ພະແນກຍຸຕິທໍາແຂວງ ໄຊຍະບູລີລົງໂຄສະນາເຜີຍແຜ່ກົດໝາຍຢູ່ເມືອງ ບໍ່ແຕນ

ວັນທີ 31 ກໍລະກົດ 2020 ຜ່ານມານີ້ ຢູ່ທີ່ສະໂມສອນເມືອງ ບໍ່ແຕນ ແຂວງ ໄຊຍະບູລີ ໄດ້ຈັດພິທີໂຄສະນາເຜີຍແຜ່ກົດໝາຍ ພາຍໃຕ້ການເປັນປະທານຮ່ວມລະຫວ່າງ ທ່ານ ກາວີ ເກດດົມລິ ຫົວໜ້າພະແນກພະແນກຍຸຕິທໍາແຂວງ ໄຊຍະບູລີ ແລະ ທ່ານ ສຸລິນ ທໍາມະວົງ ຮອງເຈົ້າເມືອງ ບໍ່ແຕນ. ມີບັນດາທ່ານ ຄະນະປະຈໍາພັກເມືອງ, ຫົວໜ້າ, ຮອງຫົວໜ້າຫ້ອງການ, ຄະນະພັກ, ຄະນະບັນຊາການ ປກສ-ປກຊ ເມືອງ, ນາຍບ້ານ, ຜູ້ປະກອບການທຸລະກິດພາຍໃນເມືອງ, ພະນັກງານ-ລັດຖະກອນຂອງເມືອງ ເຂົ້າຮ່ວມທັງໝົດ ຈໍານວນ 130 ຄົນ, ຍິງ 36 ຄົນ.

ກົດໝາຍທີ່ນໍາມາໂຄສະນາເຜີຍແຜ່ໃນຄັ້ງນີ້ ປະກອບມີ ບາງມາດຕາ ຂອງປະມວນກົດໝາຍແພ່ງ, ປະມວນກົດໝາຍອາຍາ, ກົດໝາຍວ່າດ້ວຍການຈັດຕັ້ງປະຕິບັດຄໍາຕັດສີນຂອງສານ ແລະ ກົດໝາຍທີ່ຕິດພັນກັບການດໍາລົງຊີວິດປະຈໍາວັນຂອງປະຊາຊົນ. ນອກນັ້ນ, ຍັງໄດ້ໂຄສະນາເຜີຍແຜ່ວຽກງານທະບຽນສານ, ວຽກງານສ້າງນິຕິກໍາ, ພາລະບົດບາດຂອງຂະແໜງຍຸຕິທໍາໃຫ້ປະຊາຊົນໄດ້ຮັບຮູ້ຕື່ມອີກ ເພື່ອໃຫ້ພະນັກງານການນໍາຫຼັກແຫຼ່ງຂອງເມືອງ, ບ້ານ ແລະ ຜູ້ປະກອບການທຸລະກິດຢູ່ພາຍໃນເມືອງ ໄດ້ຮັບຮູ້, ເຊື່ອມຊຶມ, ເຂົ້າໃຈກ່ຽວກັບ ແນວທາງນະໂຍບາຍຂອງພັກ, ກົດໝາຍ ແລະ ລະບຽບການຕ່າງໆຂອງລັດທີ່ວາງອອກໃນແຕ່ລະໄລຍະ, ທັງເປັນການຕ້ານ ແລະ ສະກັດກັ້ນ ປາກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມ ໃຫ້ຫຼຸດໜ້ອຍຖອຍລົງເທື່ອລະກ້າວ.

ໃນຕອນທ້າຍ ທ່ານຫົວໜ້າພະແນກຍຸຕິທໍາແຂວງ ໄຊຍະບູລີ ກໍໄດ້ໂອ້ລົມຕໍ່ກອງປະຊຸມ ແລະ ທ່ານໄດ້ຍົກໃຫ້ເຫັນບາງບັນຫາທີ່ພົ້ນເດັ່ນ ແລະ ສໍາຄັນຂອງວຽກງານຍຸຕິທໍາຂັ້ນທ້ອງຖິ່ນ, ເນັ້ນໜັກໃຫ້ສະມາຊິກພັກ, ພະນັກງານການນໍາຫຼັກແຫຼ່ງຂອງເມືອງ ຈົ່ງພ້ອມກັນເພີ່ມທະວີ ນໍາເອົາແນວທາງຂອງພັກ, ກົດໝາຍຂອງລັດ ໄປໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ການເມືອງ ທີ່ຢູ່ໃນຄວາມຮັບຜິດຊອບຂອງຕົນ, ເປັນເຈົ້າການໃນການຄົ້ນຄວ້າ-ຮໍ່າຮຽນ ລັດຖະທໍາມະນູນ, ກົດໝາຍ ແລະ ລະບຽບການຂອງລັດ ທີ່ວາງອອກແຕ່ລະໄລຍະ, ພ້ອມກັນເຄົາລົບ ແລະ ປະຕິບັດກົດໝາຍຢ່າງເຂັ້ມງວດ, ພ້ອມທັງໄດ້ຊີ້ແຈງໃຫ້ບັນດາຂະແໜງການຕ່າງໆອ້ອມຂ້າງເມືອງ ທີ່ມີກົດໝາຍ ແລະ ນິຕິກຳ ຈົ່ງຫັນລົງສູ່ຮາກຖານ ເພື່ອເປັນການແກ້ໄຂບັນດາປາກົດການຫຍໍ້ທໍ້ໃຫ້ຫຼຸດໜ້ອຍຖອຍລົງເທື່ອລະກ້າວ.

ຂຽນຂ່າວ-ຖ່າຍພາບໂດຍ: ໂກສິດ ສິງສະຖິດ