ພິທີປະກາດການແຕ່ງຕັ້ງຫົວໜ້າຫ້ອງການຍຸຕິທໍາເມືອງ ຕົ້ນເຜິ້ງ ແຂວງ ບໍ່ແກ້ວ

Primary tabs

          ໃນຕອນເຊົ້າຂອງວັນທີ 23 ທັນວາ 2021 ຜ່ານມາ ຢູ່ທີ່ຫ້ອງປະຊຸມຂອງຫ້ອງວ່າການປົກຄອງເມືອງ ຕົ້ນເຜິ້ງ ແຂວງ ບໍ່ແກ້ວ ໄດ້ມີພິທີປະກາດແຕ່ງຕັ້ງຫົວໜ້າຫ້ອງການຍຸຕິທຳເມືອງ ຕົ້ນເຜິ້ງ ຂຶ້ນ ໂດຍການເປັນປະທານຂອງ ທ່ານ ອຸ່ນຄຳ ທຳມະເລີດ ຮອງເລຂາພັກເມືອງ ມີຫົວໜ້າ, ຮອງຫົວໜ້າຫ້ອງການ ແລະ ພະນັກງານ-ລັດຖະກອນເຂົ້າຮ່ວມ.
          ໃນພິທີທ່ານ ສີຫຼ້າ ຜ່ອງດາລາ ຮອງຫົວໜ້າຄະນະຈັດຕັ້ງເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ຕົ້ນເຜິ້ງ, ສະບັບເລກທີ 313/ຈມ.ຕຜ, ລົງວັນທີ 29 ພະຈິກ 2021 ວ່າດ້ວຍການແຕ່ງຕັ້ງຫົວໜ້າຫ້ອງການຍຸຕິທໍາເມືອງ ຕົ້ນເຜິ້ງ ໂດຍໄດ້ແຕ່ງຕັ້ງທ່ານ ນາງ ມະນີຈັນ ຜົນປະເສີດ ຮອງຫົວໜ້າຫ້ອງການຍຸຕິທໍາເມືອງຕົ້ນເຜິ້ງ ຂຶ້ນເປັນຫົວໜ້າຫ້ອງການຍຸຕິທຳເມືອງ ຕົ້ນເຜິ້ງ.
          ໃນຕອນທ້າຍ ທ່ານປະທານ ກໍໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳຕໍ່ຜູ້ທີ່ໄດ້ຮັບການແຕ່ງຕັ້ງໃນຄັ້ງນີ້ ໂດຍໄດ້ເນັ້ນໜັກໃຫ້ເອົາໃຈໃສ່ຝຶກຝົນຫຼໍ່ຫຼອມຕົນເອງທາງດ້ານແນວຄິດ, ທິດສະດີ, ການຈັດຕັ້ງ ແລະ ປະຕິບັດວຽກງານວິຊາສະເພາະຕາມສິດ, ໜ້າທີ່ ແລະ ພາລະບົດບາດທີ່ກຳນົດໄວ້ຢ່າງເຂັ້ມງວດ ແລະ ໃຫ້ມີຜົນສໍາເລັດຕາມລະດັບຄາດໝາຍ.
ຖ່າຍພາບ-ຂຽນຂ່າວ: ພອນສັກ ສີປະເສີດ