ພະແນກຍຸຕິທຳແຂວງ ບໍ່ແກ້ວ ລົງຊຸກຍູ້ການເຄື່ອນໄຫວວຽກງານຂອງຫ້ອງການຍຸຕິທຳເມືອງ ຫ້ວຍຊາຍ

Primary tabs

          ໃນຕອນເຊົ້າຂອງວັນທີ 19 ສິງຫາ 2021 ຜ່ານມາ, ທ່ານ ສຸລິເດດ ບັນດາກອນ ຮອງຫົວໜ້າພະແນກຍຸຕິທຳແຂວງ ພ້ອມດ້ວຍຄະນະໄດ້ລົງຊຸກຍູ້ວຽກງານການຈັດຕັ້ງປະຕິບັດຄຳຕັດສິນຂອງສານ, ວຽກງານທະບຽນສານ ແລະ ວຽກງານກົດໝາຍ ຢູ່ຫ້ອງການຍຸຕິທຳເມືອງ ຫ້ວຍຊາຍ ແຂວງ ບໍ່ແກ້ວ. ໂດຍໄດ້ຮັບການຕ້ອນຮັບຈາກທ່ານ ວິໄລສັກ ເພັດມະໄລແສງ ຫົວໜ້າຫ້ອງການຍຸຕິທໍາເມືອງ ຫ້ວຍຊາຍ.
          ໃນພິທີໄດ້ຮັບຟັງການລາຍງານກ່ຽວກັບສະພາບການເຄື່ອນໄຫວປະຕິບັດວຽກງານຮອບດ້ານໃນໄລຍະ 8 ເດືອນ ແລະ ທິດທາງແຜນການໃນຕໍ່ໜ້າ ໂດຍທ່ານ ນາງ ນ່ອງ ຈິດຕະບູນ ຮອງຫົວໜ້າຫ້ອງການຍຸຕິທຳ ເປັນຕົ້ນແມ່ນວຽກງານຍຸຕິທຳຮາກຖານທີ່ຄຽງຄູ່ກັບວຽກງານວິຊາສະເພາະຮອບດ້ານ ພ້ອມທັງຍົກໃຫ້ເຫັນເຖິງດ້ານດີ, ດ້ານອ່ອນ ແລະ ຂໍ້ຄົງຄ້າງຈຳນວນໜື່ງທີ່ຈະຕ້ອງໄດ້ຮັບການປັງປຸງ ແລະ ແກ້ໄຂໃນຕໍ່ໜ້າ, ຫຼັງຈາກນັ້ນທ່ານ ນາງ ສີພອນ ແອ່ນວິໄລ ຫົວໜ້າຂະແໜງທະບຽນສານ ໄດ້ຂຶ້ນເຜີຍແຜ່ຂໍ້ຕົກລົງຂອງທ່ານລັດຖະມົນຕີກະຊວງຍຸຕິທຳ ສະບັບເລກທີ 1314/ກຍ, ລົງວັນທີ 01 ຕຸລາ 2019 ວ່າດ້ວຍການຄຸ້ມຄອງວຽກງານທະບຽນສານ ແລະ ທ່ານ ລື້ ມົວ ເຢຍຜົງເບຼຍດີ ຮອງຫົວໜ້າຂະແໜງຈັດຕັ້ງປະຕິບັດຄຳຕັດສິນຂອງສານ ໄດ້ຂຶ້ນເຜີຍແຜ່ຄຳແນະນຳຂອງທ່ານລັດຖະມົນຕີກະຊວງຍຸຕິທຳ ສະບັບເລກທີ 445/ກຍ, ລົງວັນທີ 5 ເມສາ 2019 ວ່າດ້ວຍການເພີ່ມທະວີຄວາມຮັບຜິດຊອບ ແລະ ການຈັດຕັ້ງປະຕິບັດຄຳຕັດສິນຂອງສານ ແລະ ຄຳແນະນຳ ສະບັບເລກທີ446/ກຍ, ລົງວັນທີ 5 ເມສາ 2019 ວ່າດ້ວຍວຽກງານການເງິນ, ການຮິບ ແລະ ການມອບຊັບໃນການຈັດຕັ້ງປະຕິບັດຄຳຕັດສິນຂອງສານ.
          ໃນພິທີດັ່ງກ່າວ ທ່ານ ສຸລິເດດ ບັນດາກອນ ຮອງຫົວໜ້າພະແນກ ກໍໄດ້ມີຄຳເຫັນໂອ້ລົມ ພ້ອມທັງໃຫ້ທິດຊີ້ນຳຕໍ່ການຊີ້ນຳ-ນຳພາຂອງຄະນະຫ້ອງການຍຸຕິທຳເມືອງ ຈົ່ງພ້ອມກັນເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານພາຍໃນຫ້ອງການ ຈົ່ງມີແນວຄິດອຸ່ນອ່ຽນ, ທຸ່ນທ່ຽງ ແລະ ສືບຕໍ່ຜັນຂະຫຍາຍດ້ານດີ, ປັບປຸງດ້ານອ່ອນ ແລະ ເອົາໃຈໃສ່ແກ້ໄຂຂໍ້ຄົງຄ້າງ ໃນການຈັດຕັ້ງປະຕິບັດວຽກງານວິຊາສະເພາະຂອງຕົນ ເພື່ອໃຫ້ບັນລຸຕາມຄາດໝາຍທີ່ກຳນົດໄວ້.
ຖ່າຍພາບ-ຂຽນຂ່າວ: ພຸດທະຈັກ ວິໄລພອນ
ປະເພດຂ່າວ: