ເມືອງ ຄຳ ແຂວງ ຊຽງຂວາງ ເປີດຮຽນກົດໝາຍ 45 ວັນ

Primary tabs

          ໃນວັນທີ 30 ສິງຫາ 2021 ຢູ່ທີ່ຫ້ອງການກຸ່ມ ວຽງໄຊ ເມືອງ ຄຳ ແຂວງ ຊຽງຂວາງ ໄດ້ເປີດພິທີ ຝຶກອົບຮົມກົດໝາຍຂັ້ນພື້ນຖານລະບົບບຳລຸງ 45 ວັນ ໃຫ້ແກ່ພະນັກງານອ້ອມຂ້າງເມືອງ, ຄະນະພັກຮາກຖານກຸ່ມ, ອົງການປົກຄອງບ້ານ ແລະ ປະຊາຊົນ ໃຫ້ກຽດເຂົ້າຮ່ວມເປັນປະທານໂດຍທ່ານ ໃຈເພັດ ພິມວົງສາ ກຳມະການພັກແຂວງ ເລຂາພັກເມືອງ ເຈົ້າເມືອງ ຄຳ, ທ່ານ ວັນໄຊ ກຶຫວັງເນັ້ງ ຮອງຫົວໜ້າພະແນກຍຸຕິທຳແຂວງ, ທ່ານ ສົມພູ ສີສົມພົງ ເລຂາພັກກຸ່ມ ພ້ອມດ້ວຍຄະນະຮັບຜິດຊອບການຮຽນ-ການສອນກົດໝາຍ 45 ວັນ ຂັ້ນແຂວງ ແລະ ເມືອງ, ມີກຳລັງປ້ອງກັນຊາດ, ປ້ອງກັນຄວາມສະຫງົບ, ອົງການປົກຄອງບ້ານ ແລະ ເປົ້າໝາຍຜູ້ເຂົ້າຮຽນ ເຂົ້າຮ່ວມທັງໝົດ 51 ທ່ານ, ຍິງ 7 ທ່ານ ໃນນັ້ນເປົ້າໝາຍຜູ້ເຂົ້າຮຽນກົດໝາຍ 45 ວັນມີ 39 ທ່ານ, ຍິງ 4 ທ່ານ.
อาจเป็นรูปภาพของ 4 คน, ผู้คนกำลังนั่ง และผู้คนกำลังยืน
          ໃນພິທີ ທ່ານ ເປມະ ລັດວັນ ຫົວໜ້າຫ້ອງການຍຸຕິທຳເມືອງ ຄຳ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 299/ຈມຄ, ລົງວັນທີ່ 23 ສິິິງຫາ 2021 ວ່າດ້ວຍການອະນຸຍາດເປີດຊຸດຝຶກອົບຮົມກົດໝາຍ ແລະ ຜ່ານແຜນການຮຽນ-ການສອນກົດໝາຍໃນຄັ້ງນີ້ ຊຶ່ງເລີ່ມເປີດຮຽນແຕ່ ວັນທີ 31 ສິງຫາ 2021 - ວັນທີ 4 ພະຈິກ 2021
          ຈຸດປະສົງຂອງການເປີດຮຽນກົດໝາຍ 45 ວັນ ກໍ່ເພື່ອເຮັດໃຫ້ ພະນັກງານອອ້ມຂ້າງເມືອງ, ກຸ່ມບ້ານ ອົງການຈັດຕັ້ງບ້ານ ແລະ ປະຊາຊົນ ໄດ້ຍົກລະດັບຄວາມຮູ້ທາງດ້ານກົດໝາຍໃຫ້ເປັນລະບົບ ພ້ອມນັ້ນເປັນການຜັນຂະຫຍາຍ ແນວທາງນະໂຍບາຍຂອງພັກ, ລັດຖະທຳມະນູນ ແລະ ກົດໝາຍຂອງລັດລົງເຖິງຮາກຖານບ້ານ ໂດຍສະເພາະແມ່ນປະຕິບັດຕາມຫຼັກສູດທີ່ກະຊວງຍຸຕິທຳວາງອອກ ຊຶ່ງປະກອບມີ 34 ວິຊາ, 23 ໜ່ວຍກິດ, 356 ຊົ່ງໂມງ, ໃຊ້ເວລາຮຽນ 45 ວັນ.
          ໃນຕອນທ້າຍຂອງພິທີ ທ່ານ ວັນໄຊ ກຶຫວັງເນັ້ງ ແລະ ທ່ານ ໃຈເພັດ ພິມວົງສາ ໄດ້ຜັດປ່ຽນກັນມີຄຳເຫັນຊີ້ນຳ ຊຶ່ງທ່ານໄດ້ຍ້ອງຍໍຊົມເຊີຍຕໍ່ການຕັດສິນໃຈຂອງຄະນະນຳ, ຄະນະຮັບຜິດຊອບຂອງເມືອງ, ຄູ-ອາຈານ ທີ່ອຳນວຍຄວາມສະດວກ ໃນການຊີ້ນຳ-ນຳພາ ກະກຽມຄວາມພ້ອມ ໃນການເປີດຊຸດຝຶກອົບຮົມກົດໝາຍໃນຄັ້ງນີ້ ພ້ອມທັງເນັ້ນໜັກໃຫ້ນັກຝຶກອົບຮົມ ຈົ່ງມີຄວາມຮັບຜິດຊອບສູງ, ຕັ້ງໜ້າຝຶກຝົນຫຼໍ່ຫຼອມຕົນເອງ, ຍາດແຍ່ງເອົາຄວາມຮູ້, ຄວາມສາມາດຈາກຄູອາຈານ, ມີສະຕິເຄົາລົບ ແລະ ປະຕິບັດລະບຽບທີ່ວາງອອກຢ່າງເຂັ້ມງວດ.
ຖ່າຍພາບ+ຂຽນໂດຍ: ຄຳບຸ່ມ+ ກິ່ງແກ້ວ
ປະເພດຂ່າວ: