Submitted by xaiyphimphone on
ກົມໂຄສະນາເຜີຍແຜ່ກົດໝາຍ, ກະຊວງຍຸຕິທຳ ໄດ້ຈັດກອງປະຊຸມຖອດຖອນບົດຮຽນກ່ຽວກັບວຽກງານໂທລະພາບ ປະຈຳປີ 2017 ຂຶ້ນໃນວັນທີ 9 ພະຈິກ 2017 ທີ່ກະຊວງຍຸຕິທຳ ພາຍໃຕ້ການເຂົ້າຮ່ວມ ແລະ ເປັນປະທານຂອງ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ, ເຂົ້າຮ່ວມໂດຍ ທ່ານ ພູທອນ ແກ້ວດວງມະນີ ຫົວໜ້າກົມໂຄສະນາເຜີຍກົດໝາຍ, ມີບັນດາຫົວໜ້າ, ຮອງກົມ, ທ່ານ ຜູ້ຕາງໜ້າຫ້ອງການ, ສະຖາບັນ, ສູນແກ້ໄຂຂໍ້ຂັດແຍ່ງທາງດ້ານເສດຖະກິດ, ບັນດາແຂກຖຶກເຊີນຈາກສະຖານີໂທລະພາບແຫ່ງຊາດລາວ, ສະຖານີໂທລະພາບປ້ອງກັນຄວາມສະຫງົບ ກະຊວງປ້ອງກັນຄວາມສະຫງົບ ແລະ ບັນດາພະນັກງານວິຊາການເຂົ້າຮ່ວມ.
ໃນກອງປະຊຸມ ທ່ານ ປອ ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ ກໍໄດ້ກຽດກ່າວເປີດກອງປະຊຸມຢ່າງເປັນທາງການ. ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສະຫຼຸູບຕີລາຄາການເຄື່ອນໄຫວວຽກງານໂທລະພາບຂອງກະຊວງຍຸຕິທຳໃນໄລຍະ 1 ປີຜ່ານມາ, ຈາກນັ້ນ, ທ່ານ ບຸນລ້ອມ ດວງມາລາ ຮອງຫົວໜ້າກົມໂຄສະນາເຜີຍແຜ່ກົດໝາຍ ກໍໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານໂທລະພາບໃນລະຍະ 1 ປີຜ່ານມາ ຊຶ່ງສາມາດສະຫຼຸບໄດ້ ດັ່ງນີ້: ການຜະລິດລາຍການອອກອາກາດໄດ້ທັງໝົດ 65 ເທບ, ມີ 318 ຫົວຂໍ້ຂ່າວ ແລະ ສຳພາດກ່ຽວກັບບັນຫາກົດໝາຍ 54 ຄັ້ງ, ເກັບກຳຂ່າວຢູ່ທ້ອງຖິ່ນໄດ້ 61 ຄັ້ງ, ສຳພາດການນຳຫຼັກແຫຼ່ງໃນການຈັດຕັ້ງປະຕິບັດລັດຖະທຳມະນູນ ແລະ ກົດໝາຍໃນຂົງເຂດຄວາມຮັບຜິດຊອບຂອງຕົນໄດ້ 45 ຄັ້ງ, ໃນນີ້ ຂະແໜງຍຸຕິທຳ 37 ຄັ້ງ ແລະ ຂະແໜງການອື່ນ 8 ຄັ້ງ, ໄດ້ເຄື່ອນໄຫວຖ່າຍທຳ, ຕັດຕໍ່ລາຍການໄດ້ 318 ຄັ້ງ, ໄດ້ຕິດຕາມການນຳຂອງກະຊວງຍຸຕິທຳ ໄປເຄື່ອນໄຫວຊຸກຍູ້ຊີ້ນຳວຽກງານຍຸຕິທຳໃນຂອບເຂດທົ່ວປະເທດ 205 ຄັ້ງ. ນອກຈາກນັ້ນ, ທ່ານຍັງໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງຈຳນວນໜຶ່ງໃນການຈັດຕັ້ງປະຕິບັດວຽກງານທີ່ຕ້ອງໄດ້ເອົາໃຈໃສ່ແກ້ໄຂໃນລະຍະຜ່ານມາ, ພາຍຫຼັງທີ່ໄດ້ຮັບຟັງການລະຫຼຸບລາຍງານແລ້ວ ຜູ້ເຂົ້າຮ່ວມກໍໄດ້ພ້ອມກັນປະກອບຄຳເຫັນຕໍ່ກັບວຽກງານດັ່ງກ່າວຢ່າງກົງໄປກົງມາ ດ້ວຍບັນຍາກາດຟົດຟື້ນ.
 |
 |
ໃນຕອນທ້າຍຂອງກອງປະຊຸມ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ ກໍໄດ້ກ່າວຍ້ອງຍໍຊົມເຊີຍຕໍ່ຜົນສຳເລັດທີ່ຍາດມາໄດ້ໃນລະຍະຜ່ານມາ ພ້ອມກັນນີ້ ທ່ານຍັງໄດ້ເນັ້ນໜັກໃຫ້ຄະນະຮັບຜິດຊອບກໍຄືກົມໂຄສະນາອົບຮົມກົດໝາຍ ຈົ່ງພ້ອມກັນສືບຕໍ່ຈັດຕັ້ງປະຕິບັດວຽກງານດັ່ງກ່າວນີ້ໃຫ້ເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ ແລະ ນຳເອົາບົດຮຽນທີ່ໄດ້ຈາກກອງປະຊຸມໃນຄັ້ງນີ້ໄປປັບປຸງໃຫ້ລາຍການ ເພື່ອສັງຄົມຍຸຕິທຳໄດ້ຫັນປ່ຽນໄປສູ່ຄຸນນະພາບໃໝ່ ເພື່ອເຮັດຫຼ້ອນໜ້າທີ່ການເມືອງທີ່ພັກ-ລັດມອບໝາຍໃຫ້ຫຼາຍຂຶ້ນກວ່າເກົ່າ.
ຂຽນຂ່າວ ແລະ ຖ່າຍພາບ ໂດຍ: ຊາຍພິມພອນ ສິຣິວົງໄຊ
ນັກຂ່າວ ກົມໂຄສະນາເຜີຍແຜ່ກົດໝາຍ
.