ພະແນກຍຸຕິທຳແຂວງ ຜົ້ງສາລີ ໄດ້ຮັບໃບຢັ້ງຢືນເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ຄັ້ງທີ I ປະຈໍາປີ 2020

Primary tabs

          ເພື່ອຕີລາຄາຄືນໝາກຜົນການຊີ້ນຳ-ນຳພາການຈັດຕັ້ງປະຕິບັດວຽກງານຂອງໜ່ວຍພັກໃນໄລຍະໜຶ່ງປີຜ່ານມາ ໃນຕອນເຊົ້າຂອງວັນທີ 4 ສິງຫາ 2021 ທີ່ຜ່ານມາ ພະແນກຍຸຕິທຳແຂວງຜົ້ງສາລີ ໄດ້ຈັດພິທີຮັບໃບຢັ້ງຢືນເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ຄັ້ງທີ່ I ປະຈຳປີ 2020 ຂຶ້ນທີ່ຫ້ອງປະຊຸມຂອງພະແນກຍຸຕິທຳແຂວງ ໂດຍການເປັນປະທານຂອງສະຫາຍ ຄຳເຫຼັກ ໃຈອີສານ ກຳມະການປະຈຳພັກແຂວງ, ຮອງເຈົ້າແຂວງ ຜົ້ງສາລີ, ມີທ່ານ ທອງຄຳ ລີລາວົງ ເລຂາໜ່ວຍພັກ, ຫົວໜ້າພະແນກຍຸຕິທຳແຂວງ, ພ້ອມດ້ວຍຄະນະພັກ, ຜູ້ຕາງໜ້າຈາກຄະນະຈັດຕັ້ງແຂວງ, ກວດກາແຂວງ, ຄະນະໂຄສະນາອົບຮົມແຂວງ, ເລຂາ, ຮອງເລຂາໜ່ວຍພັກຈາກພະແນກການອ້ອມຂ້າງແຂວງ ແລະ ສະມາຊິກພັກສົມບຸນ-ສຳຮອງ ພາຍໃນໜ່ວຍພັກພະແນກຍຸຕິທຳແຂວງເຂົ້າຮ່ວມທັງໝົດ 35 ສະຫາຍ, ຍິງ 9 ສະຫາຍ. ໃນພິທີ ສະຫາຍ ທອງຄຳ ລີລາວົງ ເລຂາໜ່ວຍພັກ ຫົວໜ້າພະແນກຍຸຕິທຳແຂວງກໍ່ໄດ້ຂຶ້ນຜ່ານຮ່າງບົດສະຫຼຸບການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນປະຈຳປີ 2020 ແລະ ທິດທາງແຜນການກໍ່ສ້າງໜ່ວຍພັກປະຈຳປີ 2021 ເຊິ່ງໜ່ວຍພັກພະແນກຍຸຕິທຳແຂວງມີສະມາຊິກພັກທັງໝົດ 25 ສະຫາຍ, ຍິງ 15 ສະຫາຍ ທີ່ໄດ້ນຳພາຈັດຕັ້ງປະຕິບັດວຽກງານວິຊາສະເພາະໃນ 8 ຂະແໜງການຂອງພະແນກຍຸຕິທຳແຂວງ ໃນໄລຍະ 1 ປີຜ່ານມາ ຄະນະໜ່ວຍພັກໄດ້ຖືເອົາວຽກງານການສຶກສາອົບຮົມການເມືອງ-ແນວຄິດເປັນວຽກງານທີ່ສຳຄັນ, ເອົາໃຈໃສ່ນຳເອົາແນວທາງນະໂຍບາຍຂອງພັກ, ມະຕິຄຳສັ່ງ, ລະບຽບກົດໝາຍຂອງລັດ ມາເຜີຍແຜ່ໃຫ້ແກ່ສະມາຊິກພັກ-ພະນັກງານຢູ່ໃນຄວາມຮັບຜິດຊອບຂອງຕົນໂດຍຍຶດໝັ້ນ 5 ຫຼັກການ 3 ທິດນຳຂອງພັກ, ເອົາໃຈໃສ່ຫັນເອົາແນວທາງ, ແຜນນະໂຍບາຍຂອງພັກມາເປັນແຜນການອັນລະອຽດຂອງໜ່ວຍພັກ ໂດຍສອດຄ່ອງກັບໜ້າທີ່, ວິຊາສະເພາະຈົນມີຜົນສຳເລັດ. ຈາກນັ້ນຕາງໜ້າຄະນະຈັດຕັ້ງແຂວງກໍ່ໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 1924/ຄພຂ.ຜລ, ລົງວັນທີ 14 ມິຖຸນາ 2021 ວ່າດ້ວຍການມອບໃບຢັ້ງຢືນເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2020. ໃຫ້ກຽດຂຶ້ນມອບໃບຢັ້ງຢຶນ ໂດຍ ສະຫາຍ ຄຳເຫຼັກ ໃຈອີສານ ກຳມະການປະຈຳພັກແຂວງ, ຮອງເຈົ້າແຂວງ ແລະ ຂຶ້ນຮັບໂດຍ ສະຫາຍ ທອງຄຳ ລີລາວົງ ເລຂາໜ່ວຍພັກ, ຫົວໜ້າພະແນກຍຸຕິທຳແຂວງ.
          ໃນຕອນທ້າຍຂອງພິທີ ສະຫາຍ ຄຳເຫຼັກ ໃຈອີສານ ຄະນະປະຈຳພັກແຂວງ, ຮອງເຈົ້າແຂວງ ກໍໄດ້ກ່າວສະແດງຄວາມຍ້ອງຍໍຊົມເຊີຍມາຍັງຄະນະພັກ, ສະມາຊິກພັກທີ່ຍາດໄດ້ຜົນງານ ໃນຕະຫຼອດໄລຍະໜຶ່ງປີທີ່ຜ່ານມາ ພ້ອມທັງເນັ້ນໃຫ້ເອົາໃຈໃສ່ຊີ້ນຳ-ນຳພາວຽກງານການເມືອງ-ແນວຄິດ, ວຽກງານວິຊາສະເພາະດ້ວຍຫຼາຍຮູບແບບ, ກຳແໜ້ນ ແລະ ເຊື່ອມຊຶມກົດລະບຽບຂອງພັກສະໄໝທີ XI, ກຳແໜ້ນ 5 ຫຼັກການ ແລະ 3 ທິດນຳໃຫ້ໜັກແໜ້ນ ແລະ ຮູ້ຜັນຂະຫຍາຍເຂົ້າໃນການນຳພາຂອງໜ່ວຍພັກ, ທັງຄຸ້ມຄອງ, ຕີລາຄາຄຸນນະພາບຂອງສະມາຊິກພັກ ແລະ ໜ່ວຍພັກ, ການຄົ້ນຄ້ວາຕົກລົງບັນຫາເປັນໝູ່ຄະນະ ເວົ້າ ແລະ ປະຕິບັດຕາມມະຕິ, ກົດລະບຽບຂອງພັກ ແລະ ກົດໝາຍຂອງລັດ, ເຮັດວຽກມີແຜນການ, ມີໂຄງການ, ມີການຊຸກຍູ້, ຕິດຕາມ, ກວດກາ ແລະ ສະຫຼຸບປະເມີນຜົນ, ຮັກສາຄວາມສາມັກຄີເປັນປຶກແຜ່ນ, ສືບຕໍ່ຮັກສາມູນເຊື້ອໜ່ວຍພັກປອດໃສ ເຂັ້ມແຂງ ໜັກແໜ້ນ ໃຫ້ໝັ້ນຄົງຕະຫຼອດໄປ.
ພາບ-ຂ່າວ: ທອງວັນ ສີສະຫວັນ
ປະເພດຂ່າວ: