ພະແນກຍຸຕິທໍາແຂວງ ໄຊຍະບູລີລົງໂຄສະນາເຜີຍແຜ່ກົດໝາຍຢູ່ເມືອງ ທົ່ງມີໄຊ

   ໃນວັນທີ 6 ສິງຫາ 2020 ທີ່ຜ່ານມາ ຢູ່ທີ່ສະໂມສອນເມືອງ ທົ່ງມີໄຊ ແຂວງ ໄຊຍະບູລີ ໄດ້ຈັດພິທີໂຄສະນາເຜີຍແຜ່ກົດໝາຍຂຶ້ນ ພາຍໃຕ້ການເປັນປະທານຮ່ວມຂອງ ທ່ານ ກາວີ ເກດດົມລິ ຫົວໜ້າພະແນກຍຸຕິທຳແຂວງ ໄຊຍະບູລີ ແລະ ທ່ານ ສົມພອນ ໄຊດວງຕາ ກຳມະການພັກແຂວງ, ເລຂາພັກເມືອງ, ເຈົ້າເມືອງ ທົ່ງມີໄຊ. ມີບັນດາທ່ານຄະນະປະຈຳພັກເມືອງ, ຫົວໜ້າ, ຮອງຫົວໜ້າຫ້ອງການ, ຄະນະພັກ, ຄະນະບັນຊາການ ປກສ-ປກຊ ເມືອງ, ເລຂາພັກບ້ານ, ນາຍບ້ານ ແລະ ພະນັກງານວິຊາການຂອງເມືອງເຂົ້າຮ່ວມຮັບຟັງທັງໝົດຈຳນວນ 127 ຄົນ, ຍິງ 24 ຄົນ.
   ກົດໝາຍທີ່ນໍາມາໂຄສະນາເຜີຍແຜ່ໃນຄັ້ງນີ້ ປະກອບມີ ປະມວນກົດໝາຍແພ່ງ, ປະມວນກົດໝາຍອາຍາ, ກົດໝາຍວ່າດ້ວຍການຈັດຕັ້ງປະຕິບັດຄຳຕັດສີນຂອງສານ ແລະ ພາລະບົດບາດຂອງຂະແໜງຍຸຕິທຳ ຈຸດປະສົງ ເພື່ອໃຫ້ພະນັກງານ-ລັດຖະກອນ, ການນຳຫຼັກແຫຼ່ງຂອງເມືອງ ແລະ ປະຊາຊົນ ໄດ້ຮັບຮູ້ , ເຂົ້າໃຈ ແລະ ເຊື່ອມຊຶມຕໍ່ແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ ທີ່ວາງອອກໃນແຕ່ລະໄລຍະຢ່າງຈະແຈ້ງ ເພື່ອຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ.

   ຕອນທ້າຍ ທ່ານ ຫົວໜ້າພະແນກຍຸຕິທຳແຂວງ ກໍໄດ້ມີຄໍາເຫັນໂອ້ລົມຕໍ່ກອງປະຊຸມ ຊຶ່ງທ່ານໄດ້ເນັ້ນໜັກໃຫ້ສະມາຊິກພັກ, ພະນັກງານ ການນຳຫຼັກແຫຼ່ງຂອງເມືອງ ຈົ່ງໄດ້ພ້ອມກັນເພີ່ມທະວີ ນຳເອົາແນວທາງຂອງພັກກໍຄືກົດໝາຍຂອງລັດ ໄປໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ການເມືອງ ທີ່ຢູ່ໃນຄວາມຮັບຜິດຊອບຂອງຕົນ, ເປັນເຈົ້າການໃນການຄົ້ນຄ້ວາ-ຮ່ຳຮຽນ ລັດຖະທຳມະນູນ, ກົດໝາຍ ແລະ ລະບຽບການຂອງລັດ ທີ່ວາງອອກແຕ່ລະໄລຍະ, ພ້ອມກັນເຄົາລົບ ແລະ ປະຕິບັດກົດໝາຍຢ່າງເຂັ້ມງວດ, ໃຫ້ບັນດາຂະແໜງການຕ່າງໆ ອ້ອມຂ້າງເມືອງ ທີ່ມີກົດໝາຍ ແລະ ນິຕິກຳ ຈົ່ງຫັນລົງສູ່ສັງຄົມ ເພື່ອເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ປາກົດຜົນເປັນຈິງເທື່ອລະກ້າວ.

ຂຽນຂ່າວ ແລະ ຖ່າຍພາບໂດຍ: ໂກສິດ ສິງສະຖິດ