ພິທີເປີດຊຸດຝຶກອົບຮົມກົດໝາຍ ລະບົບບຳລຸງໄລຍະສັ້ນ 45 ວັນ ປີ 2020.

ໃນຕອນບ່າຍຂອງວັນທີ 24 ທັນວາ 2020 ທີ່ຜ່ານມາ  ຢູ່ທີ່ຫ້ອງປະຊຸມພະແນກຍຸຕິທຳແຂວງ ເຊກອງ ໄດ້ເປີດຊຸດຝຶກອົບຮົມກົດໝາຍ ລະບົບບຳລຸງ ໄລຍະສັ້ນ 45 ວັນ, ຮຸ່ນທີ IX ປະຈຳປີ 2020 ຂຶ້ນ ພາຍໃຕ້ການເປັນປະທານຂອງ ທ່ານ ນາງ ຈັນຫອມ ມະຫາໄຊ ຄະນະປະຈຳພັກແຂວງ, ມີຄະນະຮັບຜິດຊອບຂັ້ນແຂວງ, ຄູ-ອາຈານ ແລະ ນັກຝຶກອົບຮົມເຂົ້າຮ່ວມທັງໝົດ 56 ທ່ານ, ຍິງ 28 ທ່ານ.

ໃນພິທີທ່ານ ບຸນຕຸ້ມ ແກ້ວກິ່ງກົມ ເລຂາໜ່ວຍພັກ, ຫົວໜ້າພະແນກຍຸຕິທຳແຂວງ ໄດ້ຂຶ້ນຜ່ານບົດລາຍງານການກະກຽມເປີດຊຸດຝຶກອົບຮົມ ກົດໝາຍ ລະບົບບຳລຸງໄລຍະສັ້ນ 45 ວັນ, ຮຸ່ນທີ IX ປະຈຳປີ 2020 ໃນການເປີດຊຸດຝຶກອົບຮົມກົດໝາຍໃນຄັ້ງນີ້ ແມ່ນຊີ້ໃຫ້ເຫັນເຖິງຄວາມໝາຍຄວາມສຳຄັນ ການພັດທະນາລັດທີ່ປົກຄອງດ້ວຍກົດໝາຍ ຖືເອົາວຽກງານສ້າງຊັບພະຍາກອນມະນຸດ ຍົກລະດັບຄວາມຮູ້, ຄວາມສາມາດທາງດ້ານກົດໝາຍ, ໃຫ້ພະນັກງານຫຼັກແຫຼ່ງຂອງແຂວງ ແລະ ເມືອງ ໄດ້ຮັບຮູ້ເຂົ້າໃຈຕໍ່ແນວທາງຂອງພັກ ກົດໝາຍຂອງລັດຢ່າງຈະແຈ້ງ ໄດ້ນຳໄປຈັດຕັ້ງຜັນຂະຫຍາຍ ແລະ ໝູນໃຊ້ເຂົ້າໃນວຽກງານວິຊາສະເພາະໃຫ້ຖືກຕ້ອງ ແລະ ສອດຄ່ອງກັບສະພາບຕົວຈິງ ແນ່ໃສ່ການສ້າງລັດໃຫ້ເປັນລັດທີ່ປົກຄອງດ້ວຍກົດໝາຍເທື່ອລະກ້າວ.

ໃນພິທີ ທ່ານ ນາງ ຈັນຫອມ ມະຫາໄຊ ຄະນະປະຈຳພັກແຂວງ ກໍໄດ້ໂອ້ລົມຕໍ່ການເປີດການຝຶກອົບຮົມຄັ້ງນີ້ ໂດຍທ່ານໄດ້ເນັ້ນໜັກຕໍ່ນັກສຳມະນາກອນ, ຄະນະຮັບຜິດຊອບ, ຄູ-ອາຈານທີ່ເຂົ້າຮ່ວມຝຶກອົບຮົມ ຕ້ອງຕັດສິນໃຈສູງ, ພ້ອມກັນເອົາໃຈໃສ່ໃນການຊອກຮູ້ຮໍ່າຮຽນໃຫ້ມີປະສິດທິພາບ ຮັບປະກັນປະສິດທິຜົນ ທັງຍົກສູງບົດບາດຄວາມສາມາດໃນການນຳພາຂອງຄະນະພັກແຕ່ລະຂັ້ນໃຫ້ນັບມື້ສູງຂຶ້ນໃຫ້ຄະນະຮັບຜິດຊອບຕ້ອງສືບຕໍ່ປັບປຸງ ຂອດປະສານວຽກງານກັບບັນດາຂະແໜງການທີ່ກ່ຽວຂ້ອງໃຫ້ກົມກຽວ, ຄູ-ອາຈານທຸກທ່ານຈົ່ງພ້ອມກັນຖ່າຍຖອດຄວາມຮູ້, ຄວາມສາມາດ, ບົດຮຽນ, ກົດໝາຍຕ່າງໆໃຫ້ລະອຽດຊັດເຈນ. ການຝຶກອົບຮົມໃນຄັ້ງນີ້ມີນັກຝຶກອົບຮົມເຂົ້າຮ່ວມທັງໝົດ 48 ທ່ານ, ຍິງ 13 ທ່ານ, ມາຈາກອ້ອມຂ້າງແຂວງ 19 ທ່ານ, ຍິງ 10 ທ່ານ ແລະ ມາຈາກ 4 ເມືອງ 19 ທ່ານ, ຍິງ 3 ທ່ານ.
ພິທີເປີດດຳເນີນໄປດ້ວຍບັນຍາກາດອັນຟົດຟື້ນ ແລະ ປິດລົງໃນເວລາ 16:00 ໂມງ.

ພາບ-ຂ່າວ: ມະນີດາ ເລຫວຽດມ່ວງ

ກວດແກ້ໂດຍ: ທ່ານ ຄຳມິ່ງ ໄຊຍະຈັກ

ປະເພດຂ່າວ: