ພະແນກຍຸຕິທຳແຂວງ ອັດຕະປື ຈັດກອງປະຊຸມປືກສາຫາລືກ່ຽວກັບຂັ້ນຕອນການສ້າງນິຕິກຳໃຕ້ກົດໝາຍ.

Primary tabs

          ໃນຕອນເຊົ້າ ຂອງວັນທີ 29 ກໍລະກົດ 2021 ນີ້ ຢູ່ທີ່ຫ້ອງປະຊຸມຂອງພະແນກຍຸຕິທຳແຂວງ ອັດຕະປື ໄດ້ຈັດກອງປະຊຸມປືກສາຫາລືແລກປ່ຽນຄຳຄິດຄຳເຫັນກ່ຽວກັບຂັ້ນຕອນການສ້າງນິຕິກຳໃຕ້ກົດໝາຍຂອງແຂວງ ໂດຍການເປັນປະທານຂອງ ທ່ານ ຄຳຫຼ້າ ແກ້ວວັນສອນ ເລຂາໜ່ວຍພັກ ຫົວໜ້າພະແນກຍຸຕິທຳແຂວງ, ມີຕາງໜ້າຈາກອົງການປົກຄອງແຂວງ, ສະພາປະຊາຊົນແຂວງ ແລະ ພະນັກງານຂະແໜງກົດໝາຍ ຂອງພະແນກຍຸຕິທຳ ເຂົ້າຮ່ວມ ທັງໝົດ 7 ທ່ານ ຍິງ 01 ທ່ານ.
          ໃນກອງປະຊຸມ ທ່ານນາງ ພຸດປະໄທ ບຸດສຳພັນ ຮັກສາການຫົວໜ້າຂະແໜງກົດໝາຍ ໄດ້ຜ່ານຄຳແນະນຳຂອງຄະນະປະຈຳສະພາແຫ່ງຊາດ ສະບັບເລກທີ 011/ຄປຈ, ລົງວັນທີ 19 ກໍລະກົດ 2017 ວ່າດ້ວຍການພິຈາລະນາຮັບຮອງເອົານິຕິກຳທີ່ສຳຄັນຂອງທ້ອງຖິ່ນ (ຂໍ້ຕົກລົງຂອງເຈົ້າແຂວງ) ແລະ ຄູ່ມືກ່ຽວກັບການສ້າງນິຕິກຳທີ່ສຳຄັນຂອງທ້ອງຖິ່ນ. ຈຸດປະສົງໃນການຈັດກອງປະຊຸມໃນຄັ້ງນີ້ ແມ່ນເພື່ອປືກສາຫາລືແລກປ່ຽນຄຳຄິດຄຳເຫັນກ່ຽວກັບການປະຕິບັດວຽກງານຕົວຈິງກ່ຽວກັບຂັ້ນຕອນການສ້າງນິຕິກຳໃຕ້ກົດໝາຍທີ່ມີຜົນບັງຄັບທົ່ວໄປ ທີ່ສຳຄັນຂອງແຂວງ ກໍຄື ຂໍ້ຕົກລົງຂອງເຈົ້າແຂວງ, ເພື່ອເຮັດໃຫ້ວຽກງານການສ້າງນິຕິກຳໃຕ້ກົດໝາຍຂັ້ນທ້ອງຖິ່ນໄດ້ຮັບການຈັດຕັ້ງປະຕິບັດ ແລະ ໃຫ້ທຸກພາກສ່ວນທີ່ກ່ຽວຂ້ອງເຂົ້າໃຈກ່ຽວກັບຂັ້ນຕອນການດຳເນີນການສ້າງນິຕິກຳໃຫ້ມີຄວາມຖືກຕ້ອງຕາມກົດໝາຍ ແລະ ລະບຽບການທີ່ກຳນົດໄວ້.
          ໃນຕອນທ້າຍກອງປະຊຸມ ທ່ານປະທານກອງປະຊຸມກໍ່ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງທ່ານໄດ້ເນັ້ນໃຫ້ທຸກພາກສ່ວນທີ່ກ່ຽວຂ້ອງ ຕ້ອງໄດ້ເຮັດໜ້າທີ່ປະສານສົມທົບກັນເພື່ອໃຫ້ມີຄວາມສະດວກວ່ອງໄວທາງດ້ານເອກະສານ ເພື່ອເຮັດໃຫ້ວຽກງານການສ້າງນິຕິກຳໃຕ້ກົດໝາຍທີ່ມີຜົນບັງຄັບທົ່ວໄປ ສາມາດຈັດຕັ້ງປະຕິບັດໄດ້ ແລະ ມີປະສິດທິຜົນຕາມຕາມກົດໝາຍວ່າດ້ວຍການສ້າງນິຕິກຳ.
ຂ່າວ: ທົງໄຊ ຈຳສິນ
ຖ່າຍພາບ: ທິດເທວາ ຄົມມາລາ
ປະເພດຂ່າວ: