ເມືອງ ວຽງຄຳ ແຂວງ ວຽງຈັນ ປິດຊຸດເຝິກອົບຮົມກົດໝາຍໄລຍະສັ້ນ 45 ວັນ

Primary tabs

          ຫ້ອງການຍຸຕິທຳເມືອງ ວຽງຄຳ ໄດ້ຈັດພິທີປິດຊຸດຝຶກອົບຮົມບຳລຸງກົດໝາຍໄລຍະສັ້ນ 45 ວັນ ຊຸດທີ II ຂຶ້ນ ໃນວັນທີ 25 ກຸມພາ 2021 ທີ່ຫ້ອງວ່າການປົກຄອງເມືອງ ວຽງຄຳ ແຂວງ ວຽງຈັນ ໂດຍການເປັນປະທານຂອງທ່ານ ພອນແກ້ວ ຂຸນພົນ ເຈົ້າເມືອງ ວຽງຄຳ. ມີຄະນະຮັບຜິດຊອບ ແລະ ພາກສ່ວນກ່ຽວຂ້ອງເຂົ້າຮ່ວມ.
          ໃນພິທີ ທ່ານ ນາງ ພວງແກ້ວ ຊົມພູວິເສດ ຫົວໜ້າຫ້ອງການຍຸຕິທຳເມືອງ ວຽງຄຳ ໄດ້ຂຶ້ນຜ່ານບົດສະຫຼຸບຂອງການຝຶກອົບຮົມໃນຄັ້ງນີ້ ຊຶ່ງທ່ານໄດ້ໃຫ້ຮູ້ວ່າ ຊຸດຝຶກອົບຮົມແມ່ນໄດ້ດຳເນີນມາຕັ້ງແຕ່ວັນທີ 23 ທັນວາ 2020 ມີຜູ້ເຂົ້າຮ່ວມຝຶກອົບຮົມທັງໝົດ 50 ທ່ານ, ຍິງ 24 ທ່ານ ມາຈາກບ້ານ 46 ທ່ານ, ຍິງ 23 ທ່ານ; ພະນັກງານ 4 ທ່ານ, ຍິງ 1 ທ່ານ; ມີຄູຝຶກມາຈາກຂະແໜງການທີ່ກ່ຽວຂ້ອງ 32 ທ່ານ, ຍິງ 9 ທ່ານ. ມີ 34 ວິຊາຮຽນ, 22,5 ໜ່ວຍກິດ, 360 ຊົ່ວໂມງຮຽນ. ສະຖານທີ່ຝຶກອົບຮົມ ແມ່ນນສູນຊາວໜຸ່ມແຂວງ ວຽງຈັນ. ພ້ອມນັ້ນ, ທ່ານຍັງຍົກໃຫ້ເຫັນຈຸດດີ, ຈຸດອ່ອນ ແລະ ບາງບັນຫາທີ່ຕ້ອງໄດ້ປັບປຸງແກ້ໄຂໃນຕໍ່ໜ້າ. ຈາກນັ້ນ, ກໍໄດ້ມີການມອບໃບຢັ້ງຢືນ ແລະ ໃບຍ້ອງຍໍ ໃຫ້ແກ່ຜູ້ທີ່ສໍາເລັດກການຝຶກອົບຮົມ ແລະ ຜູ້ທີ່ມີຜົນງານດີເດັ່ນໃນການຝຶກອົບຮົມຄັ້ງນີ້ ໃຫ້ກຽດມອບໂດຍ ທ່ານ ພອນແກ້ວ ຂຸນພົນ ເຈົ້າເມືອງ ວຽງຄຳ.
          ຕອນທ້າຍພິທີ ທ່ານປະທານໄດ້ມີຄຳເຫັນໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບທີ່ໄດ້ເອົາໃຈໃສ່ ຈົນເຮັດໃຫ້ຊຸດຝຶກອົບຮົມຄັ້ງນີ້ໄດ້ຮັບຜົນສໍາເລັດ; ຍ້ອງຍໍຊົມເຊີຍບັນດາຄູຝຶກທີ່ໄດ້ເອົາໃຈໃສ່ຖ່າຍທອດບົດຮຽນ, ຄວາມຮູ້ ໃຫ້ແກ່ຜູ້ເຂົ້າຮ່ວມຝຶກອົບຮົມ ໂດຍສະເພາະ ທາງດ້ານທິດສະດີ ແລະ ການຈັດຕັ້ງປະຕິບັດຕົວຈິງ ແລະ ທ່ານຍັງໄດ້ຮຽກຮ້ອງມາຍັງຜູ້ທີ່ສໍາເລັດໃນການຝຶກອົບຮົມທຸກຄົນ ຕ້ອງສືບຕໍ່ຄົ້ນຄ້ວານຳເອົາບົດຮຽນດັ່ງກ່າວ ໄປຈັດຕັ້ງຜັນຂະຫຍາຍໃນໜ້າທີ່ຄວາມຮັບຜິດຊອບຂອງຕົນ ໃຫ້ເກີດຜົນປະໂຫຍດສູງສຸດ ເພື່ອຫຼຸດຜ່ອນປາກົດການຫຍໍ້ທໍ້ທີ່ຈະເກີດຂຶ້ນພາຍໃນບ້ານຂອງຕົນໃຫ້ໜ້ອຍທີ່ສຸດ ຮັບປະກັນເຮັດໃຫ້ມີຄວາມສີວິໄລ ແລະ ຍຸຕິທຳ ຂຶ້ນເທື່ອລະກ້າວ.
ຂຽນຂ່າວ-ຖ່າຍພາບ: ຊາຍພິມພອນ ສີຣິວົງໄຊ