ໜ່ວຍກຳມະບານຮາກຖານພະແນກຍຸຕິທຳແຂວງຜົ້ງສາລີເຊື່ອມຊຶມມະຕິກອງປະຊຸມໃຫ່ຍຄັ້ງທີ່ VIII ຜູ້ແທນກຳມະບານລາວທົ່ວແຂວງຜົ້ງສາລີແລະ ສະຫຼຸບການເຄື່ອນໄຫວຈັດຕັ້ງປະຕິບັດວຽກງານກຳມະບານຮາກຖານໃນໄລຍະ 6 ເດືອນຕົ້ນປີ

          ໃນຕອນເຊົ້າຂອງວັນທີ 6 ກໍລະກົດ 2021 ທີ່ຜ່ານມາ ທີ່ຫ້ອງປະຊຸມພະແນກຍຸຕິທຳແຂວງ ໄດ້ຈັດກອງປະຊຸມເຊື່ອມຊຶມມະຕິກອງປະຊຸມໃຫ່ຍຄັ້ງທີ VIII ຜູ້ແທນກຳມະບານລາວທົ່ວແຂວງ ຜົ້ງສາລີ ໂດຍການເປັນປະທານຂອງ ສະຫາຍ ຈັນສະໝອນ ຄຸນນະເລີດ ຮອງເລຂາໜ່ວຍພັກ, ຮອງຫົວໜ້າພະແນກຍຸຕິທຳແຂວງ ຜູ້ຊີ້ນຳອົງການຈັດຕັ້ງມະຫາຊົນ, ມີສະຫາຍ ນາງ ອຳໄພພອນ ຕ່ອມມະນີ ຄະນະບໍລິຫານງານສະຫະພັນກຳມະບານແຂວງ, ປະທານສະຫະພັນກຳມະບານຮາກຖານພະແນກຍຸຕິທຳແຂວງ, ມີບັນດາສະຫາຍຄະນະກຳມະບານ, ສະມາຊິກກຳມະບານພາຍໃນພະແນກຍຸຕິທຳແຂວງເຂົ້າຮ່ວມທັງໝົດ 25 ສະຫາຍ, ຍິງ 15 ສະຫາຍ.
          ໃນກອງປະຊຸມ ສະຫາຍ ນາງ ອຳໄພພອນ ຕ່ອມມະນີ ໄດ້ກ່າວຈຸດປະສົງ, ພ້ອມທັງກ່າວເປີດກອງປະຊຸມ ແລະ ໃຫ້ກຽດຂຶ້ນຜ່ານບັນດາເອກະສານດັ່ງກ່າວ, ເອກະສານທີ່ນຳມາເຊື່ອມຊຶມໃນຄັ້ງນີ້ມີບົດຜັນຂະຫຍາຍມະຕິກອງປະຊຸມໃຫ່ຍຄັ້ງທີ VIII ຜູ້ແທນກຳມະບານລາວທົ່ວແຂວງ ຜົ້ງສາລີ, ມະຕິກອງປະຊຸມຄົບຄະນະບໍລິຫານງານສະຫະພັນກຳມະບານແຂວງ ຄັ້ງທີ 2, ສະໄໝທີ VIII, ມະຕິຕົກລົງຂອງປະທານຄະນະບໍລິຫານງານສະຫະພັນກຳມະບານແຂວງ ວ່າດ້ວຍການແບ່ງໜ້າທີ່ຄວາມຮັບຜິດຊອບ ຊີ້ນຳແຕ່ລະຂົງເຂດຂອງບັນດາສະຫາຍ ຄະນະບໍລິຫານງານສະຫະພັນກຳມະບານແຂວງ ຊຸດທີ VIII. ຜ່ານການເຜີຍແຜ່ເຫັນວ່າ ສະມາຊິກກຳມະບານແຕ່ລະສະຫາຍແມ່ນໄດ້ຮັບຮູ້, ເຂົ້າໃຈຕໍ່ເນື້ອໃນຂອງເອກະສານກ່ຽວກັບການຈັດຕັ້ງປະຕິບັດວຽກງານກຳມະບານໃຫ້ປະກົດຜົນເປັນຈິງເທື່ອລະກ້າວ. ໃນກອງປະຊຸມຍັງໄດ້ຜ່ານບົດສະຫຼຸບຕີລາຄາການຊີ້ນຳ-ນຳພາວຽກງານຮອບດ້ານໃນໄລຍະ 6 ເດືອນຕົ້ນປີທີ່ຜ່ານມາ ແລະ ວາງທິດທາງແຜນການ 6 ເດືອນທ້າຍປີ ໃນກອງປະຊຸມໄດ້ປະກອບຄຳຄິດ, ຄຳເຫັນແລກປ່ຽນບົດຮຽນເຊິ່ງກັນ ແລະ ກັນຕໍ່ການຊີ້ນຳ-ນຳພາຂອງຄະນະກຳມະບານຮາກຖານ ແລະ ການເຄື່ອນໄຫວປະຕິບັດໜ້າທີ່ວຽກງານ ຂອງສະມາຊິກກຳມະບານ ເພື່ອເຮັດໃຫ້ການຊີ້ນຳ-ນຳພາວຽກງານຂອງກຳມະບານຮາກຖານພະແນກຍຸຕິທຳແຂວງ ໃນແຕ່ລະໄລຍະໄດ້ຮັບຜົນສຳເລັດຕາມລະດັບຄາດໝາຍ. ໃນກອງປະຊຸມສະຫາຍ ອຸເທດ ແກ້ວມີໄຊ ວິຊາການຂະແໜງຈັດຕັ້ງພະນັກງານ-ກວດກາ ຜ່ານຂໍ້ຕົກລົງຂອງປະທານສະຫະພັນກຳມະບານແຂວງ ສະບັບເລກທີ 26/ສກລ, ລົງວັນທີ 11 ມັງກອນ 2021 ວ່າດ້ວຍການຢັ້ງຢືນກຳມະບານຮາກຖານພະແນກຍຸຕິທຳແຂວງ ທີ່ບັນລຸເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2020
          ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຈາກສະຫາຍ ຈັນສະໝອນ ຄຸນນະເລີດ ຮອງເລຂາໜ່ວຍພັກ, ຮອງຫົວໜ້າພະແນກຍຸຕິທຳແຂວງ, ຜູ້ຊີ້ນຳອົງການຈັດຕັ້ງມະຫາຊົນ, ເຊິ່ງກ່ອນອື່ນສະຫາຍໄດ້ກ່າວສະແດງຄວາມຍ້ອງຍໍຊົມເຊີຍບັນດາຜົນງານທີ່ບັນດາສະຫາຍຍາດມາໄດ້ໃນຕະຫຼອດໄລຍະທີ່ຜ່ານມາ ແລະ ຍັງຮຽກຮ້ອງຄະນະກຳມະບານ ແລະ ສະມາຊິກກຳມະບານແຕ່ລະສະຫາຍຕ້ອງເອົາໃຈໃສ່ສຶກສາອົບຮົມການເມືອງ-ນຳພາແນວຄິດ, ຍົກສູງຄວາມຮັບຜິດຊອບໜ້າທີ່ວຽກງານທີ່ໄດ້ຮັບມອບໝາຍ.
ພາບ-ຂ່າວ: ທອງວັນ ສີສະຫວັນ
ປະເພດຂ່າວ: