ພະແນກຍຸຕິທຳແຂວງ ສະຫວັນນະເຂດ ສະຫຼຸບປິດ ແລະ ມອບ-ຮັບໃບຢັ້ງຢືນບໍາລຸງກົດໝາຍຂັ້ນພື້ນຖານ 45 ວັນຊຸດທີ VIII ປີ 2020

Primary tabs

ໃນຕອນເຊົ້າຂອງວັນທີ 15 ທັນວາ 2020 ທີ່ຜ່ານມາ ຢູ່ທີ່ຫ້ອງປະຊຸມພະແນກຍຸຕິທຳແຂວງ ໄດ້ມີພິທີປິດການຮຽນ-ການສອນ ແລະ ມອບໃບຢັ້ງຢືນ ໃຫ້ນັກຝຶກອົບຮົມຈົບຫຼັກສູດກົດໝາຍ ຂັ້ນພື້ນຖານ ລະບົບບຳລຸງ 45 ວັນ ຊຸດທີ VIII ໃຫ້ພະນັກງານຫຼັກແຫຼ່ງຂັ້ນເມືອງ, ນະຄອນ ແລະ ແຂວງ ສົກປີ 2020, ໃຫ້ກຽດເຂົ້າຮ່ວມເປັນປະທານ ແລະ ມອບໃບຢັ້ງຢືນຂອງ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ, ໃນພິທີມີບັນດາແຂກ-ຄູອາຈານ ອ້ອມຂ້າງແຂວງ ແລະ ຝຶກອົບຮົມ ເຂົ້າຮ່ວມທັງໝົດ 70 ທ່ານ, ຍິງ 11 ທ່ານ.

          ໃນພິທີ ທ່ານ ສີສະຫວາດ ເພັງທະລັງສີ ເລຂາໜ່ວຍພັກ ຫົວໜ້າພະແນກຍຸຕິທຳແຂວງ ໄດ້ຜ່ານບົດສະຫຼຸບລາຍງານສະພາບການເຄື່ອນໄຫວປະຕິບັດຫຼັກສູດ ການຮຽນ-ການສອນ ຂອງຄູ-ອາຈານ ແລະ ນັກຝຶກອົບຮົມ ພ້ອມທັງສັງເກດຕີລາຄາດ້ານດີ, ດ້ານອອ່ນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃນໄລຍະຝືກອົບຮົມ, ທັງນີ້ກໍ່ເພື່ອເປັນການຍົກລະດັບຄວາມຮູ້-ຄວາມສາມາດທາງດ້ານກົດໝາຍ ໃຫ້ນັກຝຶກອົບຮົມ, ຫຼັກສູດການຮຽນ-ການສອນປະກອບມີ 38 ວິຊາ, ມີ 360 ຊົ່ວໂມງ, ສຳລັບຄູອາຈານໄດ້ຖືເອົາການບັນຍາຍ ການສົນທະນາບັນຫາ ພ້ອມທັງຍົກໃຫ້ເຫັນລະຫວ່າງທິດສະດີກັບພຶດຕິກຳເປັນຕົ້ນຕໍ, ສ່ວນນັກຝຶກອົບຮົມແມ່ນໄດ້ເອົາໃຈໃສ່ໃນການຄົ້ນຄ້ວາ-ຮໍ່າຮຽນຍົກເອົາເຫດການຕົວຈິງມາສົນທະນາແລກປ່ຽນບົດຮຽນເຊີ່ງກັນ ແລະ ກັນ, ນັກຝຶກອົບຮົມທີ່ໄດ້ຮັບໃບຢັ້ງຢືນ ທັງໝົດ 40 ທ່ານ, ຍິງ 11 ທ່ານ ແລະ ສາມາດຄັດເລືອກໄດ້ນັກຝຶກອົບຮົມທີ່ມີຜົນງານດີເດັ່ນປະເພດ 1 ໄດ້ 27 ທ່ານ , ຍິງ 04 ທ່ານ, ເດັ່ນປະເພດ 2 ຈຳນວນ 17 ທ່ານ ຍິງ 07 ທ່ານ ນອກນີ້ກໍ່ໄດ້ຍ້ອງຍໍຊົມເຊີຍໃຫ້ຄະນະຮັບຜິດຊອບ-ຄູອາຈານ ແລະ ບຸກຄົນທີ່ໄດ້ປະກອບສ່ວນເຂົ້າໃນຊຸດເຝືກອົບຮົມອີກດ້ວຍ.

       ໃນຕອນທ້າຍພິທີ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ໄດ້ໃຫ້ກຽດໂອ້ລົມ, ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການນຳຂອງພະແນກ ກໍ່ຄືຄະນະຮັບຜິດຊອບຄູ-ອາຈານ ທີ່ໄດ້ເອົາໃຈໃສ່ໃນການຊີ້ນຳ-ນຳພາ ຄົ້ນຄ້ວາກະກຽມເນື້ອໃນ, ຫຼັກສູດ-ຕຳລາຮຽນ ແລະ ບຸກຄະລາກອນໃຫ້ທ່ວງທັນກຳນົດເວລາ, ທ່ານໄດ້ມີຄຳເຫັນເນັ້ນຕື່ມອີກ ໃຫ້ຄະນະຮັບຜິດຊອບການຮຽນ-ການສອນ ສືບຕໍ່ຂື້ນແຜນໃຫ້ໄດ້ເປີດຮຽນ 1-2 ຊຸດ ຕໍ່ປີ, ສຳລັບນັກຝຶກອົບຮົມ ພາຍຫຼັງສຳເລັດການຝືກອົບຮົມໃນຄັ້ງນີ້ ໃຫ້ນຳເອົາບົດຮຽນ, ນຳເອົາຄວາມຮູ້-ຄວາມສາມາດດ້ານກົດໝາຍຕ່າງໆໄປຈັດຕັ້ງປະຕິບັດ ພ້ອມທັງຜັນຂະຫຍາຍເຂົ້າໃນໜ້າທີ່ວຽກງານ ທີ່ຕິດພັນກັບພາລະບົດບາດກົມກອງຂອງຕົນໃຫ້ໄດ້ຮັບຜົນດີ ແລະ ມີປະສິດທິຜົນດີຂື້ນເລື້ອຍໆ.

                                                                                                                                                                                                                                                                                                                                                                                ຂ່າວໂດຍ : ພູເພັດ ໄຊຍະວົງ ແລະ ພາບໂດຍ : ລຳເງິນ ໄຊຍະວົງສາ

ປະເພດຂ່າວ: