ພິທີປາຖະກະຖາວັນສ້າງຕັ້ງສານປະຊາຊົນ ແລະ ລັດຖະທໍາມະນູນ ແຫ່ງ ສປປ ລາວ

ໃນຕອນເຊົ້າຂອງວັນທີ່ 5 ສິງຫາ 2020 ຢູ່ທີ່ຫ້ອງການບ້ານ ອອມ ເມືອງ ອະນຸວົງ ແຂວງ ໄຊສົມບູນ ພະແນກຍຸຕິທໍາ ແລະ ສານປະຊາຊົນແຂວງ ໄຊສົມບູນ ໄດ້ຈັດພິທີປາຖະກະຖາ ເນື່ອງໃນໂອກາດສ້າງຕັ້ງສານປະຊາຊົນ ຄົບຮອບ 38 ປີ (15 ສິງຫາ 1982 ຫາ 15 ສິງຫາ 2020) ແລະ ວັນສ້າງຕັ້ງລັດຖະທໍາມະນູນ ຄົບຮອບ 29 ປີ (15 ສິງຫາ 1991 - 15 ສິງຫາ 2020 ) ທີ່ຈະມາເຖິງໃນມໍ່ໆນີ້ ໃຫ້ກຽດເປັນປະທານ ແລະ ປາຖະກະຖາໂດຍ ທ່ານ ຄໍາເພັດ ໄຊຍະຊ້າງ ຮອງປະທານສານປະຊາຊົນແຂວງ ໄຊສົມບູນ ມີເລຂາພັກບ້ານ 3 ບ້ານພ້ອມດ້ວຍຄະນະ, ພະນັກງານກອງກໍ່ສ້າງຮາກຖານປະຈໍາກຸ່ມບ້ານ ແລະ ປະຊາຊົນເຂົ້າຮ່ວມຮັບຟັງທັງໝົດ 63 ທ່ານ, ຍິງ 18 ທ່ານ.

ທ່ານ ຄໍາເພັດ ໄຊຍະຊ້າງ ຮອງປະທານສານປະຊາຊົນແຂວງ ໄຊສົມບູນ ໄດ້ເລົ່າໃຫ້ຮູ້ເຖິງປະຫວັດຄວາມເປັນມາຂອງຂະບວນວິວັດການເຕີບໃຫຍ່ຂະຫຍາຍຕົວ ຂອງສານປະຊາຊົນ ແລະ ລັດຖະທໍາມະນູນນັບແຕ່ມື້ສ້າງຕັ້ງຈົນເຖິງປັດຈຸບັນ. ນອກຈາກນັ້ນ, ຍັງໄດ້ໂຄສະນາເຜີຍແຜ່ກົດໝາຍຈໍານວນໜຶ່ງ ເຊັ່ນ ບາງມາດຕາຂອງລັດຖະທໍາມະນູນ, ກົດໝາຍວ່າດ້ວຍຄອບຄົວ, ປະມວນກົດໝາຍອາຍາ ເພື່ອເຮັດໃຫ້ປະຊາຊົນໄດ້ຮັບຮູ້, ເຂົ້າໃຈກ່ຽວກັບກົດໝາຍ ແລະ ລະບຽບການຂອງລັດທີ່ວາງອອກໃນແຕ່ລະໄລຍະ, ໃຫ້ເຂົາເຈົ້າຮູ້ນໍາໃຊ້ກົດໝາຍເຂົ້າໃນຊີວິດປະຈໍາວັນຢ່າງຖືກຕ້ອງ, ທັງເປັນການຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆ ຢູ່ໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ.

ໃນຕອນທ້າຍ ທ່ານ ລື່ຢ່າງ ຫວັງເຢັ່ງ ຮອງຫົວໜ້າພະແນກຍຸຕິທໍາ ກໍ່ໄດ້ເນັ້ນໜັກ ອໍານາດການປົກຄອງບ້ານ ແລະ ປະຊາຊົນບັນດາເຜົ່າ ຈົ່ງເອົາໃຈໃສ່ເປັນເຈົ້າການໃນການເຄົາລົບ ແລະ ປະຕິບັດກົດໝາຍຢ່າງເຂັ້ມງວດ.

ຂ່າວ-ພາບໂດຍ: ຫົງທອງ ອຸ່ນທະວີສັກ