ກອງປະຊຸມຄົ້ນຄ້ວາ, ປຶກສາຫາລື, ເພື່ອປັບປຸງນິຕິກໍາລຸ່ມກົດໝາຍຂອງບັນດາພະແນກການທີ່ສະພາປະຊາຊົນຂັ້ນແຂວງຮັບຮອງ ແລະ ເຈົ້າແຂວງໄດ້ຕົກລົງປະກາດໃຊ້ແລ້ວ.

Primary tabs

          ໃນຕອນເຊົ້າຂອງວັນທີ 3 ກຸມພາ ປີ 2021 ຜ່ານມາ ທີ່ຫ້ອງປະຊຸມພະແນກຍຸຕິທໍາແຂວງ ສາລະວັນ ໄດ້ເປີດກອງປະຊຸມ ຄົ້ນຄ້ວາ, ປຶກສາ, ຫາລືກັບບັນດາພະແນກການຂອງແຂວງກ່ຽວກັບນິຕິກຳລຸ່ມກົດໝາຍທີ່ຖືກຮັບຮອງ ແລະ ປະກາດໃຊ້ແລ້ວ ໂດຍການເປັນປະທານຂອງ ທ່ານ ອໍາຄາ ຄຽ່ມມະນີຂັນໄຊ ຫົວໜ້າພະແນກພະແນກຍຸຕິທໍາແຂວງ, ມີຄະນະຮັບຜິດຊອບສ້າງຮ່າງນິຕິກໍາລຸ່ມກົດໝາຍຂັ້ນແຂວງ, ພະແນກການອ້ອມຂ້າງແຂວງ, ພ້ອມດ້ວຍພະນັກງານວິຊາການເຂົ້າຮ່ວມ 13 ທ່ານ, ຍິງ 3 ທ່ານ.

          ຈຸດປະສົງເປີດກອງປະຊຸມໃນຄັ້ງນີ້ ເພື່ອຊຸກຍູ້, ແນະນໍາໃຫ້ບັນດາພະແນກການອ້ອມຂ້າງແຂວງນໍາອົາບັນດານິຕິກໍາລຸ່ມກົດໝາຍທີ່ສະພາປະຊາຊົນແຂວງຮັບຮອງ ແລະ ເຈົ້າແຂວງໄດ້ປະກາດໃຊ້ແລ້ວນັ້ນມາປັບປຸງຄືນໃໝ່ທາງດ້ານເນື້ອໃນ, ຂໍ້ກໍານົດຕ່າງໆທີ່ເຫັນວ່າຍັງບໍ່ທັນຄົບຖ້ວນ, ເພື່ອໃຫ້ຖືກຕ້ອງ, ສອດຄ່ອງກັບລັດຖະທໍາມະນູນ ແລະ ກົດໝາຍ. ເຊິ່ງໄລຍະຜ່ານມາ ມີນິຕິກໍາທີ່ສະພາປະຊາຊົນຂັ້ນແຂວງຮັບຮອງ ແລະ ເຈົ້າແຂວງໄດ້ຕົກລົງປະກາດໃຊ້ແລ້ວຈໍານວນ 7 ສະບັບ. ກອງປະຊຸມກະກຽມປັບປຸງນິຕິກໍາລຸ່ມກົດໝາຍຄັ້ງນີ້ແມ່ນມີຄວາມໝາຍ,ຄວາມສໍາຄັນຢ່າງຍິ່ງສໍາລັບແຂວງສາລະວັນ, ເພື່ອເປັນການກະກຽມນໍາເອົາບັນດານິຕິກໍາລຸ່ມກົດໝາຍຂອງແຕ່ລະພະແນກການທີ່ຈະໄດ້ປັບປຸງໃໝ່ນັ້ນເຂົ້າພິຈາລະນາໃຫ້ທັນຕາມກໍານົດເວລາ. ໃນກອງປະຊຸມຜູ້ເຂົ້າຮ່ວມກໍໄດ້ມີຄວາມຮັບຜິດຊອບສູງປະກອບຄໍາຄິດ, ຄໍາເຫັນຢ່າງກົງໄປກົງມາໃສ່ບັນດານິຕິກໍາລຸ່ມກົດໝາຍທີ່ສະພາປະຊາຊົນແຂວງຮັບຮອງ ແລະ ປະກາດໃຊ້ແລ້ວນັ້ນ, ໂດຍສະເພາະແລ້ວແມ່ນການຄັ້ນຄ້ວາ, ການນໍາສະເໜີໄປຫາຄະນະຮັບຜິດຊອບສ້າງຮ່າງນິຕິກໍາລຸ່ມກົດໝາຍຂັັ້ນແຂວງ ເພື່ອເອົາເຂົ້າຜ່ານກໍາມະທິການກົດໝາຍຂອງສະພາປະຊາຊົນຂັ້ນແຂວງ, ເພື່ອໃຫ້ເອົາເຂົ້າພິຈາລະນາ ແລະ ຮັບຮອງເອົາໃນກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງ ສາລະວັນ ຊຸດທີ II ທີ່ຈະໄດ້ໄຂຂຶ້ນຢ່າງເປັນທາງການໃນຕໍ່ໜ້ານີ້.

          ຕອນທ້າຍຜູ້ເຂົ້າຮ່ວມກອງປະຊຸມກໍໄດ້ຮັບຟັງການໂອ້ລົມຂອງປະທານ, ເຊິ່ງທ່ານໄດ້ມີຄໍາຄິດ, ຄໍາເຫັນ ແລະ ຮຽກຮອງໃຫ້ຄະນະຮັບຜິດຊອບສ້າງຮ່າງນິຕິກໍາລຸ່ມກົດໝາຍຂັ້ນແຂວງ, ພະແນກການອ້ອມຂ້າງແຂວງໃຫ້ເອົົາໃຈໃສ່, ຍົກສູງຄວາມຮັບຜິດຊອບໃນການຄົ້ນຄ້ວາບັນດານິຕິກໍາທີ່ສະພາປະຊາຊົນແຂວງຮັບຮອງ ແລະ ປະກາດໃຊ້ແລ້ວນັ້ນ, ໃຫ້ມີເນື້ອໃນຄົບຖ້ວນ, ວາງມາດຕະການໃນການຈັດຕັ້ງປະຕິບັດເພື່ອຮັບປະກັນໃຫ້ມີຄວາມສະຫງົບ, ຖືກຕ້ອງ ແລະ ສອດຄ່ອງກັບລະບຽບກົດໝາຍທີ່ກໍານົດໄວ້.

ຂຽນຂ່າວໂດຍ: ຄູນວິໄລ ຈັນທະເຮືອງສິງ

ຖ່າຍພາບ: ສຸພາພອນ ມີລຸນສາ

ປະເພດຂ່າວ: