ມອບອຸປະກອນຮັບໃຊ້ຫ້ອງການໃຫ້ 2 ບ້ານຢູ່ເມືອງຄູນ

Primary tabs

          ພິທີມອບ-ຮັບອຸປະກອນຮັບໃຊ້ຫ້ອງການ ໃຫ້ຫ້ອງການບ້ານ ໄດ້ຈັດຂຶ້ນວັນທີ 11 ພະຈິກ 2021 ຢູ່ທີ່ຫ້ອງການ ບ້ານ ຍຸນສີໄຊຊະນະ ເມືອງ ຄູນ ແຂວງ ຊຽງຂວາງ ໂດຍການເຂົ້າຮ່ວມຂອງ ທ່ານ ວັນໄຊ ກືຫວັງເນັ້ງ ຮອງຫົວໜ້າພະແນກຍຸຕິທຳແຂວງ ຊຽງຂວາງ, ທ່ານ ຄຳເພັດ ກູດໄພບານ ຮອງຫົວໜ້າອົງການໄອຍະການແຂວງ ແລະ ທ່ານ ນາງ ສົມສະນຸກ ພົມມະຫາໄຊ ຮອງເລຂາພັກເມືອງ ປະທານກວດກາພັກ ຫົວໜ້າອົງການກວດກາລັດເມືອງ ຄູນ ມີ ຫົວໜ້າຫ້ອງການຍຸຕິທໍາ ເມືອງຄູນ, ຫົວໜ້າອົງການໄອຍະການປະຊາຊົນເຂດ 3, ອົງການປົກຄອງບ້ານ ແລະ ປະຊາຊົນສອງບ້ານເຂົ້າຮ່ວມ.
อาจเป็นรูปภาพของ 7 คน, ผู้คนกำลังยืน และ กลางแจ้ง
          ເພື່ອເປັນການຊຸກຍູ້ການປະຕິບັດໜ້າທີ່ວຽກງານຢູ່ຮາກຖານບ້ານ ໃຫ້ມີຄວາມທັນສະໄໝ, ສະດວກສະບາຍ ແລະ ຮັບປະກັນ ໃນວຽກງານບໍລິການໃຫ້ແກ່ສັງຄົມ. ສະນັ້ນ, ພະແນກຍຸຕິທໍາແຂວງ ຊຽງຂວາງ ແລະ ອົງການໄອຍະການປະຊາຊົນແຂວງ ຈຶ່ງໄດ້ນຳອຸປະກອນຮັບໃຊ້ຫ້ອງການຈໍານວນໜຶ່ງ ໄປມອບໃຫ້ຫ້ອງການບ້ານ ສີພົມ ແລະ ບ້ານ ຍຸນສີໄຊຊະນະ ເພື່ອນໍາໃຊ້ເຂົ້າໃນໜ້າທີ່ວຽກງານລວມ. ອຸປະກອນທີ່ມອບໃນຄັ້ງນີ້ປະກອບມີ ຄອມພີວເຕີໂນດບຸກ 2 ໜ່ວຍ, ປຣິນເຕີ 2 ໜ່ວຍ, LCD ພ້ອມແຜ່ນສາຍ 2 ຊຸດ, ລຳໂພງ Q10 2 ໜ່ວຍ, ຕູ້ໃສ່ເອກະສານ 2 ໜ່ວຍ, ໂຕະ 2 ໜ່ວຍ ແລະ ຕັັ່ງ 16 ໜ່ວຍ ລວມມູນຄ່າຈຳນວນ 61.100.000 ກີບ ກ່າວມອບໂດຍ ທ່ານ ວັນໄຊ ກືຫວັງເນັ້ງ ແລະ ທ່ານ ຄໍາເພັດ ກູດໄພບານ ແລະ ຕາງໜ້າຮັບໂດຍຄະນະບ້ານທັງ ສອງບ້ານ.
          ຕອນທ້າຍ ທ່ານ ນາງ ສົມສະນຸກ ພົມມະຫາໄຊ ກໍໄດ້ມີຄຳເຫັນ ແລະ ສະແດງຄວາມຂອບໃຈມາຍັງຄະນະພະແນກຍຸຕິທຳ, ອົງການໄອຍະການແຂວງ ແລະ ຜູ້ປະສານງານໂຄງການ ທີ່ໄດ້ສະເໜີຂໍອຸປະກອນຮັບໃຊ້ມາຊ່ວຍເຫຼືອບ້ານ ແລະ ຫວັງຢ່າງຍິ່ງວ່າ ທາງພະແນກຍຸຕິທໍາ ແລະ ອົງການໄອຍະການປະຊາຊົນແຂວງ ຈະສືບຕໍ່ສະເໜີຂໍອຸປະກອນຕ່າງໆ ເພື່ອປະກອບໃຫ້ບັນດາບ້ານໃຫ້ທົ່ວເຖິງ.
ພາບ-ຂ່າວ: ນາງ ກິ່ງແກ້ວ ພົມມະຈັກ