ພິທີພົບປະແລກປ່ຽນ ລະຫວ່າງ ສູນກາງຊາວໜຸ່ມປະຊາຊົນປະຕິວັດລາວ ກັບ ສະຖາບັນຍຸຕິທຳແຫ່ງຊາດ, ກະຊວງຍຸຕິທຳ

Primary tabs

ໃນຕອນບ່າຍຂອງວັນທີ 1 ຕຸລາ 2020 ຜ່ານມາ ຢູ່ທີ່ ສະໂມສອນສະຖາບັນຍຸຕິທຳແຫ່ງຊາດ ໄດ້ມີພິທີພົບປະ ແລກປ່ຽນລະຫວ່າງ ສູນກາງຊາວໜຸ່ມປະຊາຊົນປະຕິວັດລາວ ກັບ ຄະນະນຳ, ຄູ-ອາຈານ ແລະ ສະມາຊິກຊາວໜຸ່ມສະຖາບັນຍຸຕິທຳແຫ່ງຊາດ, ກະຊວງຍຸຕິທຳ ເນື່ອງໃນໂອກາດສະເຫຼີມສະຫຼອງວັນຄູແຫ່ງຊາດ ຄົບຮອບ 26 ປີ ພາຍໃຕ້ຫົວຂໍ້: ''ຊາວໜຸ່ມລາວຍຸກໃໝ່ ໃສ່ໃຈສຶກສາຮໍ່າຮຽນ ແລະ ສຸຂະພາບ'' ພາຍໃຕ້ການເປັນປະທານຂອງ ສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ; ສະຫາຍ ປອ.​ ເສີມສຸກ ສິມພະວົງ ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງຍຸຕິທຳ; ມີ ສະຫາຍ ບຸນຕາ ສ.ຜາບມີໄຊ ຄະນະບໍລິຫານງານພັກກະຊວງ, ຫົວໜ້າສະຖາບັນຍຸຕິທຳແຫ່ງຊາດ, ພ້ອມດ້ວຍແຂກທີ່ຖືກເຊີນ ແລະ ສະມາຊິກຊາວໜຸ່ມ, ນັກສຶກສາ ພາຍໃນສະຖາບັນຍຸຕິທຳແຫ່ງຊາດເຂົ້າຮ່ວມ.
ຈຸດປະສົງ ເພື່ອພົບປະແລກປ່ຽນບົດຮຽນຄັ້ງນີ້ ແມ່ນການໂຄສະນາເຜີຍແຜ່ກົດໝາຍວ່າດ້ວຍ ຄະນະຊາວໜຸ່ມປະຊາຊົນປະຕິວັດລາວ ໃຫ້ແກ່ສະມາຊິກຊາວໜຸ່ມທີ່ເປັນນັກສຶກສາກົດໜາຍທີ່ຈະໄດ້ລົງຝຶກງານຢູ່ຮາກຖານ ເພື່ອນຳເອົາເນື້ອໃນຈິດໃຈກົດໝາຍສະບັບດັ່ງກ່າວ ໄປເຜີຍແຜ່ລົງສູ່ຮາກຖານ ແລະ ເພື່ອສະເຫຼີມສະຫຼອງວັນຄູແຫ່ງຊາດ ຄົບຮອບ 26 ປີ.
ພາຍໃນພິທີ ສະຫາຍ ບຸນຕາ ສ.ຜາບມີໄຊ ກໍໄດ້ລາຍງານກ່ຽວກັບວຽກງານຊາວໜຸ່ມ ແລະ ສະພາບລວມ ຂອງສະຖາບັນຍຸຕິທຳແຫ່ງຊາດ. ພິເສດ ໃນພິທີ ຍັງໄດ້ຮັບຟັງການໂອ້ລົມຂອງ ສະຫາຍ ປອ. ເສີມສຸກ ສິມພະວົງ ຊຶ່ງສະຫາຍໄດ້ເນັ້ນໃຫ້ສະມາຊິກຊາວໜຸ່ມພາຍໃນສະຖາບັນຍຸຕິທຳແຫ່ງຊາດ ຮັບຮູ້ເຖິງພາລະບົດບາດ ແລະ ຈຸດພິເສດ ຂອງກະຊວງຍຸຕິທຳ ກໍຄື ການສ້າງ ແລະ ປັບປຸງກົດໝາຍ, ໂຄສະນາເຜີຍແຜ່ກົດໝາຍ, ສ້າງບຸກຄະລາກອນກົດໝາຍອອກສູ່ສັງຄົມ, ການບໍລິການທາງດ້ານກົດໝາຍ ແລະ ຍຸຕິທຳຕໍ່ສັງຄົມ, ວຽກງານຮ່ວມມືກັບສາກົນ ຂົງເຂດຍຸຕິທຳ. ຈາກນັ້ນ, ສະຫາຍ ອາລຸນໄຊ ສູນນະລາດ ກໍໄດ້ເລົ່າກ່ຽວກັບມູນເຊື້ອຂອງຊາວໜຸ່ມປະຊາຊົນປະຕິວັດລາວ ແລະ ເຜີຍແຜ່ກົດໝາຍວ່າດ້ວຍ ຄະນະຊາວໜຸ່ມປະຊາຊົນປະຕິວັດລາວ ຊຶ່ງສະຫາຍໄດ້ຍົກໃຫ້ເຫັນບົດບາດ ຂອງຊາວໜຸ່ມ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ແລະ ສິ່ງທ້າທາຍຕໍ່ຊາວໜຸ່ມໃນປັດຈຸບັນ, ວິໄສທັດໃນການນຳພາວຽກງານຂອງຊາວໜຸ່ມ ໂດຍສະເພາະ ແບບແຜນການດຳລົງຊີວິດ, ຊາວໝຸ່ມຈົ່ງໃຊ້ເວລາໃຫ້ມີຄຸນຄ່າ, ຢຸດການຫຼິ້ນກິນຟຸມເຟືອຍ, ການບໍລິໂພກຂໍ້ມູນ ຂ່າວສານທີ່ຖືກຕ້ອງ ແລະ ຊາວໜຸ່ມຕ້ອງປົກປັກຮັກສາຄວາມສາມັກຄີຂອງປະຊາຊົນລາວບັນດາເຜົ່າ, ປົກປັກຮັກສາຄວາມເປັນເອກະພາບ ແລະ ຄວາມເຊື່ອໝັ້ນຕໍ່ພັກ, ປົກປັກຮັກສາໝາກຜົນຂອງການປະຕິວັດ, ຊາວໜຸ່ມຕ້ອງຍົກລະດັບຄວາມຮູ້-ຄວາມສາມາດ, ຊາວໜຸ່ມຕ້ອງຮູ້ການເມືອງ, ກົດໝາຍ, ວິທະຍາສາດເຕັກໂນໂລຊີ ແລະ ພາສາຕ່າງປະເທດ ກໍຄື ຊາວໜຸ່ມຕ້ອງຍົກລະດັບຄວາມຮູ້ສົມຄູ່ກັບການເມືອງໄລຍະໃໝ່, ຍົກລະດັບດ້ານທັກສະຄວາມຮູ້-ຄວາມສາມາດ ແລະ ຕ້ອງຮ່ວມແຮງຮ່ວມໃຈຕີຖອຍປາກົດການຫຍໍ້ທໍ້ໃນສັງຄົມ ເພາະຊາວໜຸ່ມເປັນຜູ້ສືບທອດພາລະກິດຂອງພັກຢ່າງແທ້ຈິງໃຫ້ສົມກັບນາມມະຍົດທີ່ ປະທານ ໄກສອນ ພົມວິຫານ ໄດ້ຂະໜານນາມໃຫ້ຊາວໜຸ່ມ ວ່າ: ຊາວໜຸ່ມຈົ່ງເປັນດັ່ງນົກອິນຊີ ທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງກາຍເປັນສິນໄຊແຫ່ງຍຸກສະໄໝພວກເຮົາ.

ໃນຕອນທ້າຍຂອງພິທີ ຍັງໄດ້ມອບໃບກຽດຕິຄຸນ ແລະ ໃບຍ້ອງຍໍໃຫ້ ແກ່ສະຖາບັນຍຸຕິທຳແຫ່ງຊາດ ແລະ ຜູ້ທີ່ມີຜົນງານດີ່ເດັ່ນ ໃນການນຳເອົາກົດໝາຍວ່າດ້ວຍ ຄະນະຊາວໜຸ່ມປະຊາຊົນປະຕິວັດລາວ ເຂົ້າໃນຫຼັກສູດການຮຽນ-ການສອນ ໃນກົດໝາຍຂັ້ນພື້ນຖານລະບົບໄລຍະສັ້ນ 45 ວັນ ເປັນກຽດມອບໂດຍ ສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ.

ຂ່າວ-ພາບ: ຊາຍພິມພອນ ສີຣິວົງໄຊ

ປະເພດຂ່າວ: