ພະແນກຍຸຕິທຳແຂວງ ອັດຕະປື ມອບພາຫະນະເຂົ້າເປັນຊັບສິນຂອງລັດ

Primary tabs

          ໃນວັນທີ 6 ກໍລະກົດ 2021 ຢູ່ທີ່ກອງບັນຊາການ ປກສ ແຂວງ ອັດຕະປື ໄດ້ຈັດພິທີມອບ-ຮັບ ວັດຖຸ ແລະ ພາຫະນະ ສານຕັດສີນຮິບເຂົ້າເປັນຂອງລັດ ໂດຍ ມີຕາງໜ້າພະແນກຍຸຕິທຳ, ພະແນກການເງິນ, ຫ້ອງການຄຸ້ມຄອງຊັບສິນຂອງລັດ ແລະ ບັນດາພະແນກການທີ່ກ່ຽວຂ້ອງອ້ອມຂ້າງແຂວງເຂົ້າຮ່ວມ.
          ໂດຍອີງຕາມກົດໝາຍວ່າດ້ວຍການຈັດຕັ້ງປະຕິບັດຄຳຕັດສີນຂອງສານ ສະບັບປັບປຸງ ປີ 2008, ມາດຕາ 11, ຄຳຕັດສີນຂອງສານ ສະບັບເລກທີ 006/ຂຕອ, ລົງວັນທີ 23 ທັນວາ 2020, ຄຳຕັດສີນຂອງສານ ສະບັບເລກທີ 026/ຂຕອ, ລົງວັນທີ 04 ມີນາ 2021, ຂໍ້ຕົກລົງຂອງຫົວໜ້າພະແນກຍຸຕິທຳແຂວງ ອັດຕະປື ວ່າດ້ວຍການມອບຊັບສິນທີ່ສານຕັດສີນ ໃຫ້ພະແນກການເງິນແຂວງ ເພື່ອນໍາໃຊ້ເປັນຂອງລັດ ຊຶ່ງປະກອບມີ: ຫີນອ່ອນປາໂກໄດ 5,004 ກິໂລກຼາມ, ລົດດຸດ 1 ຄັນ. ກ່າວມອບໂດຍ ທ່ານ ທິດສະໄໝ ຈັນທະກາລີ ຫົວໜ້າຂະແໜງຈັດຕັ້ງປະຕິບັດຄໍາຕັດສີນຂອງສານ ແລະ ຮັບໂດຍ ທ່ານ ສຸກສະຫວັນ ອ້ວນວິໄລ ຮອງຫົວໜ້າຂະແໜງຄຸ້ມຄອງຊັບສິນຂອງລັດ.
          ທັງນີ້ ກໍເພື່ອປະຕິບັດຕາມຄຳຕັດສີນຂອງສານທີ່ໃຊ້ໄດ້ຢ່າງເດັດຂາດ, ຄຳສັ່ງຂອງນາຍົກລັດຖະມົນຕີ ເລກທີ 07/ນຍ, ລົງວັນທີ 5 ເມສາ 2017 ວ່າດ້ວຍການຂື້ນບັນຊີເຕົ້າໂຮມຊັບສິນທີ່ສານຕັດສີນຮິບເປັນຂອງລັດ ເພື່ອເພີ່ມທະວີການຈັດຕັ້ງປະຕິບັດກົດໝາຍ, ລະບຽບການໃຫ້ມີຄວາມສັກສິດ ແນໃສ່ໃນການຄຸ້ມຊັບສິນປະເພດ, ເງິນ, ຄຳ, ວັດຖຸມີຄ່າອື່ນໆລວມທັງພາຫະນະ ແລະ ອຸປະກອນຕ່າງໆ ທີ່ສານຕັດສີນຮິບເປັນຂອງລັດ ໃຫ້ມາຂື້ນທະບຽນ ແລະ ຂຶ້ນບັນຊີຄຸ້ມຄອງລວມສູນ.
ຂ່າວ-ພາບ: ທົງໄຊ