Submitted by xaiyphimphone on
ເພື່ອເຮັດໃຫ້ກົດໝາຍວ່າດ້ວຍການຈັດຕັ້ງປະຕິບັດຄຳຕັດສີນຂອງສານ ໄດ້ຮັບການປັບປຸງໃຫ້ ແທດເໝາະກັບສະພາບຕົວຈິງຂອງສັງຄົມ ໃນແຕ່ລະລະຍະ ໃນວັນທີ່ 28 ມິຖຸນາ 2017 ທີ່ກະຊວງຍຸຕິທຳ ໄດ້ຈັດກອງປະຊຸມທາບທາມຄຳເຫັນກ່ຽວກັບການປັບປຸງກົດໝາຍວ່າດ້ວຍ ການຈັດຕັ້ງປະຕິບັດຄຳຕັດສີນຂອງສານຂື້ນ, ໂດຍການເປັນປະທານຂອງ ທ່ານ ໄພວີ ສີບົວລິພາ ຮອງລັດຖະມົນຕີກະຊວງຍຸຕິທຳ, ມີຫົວໜ້າ, ຮອງຫົວໜ້າກົມຄຸ້ມຄອງການຈັດຕັ້ງປະຕິບັດຄຳຕັດສີນຂອງສານ, ຫົວໜ້າຫ້ອງການປະຕິບັດຄຳຕັດສີນຂອງສານນະຄອນຫຼວງວຽງຈັນ, ແຂວງວຽງຈັນ ແລະ ແຂວງບໍລິຄຳໄຊ ຕະຫຼອດຮອດພະນັກງານປະຕິບັດຄຳຕັດສີນຂອງສານເຂົ້າຮ່ວມຢ່າງພ້ອມພຽງ.
ໃນກອງປະຊຸມ ທ່ານ ກອງສີ ສາຍສຸດທາ ຫົວໜ້າກົມຄຸ້ມຄອງການຈັດຕັ້ງປະຕິບັດຄຳຕັດສີນຂອງສານ ໄດ້ຂື້ນລາຍງານສະພາບການຈັດຕັ້ງປະຕິບັດກົດໝາຍວ່າດ້ວຍການຈັດຕັ້ງປະຕິບັດຄຳຕັດສີນຂອງສານໃນລະຍະຜ່ານມາ ຊື່ງທ່ານໄດ້ຍົກໃຫ້ເຫັນຂໍ້ສະດວກ ແລະ ຂໍ້ຫຍຸ້ງຍາກໃນຈັດຕັ້ງປະຕິບັດກົດໝາຍສະບັບດັ່ງກ່າວ, ຫຼັງຈາກນັ້ນ ຜູ້ເຂົ້າຮ່ວມກໍໄດ້ພ້ອມກັນປະກອບຄຳຄິດຄຳເຫັນຢ່າງກົງໄປກົງມາ ໂດຍສະເພາະ ແມ່ນລົງເລິກສະພາບ ການຈັດຕັ້ງປະຕິບັດກົດໝາຍຢູ່ໃນທ້ອງຖິ່ນຂອງຕົນ.
ຈຸດປະສົງຂອງການທາບທາມຄຳເຫັນ ກ່ຽວກັບການປັບປຸງກົດໝາຍວ່າດ້ວຍ ການຈັດຕັ້ງປະຕິບັດຄຳຕັດສີນຂອງສານໃນຄັ້ງນີ້ ກໍເພື່ອເຮັດໃຫ້ອົງການຈັດຕັ້ງແຕ່ລະຂັ້ນທີ່ກ່ຽວຂ້ອງສາມາດຮັບປະກັນການຈັດຕັ້ງປະ ຕິບັດຢ່າງຖືກຕ້ອງ, ເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງບຸກຄົນ, ນິຕິບຸກຄົນ ຫຼື ອົງການຈັດຕັ້ງທີ່ຖືກລະເມີດ ປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຢູ່ໃນສັງຄົມ.
ຂຽນຂ່າວ ອ່ອນຄຳ ໄຊຍະວົງ, ຖ່າຍພາບໂດຍ: ສຸກສາຄອນ
ນັກຂ່າວ ກົມໂຄສະນາເຜີຍແຜ່ກົດໝາຍ