ທ່ານຮອງລັດຖະມົນຕີກະຊວງຍຸຕິທໍາ ລົງຊຸກຍູ້ວຽກງານໂຄສະນາເຜີຍແຜ່ກົດໝາຍ ຢູ່ແຂວງ ເຊກອງ.

ໃນຕອນເຊົ້າຂອງວັນທີ 14 ຕຸລາ 2020 ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທໍາ ໄດ້ລົງເຄື່ອນໄຫວຊຸກຍູ້ວຽກງານໂຄສະນາເຜີຍແຜ່ກົດໝາຍ ຢູ່ພະແນກຍຸຕິທໍາແຂວງ ເຊກອງ ໂດຍຄະນະພັກ-ຄະນະພະແນກ, ຫົວໜ້າຂະແໜງ, ຮອງຂະແໜງ, ພະນັກງານ-ລັດຖະກອນ ແລະ ພະນັກງານຫ້ອງການຍຸຕິທໍາເມືອງ ລະມາມ ເຂົ້າຮ່ວມທັງໝົດ 40 ທ່ານ, ຍິງ18 ທ່ານ.
ທ່ານ ບຸນຕຸ້ມ ແກ້ວກິ່ງກົມ ຫົວໜ້າພະແນກຍຸຕິທໍາແຂວງ ເຊກອງ ໄດ້ຂື້ນຜ່ານບົດລາຍງານການເຄື່ອນໄຫວໃນໄລຍະ 9 ເດືອນຜ່ານມາ ໂດຍຍົກໃຫ້ເຫັນຜົນງານທີ່ສາມາດຍາດມາໄດ້ທີ່ພົ້ນເດັ່ນ, ພ້ອມທັງຈຸດດີ, ຈຸດອ່ອນ ແລະ ຂໍ້ຄົງຄ້າງ, ວິທີແກ້ໄຂລວມທັງທິດທາງການເຄື່ອນໄຫວໃນຕໍ່ໜ້າ.
ຈາກນັ້ນ ທ່ານ ປອ. ເສີມສຸກ ສິມພະວົງ ກໍໄດ້ມີຄໍາເຫັນໂອ້ລົມ ກ່ອນອື່ນໝົດທ່ານໄດ້ສະແດງຄວາມຍ້ອງຍໍຊົມເຊີຍເຖິງຜົນງານທີ່ພະແນກຍຸຕິທໍາຍາດມາໄດ້ໄລຍະ 9 ເດືອນຜ່ານມາ ແລະ ຄວາມເປັນຫ່ວງເປັນໄຍຕໍ່ສະພາບການທີ່ມີຜົນກະທົບຕໍ່ວຽກງານຍຸຕິທໍາຮາກຖານ, ໂດຍສະເພາະແມ່ນສະພາບເສດຖະກິດຂອງໂລກ ການແຜ່ລະບາດຂອງພະຍາດອັກເສບປອດສາຍພັນໃໝ່ ( COVID 19 ) ແຕ່ເຖິງຢ່າງໃດກໍຕາມພັກ ແລະ ລັດຖະບານ ກໍເອົາໃຈໃສ່ຕໍ່ວຽກງານຍຸຕິທໍາຮາກຖານ ຊຶ່ງສະແດງອອກຢູ່ບ່ອນວ່າສູນກາງພັກ ໄດ້ມີນິຕິກໍາສະເພາະຂອງພັກ, ທີ່ກຳນົດວຽກງານຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ເພື່ອເປັນບ່ອນອີງໃນການເຄື່ອນໄຫວວຽກງານ ຂະແໜງການຍຸຕິທໍາທົ່ວປະເທດໃຫ້ ຂະແໜງການຍຸຕິທຳ ເປັນເສນາທິການໃຫ້ແກ່ອົງການປົກຄອງແຕ່ລະຂັ້ນໃນການກວດກາຄວາມຖືກຕ້ອງ ແລະ ຄວາມສອດຄ່ອງຂອງນິຕິກຳລຸ່ມກົດໝາຍ, ຄະນະພັກ-ຄະນະນຳຂອງກະຊວງຍຸຕິທໍາ ກໍໄດ້ຖືກແຕ່ງຕັ້ງເປັນຄະນະກຳມະການທີ່ສໍາຄັນຂອງຊາດ ສູນກາງ ແລະ ທ້ອງຖິ່ນຫຼາຍຂື້ນ.

ນອກນີ້ ທ່ານຍັງໄດ້ເນັ້ນໜັກບາງບັນຫາ ໃຫ້ເອົາໃຈໃສ່ປັບປຸງ ແກ້ໄຂໃນຕໍ່ໜ້າ ໂດຍສະເພາະແມ່ນເອົາໃຈໃສ່ໃນການຊີ້ນຳ-ນຳພາ ສຶກສາອົບຮົມດ້ານການເມືອງ-ແນວຄິດ, ໃຫ້ພະນັກງານ-ລັດຖະກອນ, ສຸມໃສ່ວຽກງານວິຊາສະເພາະຂອງຕົນດ້ວຍຄວາມຮັບຜິດຊອບສູງ ແລະ ຖືກຕ້ອງສອດຄ່ອງກັບລະບຽບກົດໝາຍ.

ຖ່າບພາບ-ຂຽນຂ່າວ: ພູພຽງໃຈ ພິມມະວົງສາ

ປະເພດຂ່າວ: