ເປີດຊຸດຝຶກອົບຮົມ ວຽກງານຊ່ວຍເຫຼືອທາງດ້ານກົດໝາຍ ແລະ ວຽກງານແກ້ໄຂຂໍ້ຂັດແຍ່ງຂັ້ນບ້ານ ທີ່ແຂວງ ສະຫວັນນະເຂດ

Primary tabs

      ຢູ່ທີ່ພະແນກຍຸຕິທຳແຂວງ ສະຫວັນນະເຂດ ໃນວັນທີ 22 ມີນາ 2021 ກົມສົ່ງເສີມລະບົບຍຸຕິທຳ ກະຊວງຍຸຕິທຳ ຮ່ວມກັບພະແນກຍຸຕິທຳແຂວງ ສະຫວັນນເຂດ ໄດ້ເປີດຊຸດຝຶກອົບຮົມ ວຽກງານຊ່ວຍເຫຼືອທາງດ້ານກົດໝາຍ ແລະ ວຽກງານແກ້ໄຂຂໍ້ຂັດແຍ່ງຂັ້ນບ້ານຂຶ້ນ ພາຍໃຕ້ການເປັນປະທານຮ່ວມຂອງ ທ່ານ ສີສຸກ ເທບທານີ ຮອງຫົວໜ້າພະແນກຍຸຕິທຳແຂວງ ແລະ ທ່ານ ສີສຸພັນ ທອງສາຍທາລາ ຮອງຫົວໜ້າກົມ ສົ່ງເສີມລະບົບຍຸຕິທຳ. ເຂົ້າຮ່ວມມີ ທ່ານຜູ້ຕາງໜ້າຈາກມູນນິທິເອເຊຍ ປະຈຳລາວ, ບັນດາຄູຝຶກ, ຜູ້ເຂົ້າຮ່ວມຝຶກອົບຮົມ ຂະແໜງສົ່ງເສີມວຽກງານຍຸຕິທຳ, ຂະແໜງໂຄສະນາເຜີຍແຜ່ກົດໝາຍ ພ້ອມດ້ວຍ ຫົວໜ້າ, ຮອງຫົວໜ້າຫ້ອງການຍຸຕິທຳເມືອງ, ຫົວໜ້າໜ່ວຍງານ ແລະ ວິຊາການ ໃນ 14 ເມືອງ ແລະ 1 ນະຄອນ ຂອງແຂວງ ເຂົ້າຮ່ວມທັງໝົດ 50 ທ່ານ, ຍິງ 14 ທ່ານ.

     ພາຍຫຼັງທີ່ຄະນະຮັບຜິດຊອບກອງປະຊຸມ ໄດ້ສະເໜີກ່ຽວກັບຈຸດປະສົງຂອງການຝຶກອົບຮົມໃນຄັ້ງນີ້ແລ້ວ ທ່ານ ປະທານກອງປະຊຸມກໍໄດ້ມີຄຳເຫັນ ແລະ ກ່າວເປີດຊຸດຝືກອົບຮົມຢ່າງເປັນທາງການ ຊຶ່ງທ່ານໄດ້ເນັ້ນໜັກໃຫ້ບັນດາຜູ້ເຂົ້າຮ່ວມທຸກໆທ່ານ ຈົ່ງໄດ້ເອົາໃຈໃສ່ ຕິດຕາມ, ຄົ້ນຄວ້າຂັ້ນຕອນ, ວິທີການດຳເນີນການແກ້ໄຂຂໍ້ຂັດແຍ່ງ ພ້ອມດ້ວຍວິທີການ ແລະ ຂັ້ນຕອນຂອງການຊ່ວຍເຫຼືອທາງດ້ານກົດໝາຍ ຈາກຜູ້ເຂົ້າຮ່ວມຝຶກອົບຮົມດ້ວຍຄວາມຮັບຜິດຊອບສູງ ເຮັດສຳເລັດ ແລະ ໄດ້ຮັບໝາກຜົນຕາມຈຸດປະສົງ ແລະ ລະດັບຄາດໝາຍທີ່ກຳນົດໄວ້.

     ຊຸດຝືກອົບຮົມວຽກງານຊ່ວຍເຫຼືອທາງດ້ານກົດໝາຍ ແລະ ວຽກງານແກ້ໄຂຂໍ້ຂັດແຍ່ງຂັ້ນບ້ານ ໃນຄັ້ງນີ້ຈະໄດ້ຈັດຂື້ນ ເປັນເວລາ 5 ວັນ ຊຶ່ງເລີ່ມແຕ່ວັນທີ 22 - 26 ມີນາ 2021 ຈຶ່ງຈະສຳເລັດລົງ.

 

                                                                                                                                                                                                                                                                                    ພາບ ຂ່າວ: ສົມຫວັງ ວິລະຫານ

 

ປະເພດຂ່າວ: