ສະຫະພັນແມ່ຍິງແຂວງ ອຸດົມໄຊ ສົມທົບກັບຫ້ອງການຍຸຕິທໍາເມືອງ ຮຸນ ລົງໂຄສະນາເຜີຍແຜ່ກົດໝາຍໃຫ້ປະຊາຊົນ

Primary tabs

          ໃນລະຫວ່າງວັນທີ 21-24 ທັນວາ 2021 ຜ່ານມານີ້, ທ່ານ ນາງ ບົວທອງ ວັນນະລາດ ຮອງປະທານສະຫະພັນແມ່ຍິງແຂວງ ພ້ອມດ້ວຍຄະນະໄດ້ປະສານກັບຫ້ອງການຍຸຕິທຳເມືອງ ຮຸນ ໄດ້ລົງເຄື່ອນໄຫວໂຄສະນາເຜີຍແຜ່ກົດໝາຍ ໃຫ້ແກ່ປະຊາຊົນ ( ກຸ່ມບ້ານ ສີບຸນເຮືອງ ) ມີບ້ານ ໄຊມຸງຄຸນ, ບ້ານ ອຸດົມ ແລະ ( ກຸ່ມນາເງີນ ) ມີບ້ານ ນາໂພກ ເມືອງ ຮຸນ ແຂວງ ອຸດົມໄຊ, ມີຄະນະບ້ານ, ການຈັດຕັ້ງບ້ານ, ຄະນະແກ້ໄຂຂໍ້ຂັດແຍ່ງຂັ້ນບ້ານ ແລະ ປະຊາຊົນ ທັງ 3 ບ້ານເຂົ້າຮ່ວມທັງໝົດ 90 ຄົນ, ຍິງ 35 ຄົນ.
          ກົດໝາຍທີ່ນໍາມາໂຄສະນາເຜີຍແຜ່ໃນຄັ້ງນີ້ ມີບາງມາດຕາຂອງລັດຖະທຳມະນູນ, ກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ, ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ. ຜ່ານການໂຄສະນາເຜີຍແຜ່, ອະທິບາຍ, ຊີ້ແຈງບັນດາກົດໝາຍ ເຫັນວ່າປະຊາຊົນໄດ້ມີຄວາມສົນໃຈ, ມີຄວາມຮັບຮູ້, ເຂົ້າໃຈສິດສະເໜີພາບ ບົດບາດຍິງ-ຊາຍ, ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ, ເພີ່ມຄວາມສະເໜີພາບທາງເພດໃຫ້ຫຼາຍຂຶ້ນ.
          ຈຸດປະສົງເພື່ອເຮັດໃຫ້ການຈັດຕັ້ງບ້ານ ແລະ ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ ແລະ ລະບຽບການຂອງລັດທີ່ວາງອອກໃນແຕ່ລະໄລຍະ, ຍົກສູງສະຕິໃນການເຄົາລົບ ແລະ ປະຕິບັດກົດໝາຍ, ສ້າງເງື່ອນໄຂໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍເທື່ອລະກ້າວ.
ຂຽນຂ່າວ ແລະ ພາບ: ບຸນມີ ອິນທະວົງ.