ກອງປະຊຸມສໍາມະນາການສ້າງຄວາມເຂົ້າໃຈ ກ່ຽວກັບນິຕິກໍາສະບັບປັບປຸງ ຂອງ ສປປ ລາວ

Primary tabs

ກອງປະຊຸມດັ່ງກ່າວໄດ້ຈັດຂຶ້ນໃນລະຫວ່າງວັນທີ 5-7 ຕຸລາ 2020 ຢູ່ທີ່ສະຖາບັນຍຸຕິທໍາແຫ່ງຊາດ ສາຂາແຂວງ ຫຼວງພະບາງ, ໂດຍການເປັນປະທານຂອງ ທ່ານ ບຸນຕາ ສ.ຜາບມີໄຊ ຫົວໜ້າສະຖາບັນຍຸຕິທໍາແຫ່ງຊາດ, ທ່ານ ຄໍາພອນ ສີປະເສີດ ຫົວໜ້າຫ້ອງການກະຊວງຍຸຕິທໍາ ແລະ ທ່ານ ເຣຈໍນໍ ພາດສະຕານາ ຫົວໜ້າທີ່ປຶກສາດ້ານວິຊາການໂຄງການລາວ 031, ມີຜູ້ຕາງໜ້າຈາກສະຖາບັນຍຸຕິທໍາແຫ່ງຊາດ, ສະຖາບັນຍຸຕິທໍາແຫ່ງຊາດ ສາຂາ ຫຼວງພະບາງ, ສະຖາບັນຍຸຕິທໍາແຫ່ງຊາດ ສາຂາ ສະຫວັນນະເຂດ, ສະຖາບັນຍຸຕິທໍາແຫ່ງຊາດສາຂາ ຈໍາປາສັກ, ມະຫາວິທະຍາໄລແຫ່ງຊາດ, ບັນດາກົມ ທີ່ກ່ຽວຂ້ອງຂອງກະຊວງຍຸຕິທໍາ ເຂົ້າຮ່ວມທັງໝົດ ຈໍານວນ 57 ທ່ານ, ຍິງ 14 ທ່ານ.

ຈຸດປະສົງ ແມ່ນເພື່ອພັດທະນາຂີດຄວາມສາມາດໃຫ້ແກ່ຜູ້ເຂົ້າຮ່ວມກໍຄືພະນັກງານຂອງກົມທີ່ກ່ຽວຂ້ອງ ແລະ ຄູ-ອາຈານ ໃນຂົງເຂດຍຸຕິທໍາໃຫ້ມີຄວາມເຂົ້າໃຈກ່ຽວກັບປະມວນກົດໝາຍອາຍາຂອງ ສປປ ລາວ ແລະ ເປັນການແລກປ່ຽນບົດຮຽນລະຫວ່າງຜູ້ເຂົ້າຮ່ວມດ້ວຍກັນ ຊຶ່ງຫົວຂໍ້ທີ່ນໍາມາຝຶກອົບຮົມໃນຄັ້ງນີ້ປະກອບມີ ພື້ນຖານກົດໝາຍອາຍາ, ບົດຮຽນຈາກສາກົນ, ການສ້າງປະມວນກົດໝາຍອາຍາຂອງ ສປປ ລາວ, ການຍັກຍອກ ແລະ ສໍ້ໂກງຊັບ, ການກະທໍາຕໍ່ສາຍຜົວ-ເມຍ, ຄອບຄົວ ແລະ ຮີດຄອງປະເພນີ, ການປັບປຸງບາງມາດຕາຂອງກົດໝາຍອາຍາ ປີ 2005 ແລະ ເນື້ອໃນທີ່ພິມເຂົ້າໃໝ່, ຫຼັກການບັນຍັດກົດໝາຍອາຍາ ແລະ ການນໍາໃຊ້ກົດໝາຍອາຍາ. ໂດຍການບັນຍາຍຂອງ ທ່ານ ສຈ. ເກດ ກຽດຕິສັກ ອະດີດຮອງລັດຖະມົນຕີກະຊວງຍຸຕິທໍາ, ທ່ານ ຄໍາພັນ ບຸນພາຄົມ ຮອງປະທານສານປະຊາຊົນສູງສຸດ, ທ່ານ ອິນທະປັນຍາ ຂຽວວົງພະຈັນ ຫົວໜ້າກົມກົດໝາຍກະຊວງຍຸຕິທໍາ ແລະ ທ່ານ ແສງທະວີ ອິນທະວົງ ຫົວໜ້າພາກວິຊາກົດໝາຍອາຍາ ຄະນະນິຕິສາດ-ລັດຖະສາດ.

ໃນຕອນທ້າຍ ທ່ານ ບຸນຕາ ສ.ຜາບມີໄຊ ກໍໄດ້ມີຄໍາເຫັນຕໍ່ກອງປະຊຸມ ຊຶ່ງທ່ານໄດ້ຍ້ອງຍໍຊົມເຊີຍຕໍ່ຄະນະຮັບຜິດຊອບທີ່ໄດ້ເອົາໃຈໃສ່ຈັດກອງປະຊຸມໃນຄັ້ງນີ້ ແລະ ສະແດງຄວາມຂອບໃຈຕໍ່ກັບໂຄງການລາວ 031 ທີ່ໃຫ້ການສະໜັບສະໜູນກອງປະຊຸມໃນຄັ້ງນີ້ ແລະ ທ່ານໄດ້ເນັ້ນໜັກໃຫ້ຜູ້ເຂົ້າຮ່ວມກອງປະຊຸມຈົ່ງພ້ອມກັນເອົາໃຈໃສ່ໃນການປະຕິບັດຕາມໂມງເວລາ, ລະບຽບຂອງການຝຶກອົບຮົມທີ່ວາງອອກ ແລະ ຖືໂອກາດນີ້ຍາດແຍ່ງເອົາບົດຮຽນຈາກຊ່ຽວຊານສາກົນ ແລະ ບັນດາຄູ-ອາຈານ ທີ່ຂຶ້ນບັນຍາຍ ເພື່ອນໍາເອົາບົດຮຽນໃນຄັ້ງນີ້ ໄປໝູນໃຊ້ເຂົ້າໃນໜ້າທີ່ວຽກງານຂອງຕົນໃຫ້ໄດ້ຮັບຜົນປະໂຫຍດສູງສຸດ ພ້ອມດຽວກັນນັ້ນ ກໍໄດ້ມີການມອບໃບຢັ້ງຢືນໃຫ້ແກ່ຜູ້ເຂົ້າຮ່ວມຝຶກອົບຮົມໃນຄັ້ງນີ້ອີກດ້ວຍ.

ຂຽນຂ່າວ-ຖ່າຍພາບ: ປາວີຄໍາ ເພັດທະລາກຸນ

ປະເພດຂ່າວ: