ກະຊວງຍຸຕິທຳ ຈັດກອງປະຊຸມຕິດຕາມ, ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ

          ໂດຍປະຕິບັດຕາມແຜນການລົງເຄື່ອນໄຫວຕິດຕາມ, ຊຸກຍູ້ ຢູ່ບັນດາກະຊວງ-ອົງການຂັ້ນສູງກາງ ຂອງກົມແຂ່ງຂັນ ແລະ ຍ້ອງຍໍ ສະບັບເລກທີ 144/ຂຍ, ລົງວັນທີ 8 ກໍລະກົດ 2024 ແລະ ແຈ້ງການຂອງຫ້ອງການກະຊວງພາຍໃນ ສະບັບເລກທີ 246/ຫກ, ລົງວັນທີ 11 ກໍລະກົດ 2024, ກ່ຽວກັບການລົງຕິດຕາມ, ຊຸກຍູ້ ຂະບວນການແຂ່ງຂັນ ຮັກຊາດ ແລະ ພັດທະນາ ສະນັ້ນ, ໃນຕອນບ່າຍຂອງວັນທີ 16 ຕຸລາ 2024 ກະຊວງຍຸຕິິທຳໄດ້ຈັດກອງປະຊຸມ ຕິດຕາມ, ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ ໂດຍການເປັນປະທານຮ່ວມຂອງ ທ່ານ ເກດສະໜາ ພົມມະຈັນ ຮອງລັດຖະມົນຕີກະຊວງຍຸຕິທຳ ແລະ ທ່ານ ນາງ ລີວົງ ລາວລີ ຮອງລັດຖະມົນຕີກະຊວງພາຍໃນ, ເຂົ້າຮ່ວມມີບັນດາທ່ານຫົວໜ້າກົມ, ຮອງຫົວໜ້າກົມ, ສູນແກ້ໄຂຂໍ້ຂັດແຍ່ງທາງດ້ານເສດຖະກິດ, ສະຖາບັນຍຸຕິທຳແຫ່ງຊາດ ແລະ ທ່ານຜູ້ຕາງໜ້າຈາກກະຊວງພາຍໃນ ພ້ອມດ້ວຍຄະນະຮັບຜິດຊອບແຂ່ງຂັນ-ຍ້ອງຍໍຂັ້ນກະຊວງ.

ຈາກນັ້ນ, ທ່ານ ຄຳເສີດ ວິລະພັນ ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານຂະບວນການແຂ່ງຂັນຮັກຊາດ ແລະ ພັດທະນາ ຂອງກະຊວງຍຸຕິທຳ ຊຶ່ງທ່ານ ໄດ້ຍົກໃຫ້ເຫັນ ສະພາບລວມ ທີ່ຕັ້ງ, ພາລະບົດບາດ ຂອງກະຊວງ; ການຈັດຕັ້ງປະຕິບັດຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ໃນໄລຍະຜ່ານມາ; ການປະເມີນຂະບວນການແຂ່ງຂັນ ແລະ ສະເໜີຍ້ອງຍໍ; ຕີລາຄາການຈັດຕັ້ງປະຕິບັດຂະບວນການແຂ່ງຂັນໃນໄລຍະ 1 ປີ ຜ່ານມາ ຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງ, ຂໍ້ສະດວກ, ຂໍ້ຫຍຸ້ງຍາກ, ບົດຮຽນທີ່ຖອດຖອນໄດ້ ແລະ ທິດທາງແຜນການໃນຕໍ່ໜ້າ. ຈາກນັ້ນ, ໃນກອງປະຊຸມຜູ້ເຂົ້າຮ່ວມ ໄດ້ປະກອບຄໍາເຫັນ ແລະ ແລກປ່ຽນບົດຮຽນ ຕໍ່ກັບບັນດາຄຳຖາມເຈາະຈີ້ມຂອງທ່ານປະທານ ທີ່ເຕັມໄປດ້ວຍບັນຍາກາດຟົດຟື້ນ ແລະ ໃນຕອນທ້າຍທ່ານຍັງໄດ້ມີຄຳເຫັນ ແລະ ເນັ້ນໜັກບາງບັນຫາ ເພື່ອເປັນທີດຊີ້ນໍາເຮັດໃຫ້ການຈັດຕັ້ງປະຕິບັດວຽກງານແຂ່ງຂັນ-ຍ້ອງຍໍ ໂດຍສະເພາະຂະບວນການແຂ່ງຂັນ ຮັກຊາດ ແລະ ພັດທະນາ ຂອງບັນດາກະຊວງ ແລະ ອົງການ ໃຫ້ສໍາເລັດຕາມແຜນການທີ່ວາງໄວ້ ຕ້ອງໄດ້ເອົາໃຈໃສ່ຫຼາຍບັນຫາ ດັ່ງນີ້:

1. ເອົາໃຈໃສ່ໃນການຄົ້ນຄວ້າ, ເຊື່ອມຊຶມບັນດາມະຕິ, ຄໍາສັ່ງ, ຄຳແນະນໍາຕ່າງໆຂອງຂັ້ນເທິງ ກ່ຽວກັບວຽກງານແຂ່ງຂັນ-ຍ້ອງຍໍໃຫ້ເລິກເຊິ່ງ ພ້ອມທັງສືບຕໍ່ຕິດຕາມ, ຊຸກຍູ້ ບັນດາການຈັດຕັ້ງທີ່ຍັງບໍ່ທັນສໍາເລັດກ່ຽວກັບຂັ້ນຕອນຕ່າງໆ ຂອງຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ;

2. ສ້າງບັນດານິຕິກຳທີ່ກ່ຽວຂ້ອງກັບວຽກງານແຂ່ງຂັນ-ຍ້ອງຍໍ ໃຫ້ຫຼາຍຂຶ້ນ, ລະອຽດຈະແຈ້ງ ໂດຍຜັນຂະຫາຍຈາກນິຕິກໍາຂອງກະຊວງພາຍໃນ ເພື່ອເປັນບ່ອນອີງ ແລະ ສ້າງຄວາມສະດວກໃຫ້ແກ່ການຈັດຕັ້ງປະຕິບັດ ໃນການຄົ້ນຄວ້າວຽກງານດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນເລື້ອຍໆ;

3. ເອົາໃຈໃສ່ກໍານົດແຜນການແຂ່ງຂັນໃຫ້ລະອຽດ ເພື່ອເປັນບ່ອນອີງໃນການຕິດຕາມ, ຊຸກຍູ້ ແລະ ຊີ້ນໍາຂະບວນການແຂ່ງຂັນຮັກຊາດ ແລະ ພັດທະນາ ໂດຍນໍາເອົານິຕິກໍາ, ເອກະສານກ່ຽວກັບການແຂ່ງຂັນ-ຍ້ອງຍໍ ມາເຜີຍແຜ່ ເຊື່ອມຊຶມຢ່າງເປັນປະຈໍາ; ສ້າງຂະບວນການໃຫ້ມີຄວາມຟົດຟື້ນ- ຕໍ່ເນື່ອງ ເຫັນໄດ້ບຸກຄົນ ແລະ ການຈັດຕັ້ງທີ່ດີເດັ່ນໃນຂະບວນການ, ປະຕິບັດລະບອບສະຫຼຸບ-ລາຍງານຢ່າງເຂັ້ມງວດ;

4. ເອົາໃຈໃສ່ ຄົ້ນຄວ້າຄັດເລືອກຍ້ອງຍໍໃຫ້ຖືກຕ້ອງຕາມລະບຽບຫຼັກການ ແລະ ແທດເໝາະກັບຜົນງານຕົວຈິງ ພ້ອມທັງປະກອບເອກະສານໃຫ້ຄົບຖ້ວນ ເພື່ອຫຼີກລ້ຽງບັນຫາການແກ້ໄຂເອກະສານຊັກຊ້າ ແລະ ແກ່ຍາວ;

5. ເພີ່ມທະວີຂອດປະສານງານລະຫວ່າງສາຍຕັ້ງ, ສາຍຂວາງ, ຄະນະຮັບຜິດຊອບວຽກງານຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ຢູ່ແຕ່ລະຂັ້ນໃຫ້ມີປະສິດທິພາບ, ຈັດຕັ້ງປະຕິບັດໃຫ້ມີຄວາມວ່ອງໄວ ແລະ ທັນການຂຶ້ນກວ່າເກົ່າ.

ຂ່າວ-ພາບ: ກະຊວງຍຸຕິທໍາ