ສະຖາບັນຍຸຕິທຳແຫ່ງຊາດສາຂາ ຫຼວງພະບາງ ເຜີຍແຜ່ຄໍາແນະນໍາຂອງຄະນະກໍາມະການເລືອກຕັ້ງລະດັບຊາດ ແລະ ເຊື່ອມຊືມເອກະສານກ່ຽວກັບການປະເມີນລັດຖະກອນ ແລະ ຄັດເລືອກຜົນງານປະຈໍາປີ 2020

Primary tabs

ໃນຕອນແລງຂອງວັນພະຫັດ ວັນທີ 29 ຕຸລາ 2020 ຢູ່ທີ່ຫ້ອງປະຊຸມໃຫຍ່ຂອງສະຖາບັນໄດ້ເປີດກອງປະຊຸມເຜີຍແຜ່ຄໍາແນະນໍາຂອງຄະນະກໍາມະການເລືອກຕັ້ງລະດັບຊາດ ແລະ ເຊື່ອມຊືມເອກະສານກ່ຽວກັບການປະເມີນພະນັກງານ-ລັດຖະກອນ ແລະ ຄັດເລືອກຜົນງານປະຈໍາປີ 2020 ຂຶ້ນ ໂດຍເປັນປະທານຂອງ ທ່ານ ແສງອາລຸນ ພັນນະລັດ ເລຂາຄະນະພັກຮາກຖານ ຫົວໜ້າສະຖາບັນຍຸຕິທໍາແຫ່ງຊາດ ສາຂາແຂວງ ຫຼວງພະບາງ ພ້ອມດ້ວຍຄະນະ ແລະ ພະນັກງານຄູ-ອາຈານເຂົ້າຮ່ວມທັງໝົດ 68 ທ່ານ, ຍິງ 27 ທ່ານ.

ໂດຍປະຕິບັດຕາມແຈ້ງການຂອງຄະນະປະຈໍາສະພາປະຊາຊົນແຂວງ ຫຼວງພະບາງ ສະບັບເລກທີ 164/ຄປຈ.ສພຂຫຼບ, ລົງວັນທີ 01 ຕຸລາ 2020 ເລື່ອງການຈັດຕັ້ງຜັນຂະຫຍາຍຄໍາແນະນໍາຂອງຄະນະກໍາມະການເລືອກຕັ້ງລະດັບຊາດ ສະບັບເລກທີ 05/ຄລຊ, ລົງວັນທີ 17 ກັນຍາ 2020 ໃຫ້ແກ່ພະນັກງານພາຍໃນສະຖາບັນຍຸຕິທໍາແຫ່ງຊາດ ສາຂາ ແຂວງຫຼວງພະບາງ ໃຫ້ຮູ້ຢ່າງເລິກເຊິ່ງ ແລະ ທົ່ວເຖິງຕາມເປົ້າໝາຍທີ່ວາງໄວ້ ນອກຈາກນັ້ນກອງປະຊຸມກໍໄດ້ມີການເຊື່ອມຊຶມເນື້ອໃນເອກະສານຕ່າງໆ ກ່ຽວກັບການປະເມີນຜົນການປະຕິບັດໜ້າທີ່ວຽກງານຂອງພະນັກງານ-ລັດຖະກອນ ປະຈໍາປີ 2020 ແລະ ການຄັດເລືອກຜົນງານປະຈໍາປີ 2020 ເພື່ອເຮັດໃຫ້ວຽກງານດັ່ງກ່າວດໍາເນີນໄປໄດ້ຢ່າງຖືກຕ້ອງ, ພາວະວິໄສ, ມີປະສິດທິພາບ ແລະ ປະສິດທິຜົນ ເພື່ອຮັບປະກັນການນໍາໃຊ້ຜົນຂອງການປະເມີນເຂົ້າໃນວຽກງານວາງແຜນຊັບຊ້ອນບຸກຄະລາກອນ, ຄາດຄະເນຈໍານວນພົນ, ການກໍານົດຕໍາແໜ່ງງານ, ແຜນການກໍານົດພະນັກງານຄຸ້ມຄອງນໍາພາ ແລະ ການເລື່ອນຊັ້ນຕໍາແໜ່ງໄດ້ຢ່າງມີປະສິດທິພາບ ໂດຍສະເພາະເປັນຂໍ້ມູນພື້ນຖານໃນການຢັ້ງຢືນຜົນຂອງການປະຕິບັດວຽກງານໃນໄລຍະຜ່ານມາ. ຊຶ່ງພວກເຮົາເຄີຍໄດ້ດໍາເນີນປີລະ 01 ຄັ້ງ ແລະ ພ້ອມກັນນັ້ນ ຕາງໜ້າຄະນະສະຖາບັນກໍ່ໄດ້ຂຶ້ນຜ່ານບົດເກັບກ່ຽວຜົນງານຂອງກົມກອງ ແລະ ໄດ້ມີການປະເມີນກົມກອງຕື່ມອີກດ້ວຍ.

ຂຽນຂ່າວ-ຖ່າຍພາບໂດຍ: ອານຸລັກ ພົມເພັດ

ປະເພດຂ່າວ: