ໜ່ວຍພັກພະແນກຍຸຕິທຳແຂວງ ອຸດົມໄຊ ໄດ້ຮັບນາມມະຍົດເປັນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ

ໃນວັນທີ 21 ພຶດສະພາ 2020 ທີ່ຜ່ານມານີ້ ຢູ່ທີ່ຫ້ອງ ຂອງປະຊຸມພະແນກຍຸຕິທໍາແຂວງ ອຸດົມໄຊ ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂຶ້ນ ໂດຍການເປັນປະທານຂອງສະຫາຍ ສົມຈິດ ປັນຍາສັກ ກໍາມະການປະຈໍາພັກແຂວງ ຮອງເຈົ້າແຂວງ ອຸດົມໄຊ. ເຂົ້າຮ່ວມມີ ສະຫາຍ ສອນສຸວັນ ບັນຍາວົງ ເລຂາໜ່ວຍພັກ ພະແນກຍຸຕິທໍາແຂວງ ອຸດົມໄຊ, ມີຄະນະຮັບຜິດຊອບໃນການປະເມີນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ; ຕາງໜ້າຫນ່ວຍພັກ ຈາກສະພາປະຊາຊົນຂັ້ນແຂວງ, ສານປະຊາຊົນແຂວງ, ອົງການໄອຍະການປະຊາຊົນແຂວງ, ທະນາຄານນະໂຍບາຍ, ໜ່ວຍພັກບ້ານມອນໄຕ ແລະ ສະມາຊິກພັກພາຍໃນພະແນກຍຸຕິທໍາເຂົ້າຮ່ວມ ທັງໝົດ 38 ສະຫາຍ, ຍິງ 9 ສະຫາຍ.

ສະຫາຍ ສອນສຸວັນ ບັນຍາວົງ ເລຂາໜ່ວຍພັກ ພະແນກຍຸຕິທໍາແຂວງ ອຸດົມໄຊ ກໍໄດ້ຂື້ນຜ່ານບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ແລະ ທິດທາງແຜນການໃນຕໍ່ໜ້າ. ພາຍຫຼັງຜ່ານບົດສະຫຼຸບສຳເລັດ ກໍໄດ້ມີການມອບໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ໃຫ້ກຽດຂຶ້ນມອບໂດຍ ສະຫາຍ ສົມຈິດ ປັນຍາສັກ ກໍາມະການປະຈໍາພັກແຂວງ ຮອງເຈົ້າແຂວງ ອຸດົມໄຊ. ໃນຕອນທ້າຍ ສະຫາຍ ສົມຈິດ ປັນຍາສັກ ກໍໄດ້ມີຄໍາເຫັນໂອ້ລົມ ກ່ອນອື່ນໝົດສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ສະມາຊິກພັກທັງໝົດພາຍໃນພະແນກຍຸຕິທໍາແຂວງ ອຸດົມໄຊ ທີ່ໄດ້ສຸມໃສ່ຈັດຕັ້ງປະຕິບັດວຽກງານດ້ານຕ່າງໆ ຕະຫຼອດໄລຍະໜຶ່ງປີຜ່ານມາ ໄດ້ມີຜົນສໍາເລັດເປັນຢ່າງດີ ແລະ ໄດ້ເນັ້ນໜັກໃຫ້ຄະນະພັກ ຕ້ອງສຸມໃສ່ປະຕິບັດວຽກງານບາງດ້ານ ດັ່ງນີ້: 1. ເອົາໃຈໃສ່ໃນການສຶກສາອົບຮົມການເມືອງ-ແນວຄິດຕໍ່ສະມາຊິກພັກໃຫ້ມີທັດສະນະຫຼັກໝັ້ນ, ມີຄວາມເປັນເອກະພາບຕໍ່ແນວທາງນະໂຍບາຍຂອງພັກໃນແຕ່ລະໄລຍະ; 2. ການປະຕິບັດລະບອບການດໍາເນີນຊີວິດການເມືອງເປັນປົກກະຕິ ແລະ ການດໍາເນີນ ຕ້ອງຮັກສາລັກສະນະສຶກສາອົບຮົມ ພ້ອມທັງສະກັດກັ້ນບັນຫາຫຍໍ້ທໍ້ຂອງສະມາຊິກພັກ; 3. ເພີ່ມຄວາມເຂັ້ມແຂງໃນການກວດກາ ການປະຕິບັດລະບຽບຂອງສະມາຊິກພັກ ແລະ ຂອງອົງການຈັດຕັ້ງມະຫາຊົນໃຫ້ເປັນປົກກະຕິ; 4. ສືບຕໍ່ຄົ້ນຄວ້າບັນດານິຕິກໍາໃຫ້ຫຼາຍຂຶ້ນກວ່າເກົ່າ ເປັນຕົ້ນ ແມ່ນຄົ້ນຄວ້າບັນດາມະຕິ, ຄໍາສັ່ງຕ່າງໆທີ່ຕິດພັນກັບການມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ເພື່ອໃຫ້ສະມາຊິກພັກຮັບຮູ້ເຂົ້າໃຈຄວາມໝາຍຄວາມສໍາຄັນ; 5. ປະຕິບັດແບບແຜນວິທີເຮັດວຽກລວມສູນປະຊາທິປະໄຕ, ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ເຮັດວຽກໃຫ້ເປັນໝູ່ຄະນະ, ແບ່ງຄວາມຮັບຜິດຊອບຂອງບັນດາໜ້າວຽກຢ່າງລະອຽດ.

ຂ່າວໂດຍ: ນ. ພູຄໍາ ຫັດສະດີ, ພາບ: ບຸນມີ ອິນທະວົງ