ພິທີປະກາດບ້ານແບບຢ່າງປະຕິບັດກົດໝາຍຂອງເມືອງ ໄຊທານີ ນະຄອນຫຼວງວຽງຈັນ.

Primary tabs

          ໃນຕອນເຊົ້າຂອງວັນທີ 25 ມີນາ 2021 ທີ່ຜ່ານມາ ຢູ່ທີ່ສະໂມສອນຫ້ອງວ່າການປົກຄອງເມືອງ ໄຊທານີ ນະຄອນຫຼວງວຽງຈັນ ຫ້ອງການຍຸຕິທໍາເມືອງ ໄຊທານີ ໄດ້ຈັດພິທີປະກາດບ້ານແບບຢ່າງປະຕິບັດກົດໝາຍ ຂອງກຸ່ມດົງບັງ ຈໍານວນ 12 ບ້ານ ຂຶ້ນໂດຍການເປັນປະທານຮ່ວມຂອງທ່ານ ພູທອນ ແກ້ວດວງມະນີ ຫົວໜ້າພະແນກຍຸຕິທໍານະຄອນຫວງວຽງຈັນ, ທ່ານ ຄໍາປະດິດ ເຂັມມານິດ ເຈົ້າເມືອງ ໄຊທານີ , ມີຫົວໜ້າຫ້ອງການ, ອົງການປົກຄອງບ້ານ ພ້ອມດ້ວຍຄະນະແກ້ໄຂຂໍ້ຂັດແຍ່ງຂັ້ນບ້ານ ແລະ ພະນັກງານວິຊາການຂອງຫ້ອງການຍຸຕິທຳເມືອງເຂົ້າຮ່ວມທັງໝົດຈໍານວນ 105 ທ່ານ, ຍິງ 25 ທ່ານ.
          ທ່ານ ນາງ ຄໍາໄຜ່ ໄຊຍະວົງ ຫົວໜ້າຫ້ອງການຍຸຕິທໍາເມືອງ ໄຊທານີ ກໍໄດ້ຂຶ້ນລາຍງານກ່ຽວກັບສະພາບການຈັດຕັ້ງປະຕິບັດວຽກງານສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ໃນໄລຍະຜ່ານມາບົນພື້ນຖານຜົນຂອງການລົງຕິດຕາມກວດກາຊຸກຍູ້ວຽກງານດັ່ງກ່າວ ໂດຍສົມທົບກັບອົງການປົກຄອງບ້ານ ແລະ ຄະນະແກ້ໄຂຂໍ້ຂັດແຍ່ງຂັ້ນບ້ານສາມາດກຳນົດເອົາບ້ານທີ່ເປັນເປົ້າໝາຍໄດ້ທັງໝົດ 12 ບ້ານ, ເຊິ່ງມີທັງໝົດ 2,611 ຄອບຄົວ, ມີພົນລະເມືອງ 18,489 ຄົນ, ຍິງ 9,059 ຄົນ. ຜ່ານການຕີລາຄາຕາມ 5 ມາດຕະຖານ ແລະ 6 ມາດຕະຖານ ຂອງການສ້າງບ້ານແບບຢ່າງປະຕິບັດກົດໝາຍ ຕາມຂໍ້ຕົກລົງຂອງລັດຖະມົນຕີກະຊວງຍຸຕິທໍາ ສະບັບເລກທີ 1399/ກຍ, ລົງວັນທີ 7 ທັນວາ 2017 ວ່າດ້ວຍການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍໂດຍແຕ່ລະມາດຕະຖານໄດ້ 90% ຂຶ້ນໄປ. ບັນດາບ້ານທີ່ໄດ້ຮັບການຮັບຮອງເປັນບ້ານແບບຢ່າງປະຕິບັດກົດໝາຍປະກອບມີ: ບ້ານ ດົງບັງ, ບ້ານ ນາສາລາ, ບ້ານ ໂນນແຕ້, ບ້ານ ທ່າດອກຄໍາ, ບ້ານ ໂພນງາມ1, ບ້ານ ທ່າດິນແດງເໜືອ, ບ້ານ ທ່າດິນແດງໃຕ້, ບ້ານ ດວງບຸດດີ, ບ້ານ ໂພນງາມ2, ບ້ານ ນາແຖ, ບ້ານ ໂພນຕ້ອງ ແລະ ບ້ານ ໜອງສອງຫ້ອງ ລວມທັງໝົດມີ 2,855 ຄອບຄົວ.
          ໃນຕອນທ້າຍຂອງພິທີ ກໍໄດ້ມີການມອບໃບຢັ້ງຢືນໃຫ້ແກ່ບັນດາບ້ານດັ່ງກ່າວ ໃຫ້ກຽດມອບໃບຢັ້ງຢືນໂດຍທ່ານ ຄໍາປະດິດ ເຂັມມານິດ ເຈົ້າເມືອງ ໄຊທານີ.
ຂ່າວ-ພາບ: ໄຊຍະສິດ