/ລບ, ລົງວັນທີ 28 ກຸມພາ 2018 ວ່າດ້ວຍການຊ່ວຍເຫຼືອທາງດ້ານກົດໝາຍ ໂດຍການເປັນປະທານຂອງ ທ່ານ ວັນນະເລດ ວິໄລພົນ ຮອງຫົວໜ້າພະແນກຍຸຕິທຳ ແຂວງ, ມີຫົວໜ້າຫ້ອງການຍຸຕິທຳເມືອງ, ຫົວໜ້າຂະແໜງ, ພະນັກງານວິຊາການ, ປກສ ກຸ່ມບ້ານ, ນາຍບ້ານ ແລະ ປະຊາຊົນພາຍໃນ ບ້ານ ໃຫຍ່ໝື່ນຫົວເມືອງເຂົ້າຮ່ວມຮັບຟັງທັງ ໝົດ 43 ຄົນ, ຍິງ 19 ຄົນ.
อาจเป็นรูปภาพของ 1 คน, กำลังนั่ง, กำลังยืน, กลางแจ้ง และต้นไม้
          ທ່ານ ນາງ ຈັນສະໝອນ ສະເຫຼີມສັກ ຫົວໜ້າຂະແໜງສົ່ງເສີມວຽກງານຍຸຕິທຳ ໄດ້ຂື້ນເຜີຍແຜ່ດຳລັດ 77/ລບ ເຊິ່ງໄດ້ຍົກໃຫ້ເຫັນເຖິງຄວາມໝາຍ, ຄວາມສໍາຄັນ ຈຸດປະສົງຂອງດຳລັດ ສະບັບເລກທີ 77/ລບ ວ່າດ້ວຍການຊ່ວຍເຫຼືອທາງດ້ານກົດໝາຍ, ຊຶ່ງປະກອບດ້ວຍ 4 ປະເພດຂອງການຊ່ວຍເຫຼືອ ເຊັ່ນ ການສະໜອງຂໍ້ມູນ ຂ່າວສານ, ການຂໍຄໍາປືກສາທາງດ້ານກົດໝາຍ, ການຂໍຄວາມຊ່ວຍເຫຼືອໃນການຮ່າງເອກະສານ, ການເອົາຜູ້ຕາງໜ້າໃນການດຳເນີນຄະດີ ຜູ້ທີ່ຈະໄດ້ຮັບການຊ່ວຍເຫຼືອທາງດ້ານກົດໝາຍຕ້ອງແມ່ນຄົນທຸກຍາກ, ຜູ້ກະທຳຜິດທີ່ກົດໝາຍກຳນົດໃຫ້ມີທະນາຍຄວາມເຂົ້າໄປຊ່ວຍເຫຼືອ, ແມ່ຍິງ ແລະ ເດັກນ້ອຍທີ່ຖືກເຄາະຮ້າຍຈາກການໃຊ້ຄວາມຮຸນແຮງ ແລະ ຜູ້ຖືກເຄາະຮ້າຍຈາກການຄ້າມະນຸດ. ທັງນີ້ກໍ ເພື່ອໃຫ້ປະຊາຊົນ ໄດ້ຮັບຮູ້ , ເຂົ້າໃຈ ແລະ ເຊື່ອມຊຶມຕໍ່ແນວທາງນະໂຍບາຍຂອງພັກ, ເຂົ້າໃຈວຽກງານຊ່ວຍເຫຼືອທາງດ້ານກົດໝາຍ, ກົດໝາຍ ແລະ ລະບຽບການຂອງລັດ ທີ່ວາງອອກໃນແຕ່ລະໄລຍະຢ່າງຈະແຈ້ງ ເພື່ອຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ. ຫຼັງຈາກນັ້ນ, ກໍໄດ້ມີການໃຫ້ຄຳປຶກສາກົດໝາຍກັບທີ່.
          ຕອນທ້າຍ ທ່ານ ວັນນະເລດ ວິໄລພົນ ຮອງຫົວໜ້າພະແນກຍຸຕິທຳແຂວງ ກໍໄດ້ມີຄໍາເຫັນໂອ້ລົມຕໍ່ກອງປະຊຸມ ຊຶ່ງທ່ານໄດ້ເນັ້ນໜັກໃຫ້ ອຳນາດການປົກຄອງຂອງບ້ານຈົ່ງໄດ້ພ້ອມກັນເພີ່ມທະວີ ນຳເອົາແນວທາງຂອງພັກກໍຄື ກົດໝາຍຂອງລັດ ໄປໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ການເມືອງ ທີ່ຢູ່ໃນຄວາມຮັບຜິດຊອບຂອງຕົນ ໂດຍສະເພາະ ແມ່ນວຽກງານຊ່ວຍເຫຼືອທາງດ້ານກົດໝາຍ.
ຂ່າວ-ພາບ: ທົງໄຊ