ເມືອງ ສາມັກຄີໄຊ ປິດຊຸດຝຶກອົບຮົມກົດໝາຍໄລຍະສັ້ນ 45 ວັນ

Primary tabs

          ໃນວັນທີ 2 ກໍລະກົດ 2021 ຜ່ານມາ ຫ້ອງການຍຸຕິທຳເມືອງ ສາມັກຄີໄຊ ແຂວງ ອັດຕະປື ໄດ້ຈັດພິທີປິດຊຸດຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ II ຂຶ້ນ ທີ່ຫ້ອງການບ້ານ ເວີນແຄນ ໂດຍໃຫ້ກຽດເປັນປະທານຂອງທ່ານ ເພັດມີໄຊ ຄຳພັກດີ ເຈົ້າເມືອງສາມັກຄີໄຊ, ເຂົ້າຮ່ວມມີ ທ່ານ ຄຳຫຼ້າ ແກ້ວວັນສອນ ຫົວໜ້າພະແນກຍຸຕິທຳແຂວງ, ມີ ຫົວໜ້າ, ຮອງຫົວໜ້າຫ້ອງການຍຸຕິທໍາ, ພະນັກງານ-ລັດຖະກອນ, ຄູ-ອາຈານ ແລະ ຜູ້ເຂົ້າຮ່ວມຝຶກອົບຮົມ ເຂົ້າຮ່ວມ.
อาจเป็นรูปภาพของ 9 คน และผู้คนกำลังยืน
          ທ່ານ ແສງສຸລີ ຮັກສາການຫົວໜ້າຫ້ອງການຍຸຕິທຳເມືອງ ສາມັກຄີໄຊ ໄດ້ຂຶ້ນຜ່ານບົດສະຫຼຸບຂອງການຝຶກອົບຮົມໃນຄັ້ງນີ້ ຊຶ່ງທ່ານໄດ້ໃຫ້ຮູ້ວ່າ ຊຸດຝຶກອົບຮົມ ແມ່ນໄດ້ເລີ່ມດຳເນີນແຕ່ວັນທີ 12 ມີນາ 2021ເປັນຕົ້ນມາ ຫຼັກສູດການຝຶກອົບຮົມປະກອບມີ 4 ພາກ, 34 ວິຊາ, ມີ 22,5 ໜ່ວຍກິດ, ມີ 360 ຊົ່ວໂມງ; ຊຶ່ງໄດ້ແບ່ງອອກເປັນ ວິຊາທິດສະດີ ມີ 3 ວິຊາ, ວິຊາກົດໝາຍ ມີ 29 ວິຊາ, ວິຊາວຽກງານຍຸຕິທໍາຮາກຖານ ມີ 1 ວິຊາ, ວິຊາເຕັກນິກການແຕ່ງເອກະສານມີ 1 ວິຊາ, ມີຜູ້ເຂົ້າຮ່ວມຝຶກອົບຮົມທັງໝົດ 35 ທ່ານ, ຍິງ 13 ທ່ານ ມາຈາກບ້ານໃນເທດສະບານເມືອງມີ 24 ທ່ານ, ຍິງ 10 ທ່ານ, ມາຈາກຫ້ອງການອ້ອມຂ້າງເມືອງມີ 11 ທ່ານ, ຍິງ 3 ທ່ານ. ພ້ອມນັ້ນ, ທ່ານ ຍັງໄດ້ຍົກໃຫ້ເຫັນຈຸດດີ, ຈຸດອ່ອນ ແລະ ບາງບັນຫາທີ່ຕ້ອງໄດ້ປັບປຸງແກ້ໄຂໃນຕໍ່ໜ້າ. ຈາກນັ້ນ, ກໍໄດ້ມີການມອບໃບຢັ້ງຢືນ ແລະ ໃບຍ້ອງຍໍ ໃຫ້ແກ່ຜູ້ທີ່ສໍາເລັດການຝຶກອົບຮົມ ແລະ ຜູ້ທີ່ມີຜົນງານດີເດັ່ນໃນການຝຶກອົບຮົມຄັ້ງນີ້, ໃຫ້ກຽດມອບໂດຍ ທ່ານ ເພັດມີໄຊ ຄຳພັກດີ ເຈົ້າເມືອງ ສາມັກຄີໄຊ.
          ໃນຕອນທ້າຍ ທ່ານ ເຈົ້າເມືອງ ກໍໄດ້ໃຫ້ກຽດໂອ້ລົມ ຊຶ່ງທ່ານໄດ້ກ່າວຍ້ອງຍໍຊົມເຊີຍ ຕໍ່ຄະນະຮັບຜິດຊອບ, ຄູ - ອາຈານ ແລະ ຜູ້ເຂົ້າຮ່ວມຝຶກອົບຮົມ ທີ່ໄດ້ເອົາໃຈໃສ່ໃນການສິດສອນ ແລະ ຄົ້ນຄວ້າຮໍ່າຮຽນຈົນສໍາເລັດ ແລະ ໄດ້ເນັ້ນໜັກໃຫ້ຜູ້ເຂົ້າຮ່ວມຝຶກອົບຮົມ ຈົ່ງນຳເອົາຄວາມຮູ້, ຄວາມສາມາດທີ່ໄດ້ຮຽນມາໄປຜັນຂະຫຍາຍເຂົ້າໃນໜ້າທີ່ວຽກງານໃນຂອບເຂດທີ່ຕົນເອງຮັບຜິດຊອບ ໃຫ້ເກີດຜົນປະໂຫຍດສູງສຸດ.
ຂຽນຂ່າວ-ຖ່າຍພາບ: ທົງໄຊ
ປະເພດຂ່າວ: