ກອງປະຊຸມພົບປະແລກປ່ຽນ ລະຫວ່າງ ທ່ານ ຮອງລັດຖະມົນຕີ ແລະ ກົມກວດກາ ແລະ ປະເມີນຜົນນິຕິກໍາ

ໃນຕອນເຊົ້າຂອງວັນທີ 31 ພຶດສະພາ 2021, ເວລາ 8:30-11:20 ໂມງ, ທີ່ຫ້ອງປະຊຸມຊັ້ນ 5 ຂອງກະຊວງຍຸຕິທຳ, ໄດ້ມີກອງປະຊຸມພົບປະແລກປ່ຽນ ລະຫວ່າງ ທ່ານ ກົງຈີ ຢ່າງຈື່, ຮອງລັດຖະມົນຕີກະຊວງຍຸຕິທຳ ຜູ້ຊີ້ນຳວຽກງານປະເມີນຜົນການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍ ກັບຄະນະກົມ, ບັນດາຫົວໜ້າພະແນກ ແລະ ພະນັກງານວິຊາການຈຳນວນໜຶ່ງ ຂອງກົມກວດກາ ແລະ ປະເມີນຜົນນິຕິກຳ ຊຶ່ງມີຜູ້ເຂົ້າ ຮ່ວມທັງໝົດ 9 ທ່ານ, ຍິງ 4 ທ່ານ.

ໃນພິທີ ທ່ານ ນະລົງລິດ ນໍລະສິງ, ຫົວໜ້າກົມກວດກາ ແລະ ປະເມີນຜົນນິຕິກໍາ ກ່າວຕ້ອນຮັບ ແລະ ຍົກໃຫ້ເຫັນຄວາມໝາຍຄວາມສຳຄັນ ຂອງການພົບປະແລກປ່ຽນກັນລະຫວ່າງ ທ່ານ ຮອງລັດຖະມົນຕີ ແລະ ກົມ, ຈາກນັ້ນ ທ່ານ ເພັດສະໝອນ ຕັນນຸວົງ, ຮອງຫົວໜ້າກົມ ກໍໄດ້ລາຍງານສະພາບການເຄື່ອນໄຫວຂອງກົມກວດກາ ແລະ ປະເມີນຜົນນິຕິກໍາ ໂດຍແບ່ງອອກເປັນສະພາບກ່ຽວກັບກົງຈັກການຈັດຕັ້ງ, ການເຄື່ອນໄຫວ ແລະ ຈັດຕັ້ງປະຕິບັດແຜນປະຈຳປີ, ປະຈຳໄຕມາດ ໂດຍສະເພາະປີ 2020 ທີ່ຜ່ານມາ ແລະ ປີ2021 ໂດຍໄດ້ຍົກໃຫ້ເຫັນຜົນງານທີ່ພົ້ນເດັ່ນ, ຂໍ້ສະດວກ ແລະ ຂໍ້ຫຍຸ້ງຍາກ, ສິ່ງທ້າທາຍ ແລະ ທິດທາງແຜນການໃນຕໍ່ໜ້າ. ຈາກນັ້ນບັນດາທ່ານຫົວໜ້າພະແນກ ກໍໄດ້ຜັດປ່ຽນກັນຂຶ້ນລາຍງານສະພາບໂດຍລວມຂອງແຕ່ລະພະແນກ ແລະ ການເຄື່ອນໄຫວປະຕິບັດວຽກງານ ລວມທັງຂໍ້ສະເໜີຕ່າງໆເພື່ອໃຫ້ທ່ານຮອງລັດຖະມົນຕີໄດ້ນໍາໄປພິຈາລະນາ ແລະ ໃຫ້ທິດຊີ້ນຳ.

ຈາກນັ້ນ ທ່ານ ກົງ​ຈີ ຢ່າງ​ຈື່ ຮອງ​ລັດະ​ມົນຕີ​ກະຊວງ​ຍຸຕິ​ທຳ ​ໄດ້​ມີ​ຄຳ​ໂອ້​ລົມ ແລະ ໃຫ້ທິດຊີ້ນໍາ 6 ມາດຕະການ ເພື່ອເປັນພື້ນຖານ ແລະ ທິດທາງໃນການສືບຕໍ່ຈັດຕັ້ງປະຕິບັດໜ້າທີ່ວຽກງານຂອງກົມໃນຕໍ່ໜ້າ ໂດຍໄດ້ເນັ້ນໃຫ້ເຫັນຄວາມໝາຍ ແລະ ຄວາມສຳຄັນຂອງກະຊວງຍຸຕິທຳໃນຖານະເປັນເສນາທິການໃຫ້ລັດຖະບານໃນການສ້າງ, ປັບປຸງ ແລະ ປະເມີນຜົນການຈັດຕັ້ງປະຕິບັດກົດໝາຍ ຊຶ່ງກົມກວດກາ ແລະ ປະເມີນຜົນນິຕິກໍາ ຕ້ອງໄດ້ກວດກາຄືນທີ່ຕັ້ງ ແລະ ພາລະບົດບາດຂອງກົມ ແລະ ປັບປຸງໃຫ້ສອດຄ່ອງກັບໜ້າທີ່ການເມືອງແລະ ການມອບໝາຍຂອງຂັ້ນເທິງ; ເອົາໃຈໃສ່ປັບປຸງການຊີ້ນຳ-ນຳພາ ບໍ່ໃຫ້ສັບສົນກັນລະຫວ່າງວຽກພັກ ແລະ ວຽກລັດ; ສ້າງເງື່ອນໄຂ ແລະ ສ້າງກຳລັງແຮງ ໃນການຊຸກຍູ້ ແລະ ປະກອບສ່ວນເຂົ້າໃນການປະເມີນຜົນການປະຕິບັດກົດໝາຍ ແລະ ນິຕິກໍາໃຕ້ກົດໝາຍຂອງບັນດາຂະແໜງການແລະ ທ້ອງຖິ່ນ, ລວມທັງການປະກອບຄຳເຫັນທາງດ້ານກົດໝາຍຕໍ່ສັນຍາ ແລະ ການອອກຄຳເຫັນທາງດ້ານກົດໝາຍ; ສືບຕໍ່ຄົ້ນຄວ້າປັບປຸງກົງຈັກການຈັດຕັ້ງ ແລະ ການສັບຊ້ອນພະນັກງານລັດຖະກອນພາຍໃນກົມໃຫ້ສາມາດຕອບສະໜອງໄດ້ຕາມພາລະບົດບາດໃຫ້ສົມຄູ່ກັບໜ້າທີ່ການເມືອງ ແລະ ລະດັບວິຊາສະເພາະຂອງແຕ່ລະຄົນ; ເອົາໃຈໃສ່ວຽກງານຂະບວນການ ແລະ ການເຄື່ອນໄຫວຂອງສາມອົງການຈັດຕັ້ງມະຫາຊົນໃຫ້ໜັກແໜ້ນ ແລະ ມີຄວາມຝົດຟື້ນ ທັງເອົາໃຈໃສ່ປັບປຸງການເຄື່ອນໄຫວຂອງວຽກງານໃຫ້ສອດຄ່ອງກັບ ວິຖີການດຳລົງຊີວິດແບບໃໝ່ ໃນໄລຍະທີ່ທົ່ວພັກ-ທົ່ວປວງຊົນລາວທັງຊາດກໍຳລັງອອກແຮງ ແລະ ຮ່ວມມືກັນຕ້ານ ແລະ ສະກັດກັ້ນພະຍາດປອດອັກເສບສາຍພັນໃໝ່ ຫຼື ໂຄວິດ-19.

ພາຍຫຼັງທີ່ໄດ້ຮັບການໂອ້ລົມແລ້ວ, ທ່ານ ນະລົງລິດ ນໍລະສິງ, ຫົວໜ້າກົມ ກໍໄດ້ຂຶ້ນກ່າວຮັບຄຳໂອວາດ ແລະ ໃຫ້ຄວາມໝັ້ນໃຈຕໍ່ທ່ານຮອງລັດຖະມົນຕີວ່າຈະນຳເອົາຄຳໂອ້ລົມຂອງທ່ານຮອງລັດຖະມົນຕີໄປເຜີຍແຜ່ ແລະ ຈັດຕັ້ງຜັນຂະຫຍາຍໃນໜ້າທີ່ວຽກງານ ເພື່ອແນໃສ່ເຮັດໃຫ້ການຈັດຕັ້ງ ແລະ ການເຄື່ອນໄຫວຂອງກົມມີຜົນສຳເລັດຍິ່ງໃຫຍ່ກວ່າເກົ່າ, ພ້ອມດຽວກັນນີ້ ທ່ານ ນະລົງລິດ ນໍລະສິງ ຍັງໄດ້ຕາງໜ້າໃຫ້ພະນັກງານ-ລັດຖະກອນທັງໝົດພາຍໃນກົມ ສະແດງຄວາມຂອບໃຈ ແລະ ຮູ້ບຸນຄຸນຕໍ່ຄະນະພັກ-ຄະນະນຳກະຊວງຍຸຕິທຳ ທີ່ໄດ້ເອົາໃຈໃສ່ໃກ້ຊິດຕິດແທດ ແລະ ຊຸກຍູ້ຊີ້ນຳວຽກງານຂອງກົມເປັນຢ່າງດີ ແລະ ຍັງໄດ້ອວຍພອນໃຫ້ທ່ານໄດ້ປະສົບຄວາມສຳເລັດຢ່າງຈົບງາມໃນໂອກາດທີ່ຮັບໜ້າທີ່ຕຳແໜ່ງ ແລະ ການມອບໝາຍໃຫມ. ກອງປະຊຸມປິດລົງໃນວັນດຽວກັນເວລາ 11:20 ນາທີ.

ຂ່າວ ແລະ ພາບ ໂດຍ: ພະແນກບໍລິຫານ, ກົມກວດກາ ແລະ ປະເມີນຜົນນິຕິກໍາ

ປະເພດຂ່າວ: