ພະແນກຍຸຕິທໍາແຂວງ ໄດ້ຮັບຟັງການປາຖະກະຖາວັນວັນສຳຄັນຂອງຊາດ ແລະ ເຊື່ອມຊຶມເອກະສານສຳຄັນ

Primary tabs

          ໃນຕອນເຊົ້າ ວັນທີ 18 ສິງຫາ 2021 ຜ່ານມານີ້ ທີ່ຫ້ອງປະຊຸມຂອງພະແນກຍຸຕິທໍາແຂວງ ຫຼວງພະບາງ ໄດ້ຈັດມີພິທີປາຖະກະຖາເຜີຍແຜ່ວັນລັດຖະທໍາມະນູນ( 15 ສິງຫາ 1991 – 15 ສິງ 2021 ) ແລະ ເຊື່ອມຊຶມເອກະສານການເພີ່ມທະວີສຶກສາອົບຮົມການເມືອງ-ແນວຄິດ ແລະ ວັດທະນະທໍາໃນໄລຍະໃໝ່ ໂດຍໃຫ້ກຽດເຜີຍແຜ່ຂອງ ທ່ານ ມີໄຊ ໄຊເກີຢ່າຈົ່ງຕົວ ກໍາມະການພັກແຂວງ ຫົວໜ້າພະແນກຍຸຕິທໍາແຂວງ ມີຄະນະພັກ, ຄະນະພະແນກ, ຫົວໜ້າຂະແໜງ, ຮອງຫົວໜ້າຂະແໜງ, ຫົວໜ້າ, ຮອງຫົວໜ້າຫ້ອງການທະນາຍຄວາມ, ພະນັກງານວິຊາການພາຍໃນພະແນກ ແລະ ຫ້ອງການທະນາຍຄວາມເຂົ້າຮ່ວມ.
อาจเป็นรูปภาพของ 4 คน, ผู้คนกำลังยืน, ผู้คนกำลังนั่ง และสถานที่ในร่ม
          ທ່ານ ນາງ ທອງສວຍ ອິນທະເສນ ຮັກສາການຂະແໜງບໍລິຫານແຜນການ ແລະ ການເງິນ ໄດ້ຂຶ້ນຜ່ານໜັງສືແຈ້ງການຂອງຫ້ອງວ່າການແຂວງ ຫຼວງພະບາງ ເລກທີ 638/ຫປຂ-ຫຼບ, ລົງວັນທີ 12 ສິງຫາ 2021, ແຈ້ງການຂອງເຈົ້ານະຄອນ ຫຼວງພະບາງ ສະບັບເລກທີ 43/ຈນ-ຫຼບ, ລົງວັນທີ 5 ສິງຫາ 2021 ວ່າດ້ວຍການເພີ່ມທະວີປົກປັກຮັກສາຄວາມປອດໄພຕໍ່ຊີວິດ, ວັດຖຸສິ່ງຂອງ ແລະ ສະຖານທີ່ຕ່າງໆທີ່ຂຶ້ນກັບຄວາມຮັບຜິດຊອບຂອງຕົນ ແລະ ຂໍ້ຕົກລົງຂອງຫົວໜ້າພະແນກຍຸຕິທໍາແຂວງ ສະບັບເລກທີ 253/ຍຕຂ-ຫຼບ, ລົງວັນທີ21 ກໍລະກົດ 2021 ວ່າດ້ວຍການແຕ່ງຕັ້ງຜູ້ຮັກສາການ ຫົວໜ້າຂະແໜງຈັດຕັ້ງປະຕິບັດຄໍາຕັດສິນຂອງສານ
          ໃນພິທີດັ່ງກ່າວ ທ່ານ ມີໄຊ ໄຊເກີຢ່າຈົ່ງຕົວ ກໍໄດ້ເຊື່ອມຊຶມເອກະສານການເພີ່ມທະວີສຶກສາອົບຮົມການເມືອງ-ແນວຄິດ ແລະ ວັດທະນະທໍາໃນໄລຍະໃໝ່, ຄໍາແນະນໍາກ່ຽວກັບການຈັດຕັ້ງປະຕິບັດກົດລະບຽບຂອງພັກປະຊາຊົນປະຕິວັດລາວສະໄໝທີ VII ເລກທີ 102/ປສຈບ, ລົງວັນທີ 24 ມິຖຸນາ 2021 ໃຫ້ຈັດຕັ້ງປະຕິບັດກົດລະບຽບຂອງພັກ, ໃຫ້ຄະນະພັກ, ສະມາຊິກພັກກໍາແໜ້ນ, ຮັບຮູ້ໃຫ້ຢ່າງຈະແຈ້ງ, ເຂົ້າໃຈຢ່າງເລີກເຊິ່ງ, ເປັນເຈົ້າການເຄົາລົບກົດລະບຽບຂອງພັກປະຊາຊົນປະຕິວັດລາວຢ່າງເຂັ້ມງວດ, ຜູ້ທີ່ຈະເຂົ້າເປັນສະມາຊິກພັກ ຕ້ອງມີມາດຖານ, ເງື່ອນໄຂ, ມີຕົ້ນກໍາເນີດ ແລະ ຊີວະປະຫວັດການເຄື່ອນໄຫວຈະແຈ້ງ, ຂາວສະອາດ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ ແລະ ຜູ້ທີ່ຈະເຂົ້າເປັນສະມາຊີກພັກຕ້ອງໄດ້ເຂົ້າເປັນສະມາຊິກຊາວໜຸ່ມ, ແມ່ຍິງ, ແລະ ກໍາມະບານກ່ອນຈຶ່ງຈະເຂົ້າພັກໄດ້.
ຈາກນັ້ນກໍຍັງໄດ້ຮັບຟັງການປະຖະກະຖາເລົ່າມູນເຊື້ອຄວາມເປັນມາຂອງລັດຖະທໍາມະນູນ ແລະ ວັນສ້າງຕັ້ງສານປະຊາຊົນ ໂດຍທ່ານໄດ້ຍົກໃຫ້ຮູ້ວ່າ: ລັດຖະທໍາມະນູນ ສະບັບທໍາອິດແຫ່ງ ສປປລາວໄດ້ຮັບການພິຈາລະນາຮັບຮອງເອົາຈາກກອງປະຊຸມສະໄໝສາມັນເທື່ອທີ່ 6 ຂອງສະພາປະຊາຊົນສູງສຸດ ຊຸດທີ່ 2 ໄດ້ຮັບການປະກາດໃຊ້ໂດຍປະທານປະເທດແຫ່ງສປປລາວ ໃນວັນທີ 15 ສິງຫາ ປີ 1991 ໄດ້ຮັບການປັບປຸງໃນປີ 2003 ປະກອບມີ 11 ໝວດ, 98 ມາດຕາ. ມາເຖິງປີ 2015 ເຊິ່ງແມ່ນໄລຍະຜັນຂະຫຍາຍມະຕິກອງປະຊຸມໃຫຍຄັ້ງທີ IX ຂອງພັກປຊາຊົນປະຕິວັດລາວ ທີ່ເລັ່ງທວງໃຫ້ຕ້ອງມີການປັບປຸງບູລະນະອໍານາດລັດຂັ້ນຕ່າງໆໃຫ້ເປັນລະບົບ ແລະ ເຂັ້ມແຂງ, ຈຶ່ງມີຄວາມຈໍາເປັນຕ້ອງໄດ້ປັບປຸງລັດຖະທໍາມະນູນເປັນເທື່ອທີ່ 2 ປີ 2015 ສະບັບນໍາໃຊ້ປັດຈຸບັນ ມີທັງໝົດ 14 ໝວດ, 119 ມາດຕາ. ລັດຖະທໍາມະນູນສະບັບດັ່ງກ່າວ ແມ່ນກົດໝາຍພື້ນຖານຂອງຊາດ, ທຸກກົດໝາຍຕ້ອງສອດຄ່ອງກັບລັດຖະທໍາມະນູນ ແລະ ເປັນພື້ນຖານສໍາຄັນທາງດ້ານນິຕິກໍາໃຫ້ແກ່ການຫັນແນວທາງປ່ຽນແປງໃໝ່, ຢ່າງມີຫຼັກການຂອງພັກປະຊາຊົນປະຕິວັດລາວ ມາເປັນກົດເກນພື້ນຖານຂອງລະບອບປະຊາທິປະໄຕ ປະຊາຊົນລາວ, ເພີ້ມທະວີຄວາມສາມັກຄີປວງຊົນທັງຊາດເຊີດຊູບົດບາດເປັນເຈົ້າການໃນການປົກປັກຮັກສາ ສ້າງສາພັດທະນາປະເທດຊາດ ຕາມຈຸດໝາຍທີ່ພັກໄດ້ກໍານົດໄວ້. ໃນດ້ານທາດແທ້ກໍແມ່ນການສ້າງສະຕິຊາດ, ເອກະພາບອັນໜຶ່ງອັນດຽວ, ພາຍໃຕ້ການນໍາພາຂອງພັກ, ຮັບຮູ້ ແລະປົກປ້ອງການ ດໍາລົງຄົງຕົວ ທີ່ບໍ່ຕັດແຍກອອກຈາກກັນໄດ້ຂອງປະຊາຊົນບັນດາເຜົ່າ ເປັນພາຫະນາທີ່ສໍາຄັນ ເພື່ອສຶກສາອົບຮົມປະຊາຊົນ ໃນການຍົກສູງນໍ້າໃຈຮັກຊາດ, ຮັກລະບອບປະຊາທິປະໄຕ ປະຊາຊົນ, ເພີ້ມທະວີຄວາມສາມັກຄີປອງດອງທົ່ວປວງຊົນທັງຊາດ, ເຊີດຊູບົດບາດ ແລະ ເປັນເຈົ້າການປະເທດຊາດກໍຄືປະຊາຊົນລາວບັນດາເຜົ່າ ເພື່ອພ້ອມກັນສຸມທຸກກໍາລັງວັງຊາ ແລະ ຄວາມສາມາດຂອງຕົນປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາຕາມແນວທາງປຽ່ນແປງໃໝ່ຂອງພັກເພື່ອແນໃສ່ເຮັດໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ມີປະຊາທີປະໄຕ, ຍຸຕິທໍາ ແລະ ສີວິໄລ.
ຂ່າວ ແລະ ພາບ: ນາງ ມະໄລກອນ ສິນທ່າວ
ປະເພດຂ່າວ: