ພິທີເຜີຍແຜ່ຜົນສຳເລັດກອງປະຊຸມສະໄຫມວິສາມັນເທື່ອທີ I ຂອງສະພາແຫ່ງຊາດ ຊຸດທີ IX

Primary tabs

          ໃນຕອນບ່າຍຂອງວັນທີ 14 ກັນຍາ 2021 ຜ່ານມາ ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 9 ໄດ້ຈັດພິທີເຜີຍແຜ່ຜົນສຳເລັດຂອງກອງປະຊຸມສະໄໝວິສາມັນເທື່ອທີ I ຂອງສະພາແຫ່ງຊາດຊຸດທີ IX ວ່າດ້ວຍການຮັບຮອງເອົາວາລະແຫ່ງຊາດ ກຽ່ວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ແຕ່ປີ 2021-2023 ຢູ່ທີ່ຫ້ອງປະຊຸມຂອງພະແນກຍຸຕິທຳແຂວງ ຊຽງຂວາງ ໂດຍການເປັນປະທານຮ່ວມຂອງ ທ່ານ ວຽງໄຊ ສີວິໄລ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 9 ຮອງປະທານສະພາປະຊາຊົນຂັ້ນແຂວງ ຊຽງຂວາງ ແລະ ທ່ານ ເກົ້າມົວ ຊົວໂກ້ ຄະນະປະຈຳ ປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ, ມີຫົວໜ້າ, ຮອງຫົວໜ້າພະແນກຍຸຕິທໍາ, ອົງການໄອຍະການປະຊາຊົນ, ສານປະຊາຊົນ, ສະພາປະຊາຊົນແຂວງ, ຫົວໜ້າ, ຮອງຫົວໜ້າຂະແໜງ ແລະ ພະນັກງານ-ລັດຖະກອນຈາກ 4 ພາກສ່ວນເຂົ້າຮ່ວມ 35 ທ່ານ, ຍິງ 12 ທ່ານ.
อาจเป็นรูปภาพของ 3 คน และผู้คนกำลังยืน
          ໃນພິທີໄດ້ຮັບຟັງການເຜີຍແຜ່ຜົນສຳເລັດກອງປະຊຸມສະໄໝວິສາມັນເທື່ອທີ I ຊຸດທີ IX ທີ່ໄດ້ຮັບຮອງເອົາຄາດໝາຍຕົ້ນຕໍຂອງວາລະແຫ່ງຊາດຮອດປີ 2023 ໂດຍສຸມໃສ່ ສົ່ງເສີມການຜະລິດ ເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ ເພື່ອສ້າງລາຍຮັບໃຫ້ໄດ້ໄວ ສ້າງພື້ນຖານເສດຖະກິດແຫ່ງຊາດໃຫ້ເຂັ້ມແຂງ, ສ້າງຄວາມເຂັ້ມແຂງທາງດ້ານການເກັບລາຍຮັບເຂົ້າງົບປະມານບໍ່ໃຫ້ຮົ່ວໄຫຼ, ຄຸ້ມຄອງລາຍຮັບ-ລາຍຈ່າຍງົບປະມານຂອງລັດ, ສ້າງສະຖຽນລະພາບທາງດ້ານເງິນຕາ, ຄວບຄຸມອັດຕາເງິນເຟີ້, ຍົກສູງປະສິດທີພາບໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ແລະ ຊອກຫາວິທີແກ້ໄຂບັນຫາຢາເສບຕິດ ໂດຍການນຳເອົາກົດໝາຍວ່າດ້ວຍຢາເສຍຕິດລົງໂຄສະນາເຜີຍແຜ່ໃຫ້ທົ່ວເຖິງ, ຕ້ານ ແລະ ສະກັດກັ້ນຂະບວນການຄ້າຂາຍຢາເສບຕິດ, ປາບປາມຫົວໂປ່ໂຕການ ໃຫ້ມີການລົງໂທດຢ່າງເຂັ້ມງວດ, ເດັດຂາດຕາມກົດໝາຍ; ຈາກນັ້ນ ທ່ານ ຕົ່ງຊົ່ງ ບົວສີເນັ້ງມາ ປະທານສານປະຊາຊົນ ແຂວງ ຊຽງຂວາງ ຕາງໜ້າໃຫ້ແກ່ສາມພາກສ່ວນ (ສານປະຊາຊົນ, ອົງການໄອຍະການປະຊາຊົນ, ພະແນກຍຸຕິທໍາ) ໄດ້ລາຍງານໂດຍຫຍໍ້ ກ່ຽວກັບສະພາບການຈັດຕັ້ງປະຕິບັດວຽກງານ 6 ເດືອນຕົ້ນປີ ເພື່ອຕີລາຄາ ດ້ານດີ, ດ້ານອ່ອນ ແລະ ຂໍ້ຄົງຄ້າງທີ່ຈະຕ້ອງໄດ້ສຸມໃສ່ຈັດຕັ້ງປະຕິບັດໃນຕໍ່ໜ້າ.
          ຕອນທ້າຍຂອງກອງປະຊຸມ ທ່ານ ວຽງໄຊ ສີວິໄລ ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 9 ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ ສາມພາກສ່ວນສາມາດຍາດໄດ້ໃນໄລຍະຜ່ານມາ ແລະ ເນັ້ນໜັກໃຫ້ ທັງສາມພາກສ່ວນຈົ່ງນຳເອົາເນື້ອໃນຂອງກອງປະຊຸມໃນຄັ້ງນີ້ໄປຈັດຕັ້ງປະຕິບັດ ແລະ ຜັນຂະຫຍາຍໃຫ້ໄດ້ຮັບຜົນດີ.
                                                                                                                                                       ຖ່າຍພາບ-ຂຽນໂດຍ: ນາງ ກິ່ງແກ້ວ ພົມມະຈັກ
ປະເພດຂ່າວ: