ສ້າງຄວາມເຂັ້ມແຂງວຽກງານຊ່ວຍເຫຼືອທາງດ້ານກົດໝາຍ ແລະ ວຽກງານໄກ່ເກັ່ຍຂໍ້ຂັດແຍ່ງຂັ້ນບ້ານໃຫ້ພະນັກງານຫຼັກແຫຼ່ງສອງແຂວງພາກເໜືອ

          ໃນວັນທີ 15 ມີນາ 2021 ຢູ່ທີ່ຫ້ອງປະຊຸມຂອງຫ້ອງວ່າການປົກຄອງແຂວງ ຫຼວງນໍ້າທາ ໄດ້ເປີດຊຸດຝຶກອົບຮົມວຽກງານຊ່ວຍເຫຼືອທາງດ້ານກົດໝາຍ ແລະ ວຽກງານໄກ່ເກັ່ຍຂໍ້ຂັດແຍ່ງຂັ້ນບ້ານຂຶ້ນ ໂດຍການເປັນປະທານຮ່ວມ ຂອງທ່ານ ເພັດສະຫວັນ ສີພົມມະຈັນ ຮອງຫົວໜ້າພະແນກຍຸຕິທໍາແຂວງ ຫຼວງນໍ້າທາ ແລະ ທ່ານ ບຸນຊ່ວງ ທະວີສັກ ຮອງຫົວໜ້າກົມສົ່ງເສີມລະບົບຍຸຕິທໍາ ກະຊວງຍຸຕິທໍາ, ມີຜູ້ຕາງໜ້າ ຈາກ ມູນນິທິເອເຊຍ ປະຈໍາລາວ, ພະນັກງານ-ລັດຖະກອນ, ຫ້ອງການຍຸຕິທໍາແຂວງ ອຸດົມໄຊ ແລະ ພະນັກງານ-ລັດຖະກອນ ເມືອງ ສິງ ແລະ ເມືອງ ລອງ ແຂວງ ຫຼວງນໍ້າທາ ເຂົ້າຮ່ວມທັງໝົດ 40 ທ່ານ, ຍິງ 9 ທ່ານ.
          ທ່ານ ເພັດສະຫວັນ ສີພົມມະຈັນ ໄດ້ກ່າວໃຫ້ຮູ້ວ່າ ຈຸດປະສົງຂອງການເປີດຊຸດຝຶກອົບຮົມຄັ້ງນີ້ ເພື່ອຍົກລະດັບຄວາມຮູ້, ຄວາມສາມາດ ໃຫ້ພະນັກງານທີ່ຮັບຜິດຊອບວຽກງານດັ່ງກ່າວ ໃຫ້ເປັນເຈົ້າການໃນການປະຕິບັດໜ້າທີ່ວຽກງານ ການຝຶກອົບຮົມ ມີຄວາມສໍາຄັນຫຼາຍຕໍ່ກັບວຽກງານຍຸຕິທໍາຮາກຖານ ໂດຍສະເພາະ ແມ່ນວຽກງານຊ່ວຍເຫຼືອທາງດ້ານກົດໝາຍ ເພາະວ່າໄລຍະຜ່ານມາ ການຈັດຕັ້ງປະຕິບັດວຽກງານ ມີຄວາມຊັບສົນຫຼາຍ, ບໍ່ໄປຕາມຂັ້ນຕອນ ແລະ ບໍ່ທັນເປັນລະບົບ.
ຊຸດຝຶກອົບຮົມຄັ້ງນີ້ ຜູ້ເຂົ້າຮ່ວມຈະໄດ້ຮັບຟັງການບັນຍາຍຈາກຜູ້ຊ່ຽວຊານ, ອາຈານ ທີ່ມາຈາກສູນກາງ ແລະ ການມີສ່ວນຮ່ວມໃນການຄົ້ນຄ້ວາປະກອບຄໍາເຫັນຕໍ່ການປະຕິບັດວຽກງານຕົວຈິງທີ່ເກີດຂຶ້ນ ໃນໄລຍະຜ່ານມາຢູ່ທ້ອງຖິ່ນຂອງຕົນ ມາແລກປ່ຽນບົດຮຽນຊຶ່ງກັນ ແລະ ກັນ ໃຫ້ມີຄວາມເຂົ້າໃຈຫຼາຍຂຶ້ນ ເພື່ອນໍາໄປຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າ ໃຫ້ມີຄວາມເປັນເອກະພາບໃນຂອບເຂດທົ່ວປະເທດ ຊຸດຝຶກອົບຮົມຈະດໍາເນີນໄປເປັນເວລາ 5 ວັນ.
ຂຽນຂ່າວ ແລະ ພາບຖ່າຍ: ສຸມີໄຊ ວົງຕະສີ