ພະແນກຍຸຕິທຳແຂວງ ບໍ່ແກ້ວ ເຊື່ອມຊຶມເອກະສານສໍາຄັນຂອງພັກໃນໄລຍະໃໝ່

Primary tabs

          ໃນຕອນບ່າຍຂອງວັນທີ 12 ກໍລະກົດ 2021 ຜ່ານມາ ຢູ່ທີ່ຫ້ອງປະຊຸມພະແນກຍຸຕິທຳແຂວງ ບໍ່ແກ້ວ ໄດ້ເຊື່ອມຊືມເອກະສານຂອງພັກໃນໄລຍະໃໝ່ ໃຫ້ພະນັກງານ-ລັດຖະກອນ ພາຍໃນພະແນກຍຸຕິທຳແຂວງ. ໂດຍການເປັນປະທານ ແລະ ເຜີຍແຜ່ເຊື່ອມຊືມຂອງ ສະຫາຍ ຄຳຫຼ້າ ອຸດທະຍອດ, ກຳມະການພັກແຂວງ, ເລຂາໜ່ວຍພັກ, ຫົວໜ້າພະແນກຍຸຕິທໍາແຂວງ, ມີຄະນະພັກຄະນະພະແນກ ແລະ ພະນັກງານ-ລັດຖະກອນພາຍໃນພະແນກຍຸຕິທຳເຂົ້າຮ່ວມຢ່າງພ້ອມພຽງ.
          ເອກະສານທີ່ນຳມາເຊື່ອມຊືມໃນຄັ້ງນີ້ມີ 3 ເອກະສານຄື: ມະຕິຂອງກົມການເມືອງສູນກາງພັກ ສະບັບເລກທີ 25/ກມສພ, ລົງວັນທີ 17 ພຶດສະພາ 2021 ວ່າດ້ວຍການເພີ່ມທະວີການນຳພາຂອງພັກ ຕໍ່ວຽກງານວັດທະນະທໍາ ໃນໄລຍະໃໝ່ ມະຕິສະບັບເລກທີ 206/ກມສພ, ລົງວັນທີ 7 ທັນວາ 2020 ວ່າດ້ວຍການຍົກສູງຄຸນນະພາບວຽກງານການເມືອງ-ແນວຄິດໃນໄລຍະໃໝ່ ແລະ ເອກະສານວັນສ້າງຕັ້ງພັກກອມມູນິດຈີນ ຄົບຮອບ 100 ປີ ( 01/07/1921-01/07/2021 ).
          ເພື່ອໃຫ້ສະມາຊິກພັກ ພະນັກງານ-ລັດຖະກອນ ເຂົ້າໃຈຢ່າງເລິກເຊິ່ງ ຕໍ່ກັບວຽກງານວັດທະນະທໍາ ທີ່ມີຄຸນຄ່າທາງດ້ານວັດຖຸ ແລະ ຈິດໃຈທີ່ມວນມະນຸດປະດິດສ້າງຂຶ້ນໃນຂະບວນວິວັດແຕ່ລະໄລຍະຂອງປະຫວັດສາດແຫ່ງການກຳເນີດ, ຄົງຕົວ ແລະ ຂະຫຍາຍຕົວຂອງສັງຄົມມະນຸດ. ພັກປະຊາຊົນປະຕິວັດລາວ ຍາມໃດກໍ່ໃຫ້ຄວາມສຳຄັນ ແລະ ເອົາໃຈໃສ່ ຕໍ່ວຽກງານວັດທະນະທຳ ຕິດພັນກັບວຽກງານການເມືອງ-ແນວຄິດຂອງພັກ ເພາະວຽກງານດັ່ງກ່າວ ແມ່ນຄຸນລັກສະນະ ແລະ ປັດໃຈພື້ນຖານຂອງ ການດຳລົງຄົງຕົວຂອງຊາດ, ແມ່ນກຳລັງພັກດັນ ແລະ ຈຸດໝາຍຂອງການພັດທະນາສັງຄົມຕາມທິດສັງຄົມນິຍົມ; ໃນຕໍ່ໜ້າ ພັກເຮົາ ໄດ້ກຳນົດທິດທາງລວມ ແລະ ຄາດໝາຍສູ້ຊົນຕໍ່ວຽກງານວັດທະນະທຳໃນໄລຍະໃໝ່ຢ່າງຈະແຈ້ງວ່າ: ຕັ້ງໜ້າແກ້ໄຂຂໍ້ຄົງຄ້າງບັນຫາຫຍໍ້ທໍ້ໃນຂົງເຂດວັດທະນະທຳ ໃຫ້ຫຼຸດນ້ອຍຖ້ອຍລົງ, ສູ້ຊົນເຮັດໃຫ້ທົ່ວປວງຊົນລາວທັງຊາດ, ມີຄວາມຮັບຮູ້ ແລະ ເຂົ້າໃຈແນວທາງນະໂຍບາຍຂອງພັກ ກົດໝາຍຂອງລັດກ່ຽວກັບວຽກງານວັດທະນະທຳຢ່າງເລິກເຊິ່ງ, ສ້າງສັງຄົມໃຫ້ມີຄວາມສາມັກຄີເປັນປຶກແຜ່ນ, ຍຸຕິທໍາເອຶ້ອເຟື້ອເຜື່ອແຜ່ ມີນ້ຳໃຈຮັກຊາດຮັກລະບອບປະຊາທິປະໄຕ ປະຊາຊົນ ເຊີດຊູມູນເຊື້ອພິລະອາດຫານ, ດຸໝັ່ນອອກແຮງງານປະດິດສ້າງຄົ້ນຄວ້າຮໍ່າຮຽນເອົາວິທະຍາສາດເຕັກໂນໂລຊີ ທີ່ກ້າວໜ້າທັນສະໄໝເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາຂອງພັກຢ່າງແທ້ຈິງ ແລະ ໃນຕອນທ້າຍພິທີ ທ່ານ ວິພົງ ບົວອາໄພ ຮອງຫົວໜ້າພະແນກຍຸຕິທໍາແຂວງ ກໍ່ໄດ້ໃຫ້ກຽດຂຶ້ນເລົ່າມູນເຊື້ອວັນສ້າງຕັ້ງພັກກອມມູນິດຈີນ ຄົບຮອບ 100 ປີ ( 01/07/1921-01/07/2021 ).
ຂຽນຂ່າວ-ຖ່າຍພາບ: ພຸດທະຈັກ ວິໄລພອນ
ປະເພດຂ່າວ: